មូលនិធិគន្ធបុប្ផា ទទួលបានជំនួយជាទឹកប្រាក់ពីសប្បុរសជននិងស្ថាប័នមួយចំនួនក្នុងទំហំជិត៥០ ០០០លានរៀល (៤៨ ៨៥៣ ៤៥២ ៦០០) និងជិត៥លានដុល្លារ ក្នុងត្រីមាសទី១ដើមឆ្នាំ២០២១។
សេចក្ដីប្រកាសព័ត៌មានរបស់មូលនិធិគន្ធបុប្ផា កាលពីថ្ងៃទី១៤ ខែកក្កដា ឆ្នាំ២០២១ បានឱ្យដឹងថា មូលនិធិនេះទទួលអំណោយជាទឹកប្រាក់ជិត៥ម៉ឺនលានរៀល និងជិត៥លានដុល្លារអាមេរិក ក្នុងរយៈពេល៦ខែដើមឆ្នាំ២០២១ ជាអំណោយដែលទទួលបានពីការកាត់កម្រៃសំបុត្រចូលទស្សនារមណីយដ្ឋានអង្គរពីគ្រឹះស្ថានអង្គរ ទទួលបានពីវិភាគទានប្រចាំឆ្នាំ២០២១របស់រដ្ឋាភិបាល ទទួលបានពីការបរិច្ចាគប្រចាំឆ្នាំរបស់ធនាគារអេស៊ីលីដា ទទួលបានពីសប្បុរសជននានា និងពីកាកបាទក្រហមកម្ពុជា ជាដើម។
ប្រភពដដែលបន្តថា៖ «ស្របពេលជាមួយគ្នានេះដែរ មូលនិធិគន្ធបុប្ផាកម្ពុជាក៏បានផ្ទេរថវិកាចំនួន៤ ០១៨ ២៦០ដុល្លារអាមេរិក និង ២០០ ០០០ ០០០រៀល ជូនមន្ទីរពេទ្យគន្ធបុប្ផា»។
នៅក្នុងសេចក្ដីប្រកាសព័ត៌មានដដែលនេះ ក៏បានលើកទឹកចិត្តដល់សប្បុរសជនទាំងក្នុងនិងក្រៅប្រទេសឱ្យបន្តចូលរួមបរិច្ចាគជាសមាជិក ដូចជា សមាជិកកិត្តិយស បរិច្ចាគចាប់ពី២០ ០០០ ០០០រៀលឬ ស្មើប្រមាណ៥ ០០០ដុល្លារអាមេរិកក្នុងមួយឆ្នាំ។ ចូលរួមជាសមាជិកគាំទ្រ បរិច្ចាគចាប់ពី៥ ០០០រៀលក្នុងមួយខែ ឬ៦០ ០០០រៀលក្នុងមួយឆ្នាំ ដើម្បីបង្ហាញពីសាមគ្គីភាពក្នុងស្មារតី «ខ្មែរជួយខ្មែរ»។
មន្ទីរពេទ្យគន្ធបុប្ផា ដំបូងត្រូវបានសម្ពោធដាក់ឱ្យប្រើប្រាស់នៅរាជធានីភ្នំពេញ ដោយអតីតព្រះមហាក្សត្រ ព្រះបាទ នរោត្តម សីហនុ កាលពីខែកញ្ញា ឆ្នាំ១៩៩២។ មន្ទីរពេទ្យនេះត្រូវបានដាក់ឈ្មោះតាមព្រះនាមរាជបុត្រីសំណព្វរបស់ព្រះករុណា ព្រះបាទសម្តេច ព្រះនរោត្តម សីហនុ ព្រះបរមរតនកោដ្ឋ គឺព្រះអង្គម្ចាស់ក្សត្រិយ៍ នរោត្តម គន្ធបុប្ផា ដែលបានសោយទិវង្គតដោយសាររោគាពាធ ពោលគឺជំងឺខ្វះឈាមក្រហម ឬជំងឺមហារីកគ្រាប់ឈាម កាលពីឆ្នាំ១៩៥២៕