រដ្ឋាភិបាលជប៉ុនបានប្រគល់រថយន្តសង្រ្គោះបន្ទាន់ ឬរថយន្តគិលានសង្គ្រោះចំនួន ៣០គ្រឿងទៀតដល់ប្រទេសកម្ពុជា។ រថយន្តគិលានសង្គ្រោះទាំង៣០គ្រឿងនេះ បានបញ្ជូនទៅកាន់មូលដ្ឋានសុខាភិបាលជាច្រើនរួចហើយនៅក្នុងសប្តាហ៍នេះ។
យោងតាមសេចក្តីប្រកាសព័ត៌មានរបស់ស្ថានទូតជប៉ុនប្រចាំនៅកម្ពុជា កាលពីថ្ងៃទី១៦ ខែកក្កដាឱ្យដឹងថា ជំនួយនេះ គឺជាផ្នែកមួយ នៃកិច្ចខិតខំប្រឹងប្រែងក្នុងការជួយដល់រដ្ឋាភិបាលកម្ពុជាដើម្បីប្រយុទ្ធប្រឆាំងនឹងការឆ្លងវីរុសកូរ៉ូណាប្រភេទថ្មី នៅលើសាកលលោក។
ប្រភពដដែលបន្តថា ជំនួយនេះ គឺផ្អែកលើវិធានការណ៍កិច្ចសហប្រតិបត្តិការដែលបានដាក់ចេញជាមួយបណ្តាប្រទេស អាស៊ានដែលត្រូវបានប្រកាសដោយលោកអតីតនាយករដ្ឋមន្រ្តី ស៊ីនហ្សូ អាបិ នៅក្នុងកិច្ចប្រជុំកំពូលអាស៊ានបូកបីពិសេសកាលពីខែមេសាឆ្នាំមុន។ គំនិតផ្តួចផ្តើមនេះ ក៏ជាផ្នែកមួយនៃការងារជាច្រើនរបស់រដ្ឋាភិបាលជប៉ុន ក្នុងការប្រយុទ្ធប្រឆាំងនឹងជំងឺកូវីដ១៩ លើកម្រិតសាកល។ នេះគឺជាការប្រគល់បន្ថែមលើរថយន្តគិលានសង្គ្រោះចំនួន៧០គ្រឿង ដែលបានផ្ដល់ជូនមកដល់រដ្ឋាភិបាលកម្ពុជាកន្លងរួចមកហើយ។
គិតត្រឹមថ្ងៃទី១៦ ខែកក្កដា ឆ្នាំ២០២១ ប្រទេសជប៉ុនបានផ្តល់ជំនួយដល់កម្ពុជារួមមាន រថយន្តគិលានសង្គ្រោះសរុបចំនួន១០០គ្រឿង ឧបករណ៍ត្រួតពិនិត្យកាំរស្មីអ៊ិចចំនួន១០ ឧបករណ៍ធ្វើរោគវិនិច្ឆ័យអ៊ុលត្រាសោនចំនួន២៦ ឧបករណ៍ផលិតអុកស៊ីសែនចំនួន៦៣ គ្រែសង្គ្រោះបន្ទាន់ចំនួន១០០គ្រែ និងគ្រឿងបរិក្ខារវេជ្ជសាស្រ្តជាច្រើនផ្សេងទៀត។
កាលពីថ្ងៃទី១៣ ខែកក្កដា ឆ្នាំ២០២១ ប្រទេសជប៉ុនក៏បានប្រកាសផ្តល់ជំនួយវ៉ាក់សាំង AstraZeneca ដែលផលិតនៅប្រទេសជប៉ុន ប្រមាណ ១,០០០,០០០ ដូស ជូនដល់កម្ពុជា ផងដែរ តាមរយៈមជ្ឈមណ្ឌល COVAX Facility។ វ៉ាក់សាំងទាំងនេះ នឹងត្រូវបានដឹកជញ្ជូនមកដល់រាជធានីភ្នំពេញក្នុងពេលដ៏ឆាប់ខាងមុខនេះ នៅពេលដែលការរៀបចំភស្តុភារដោយ COVAX Facility ត្រូវបានបញ្ចប់៕