គណៈកម្មការប្រយុទ្ធប្រឆាំងគ្រឿងញៀន នៅថ្ងៃចន្ទនេះ បានដុតកម្ទេចចោលគ្រឿងញៀនជាង៤តោន ខណៈគ្រឿងញៀនប្រមាណ៣តោនទៀតនឹងត្រូវមន្ត្រីជំនាញធ្វើការបន្សាបនិងបំផ្លាញចោលតាមលក្ខណៈបចេ្ចកទេស។
របាយការណ៍របស់គណៈកម្មការដុតបំផ្លាញគ្រឿងញៀន នៃអាជ្ញាធរជាតិប្រយុទ្ធប្រឆាំងគ្រឿងញៀន បានលើកឡើងថា គ្រឿងញៀនដែលអាជ្ញាធរបំផ្លាញចោលក្នុង«ទិវាអន្តរជាតិប្រយុទ្ធប្រឆាំងគ្រឿងញៀន» នៅថ្ងៃទី១៩ ខែកក្កដានេះ មានចំនួនសរុប៧ ៦២៤,៣១០គីឡូក្រាម (ឬស្មើជាង៧តោន) ក្នុងនោះ គ្រឿងញៀនដែលត្រូវបំផ្លាញដោយវិធីដុតមានចំនួន៤ ៣៨៤,៣១៧គីឡូក្រាម (ឬស្មើជាង៤តោន) និងគ្រឿងញៀនដែលត្រូវបំផ្លាញដោយវិធីបន្សាបតាមបច្ចេកទេសគីមីមានចំនួន៣ ២៣៩,៩៩៣ គីឡូក្រាម (ឬស្មើជាង៣តោន)។
របាយការណ៍បានបញ្ជាក់ថា៖ «ដោយសារសារធាតុគីមីផ្សំនិងសារធាតុគីមីប្រភេទខ្លះមានលក្ខណៈគីមី ឆាបឆេះខ្លាំង និងបង្កើតកម្រិតពុលខ្ពស់ មិនអាចធ្វើការបំផ្លាញដោយវិធីដុតបាន ព្រោះពាក់ព័ន្ធបញ្ហាសុវត្ថិភាពនិងបរិស្ថាន ទើបក្រុមការងារបច្ចេកទេសបានធ្វើការបែងចែករបៀបបំផ្លាញជា២វគ្គដាច់ដោយឡែកពីគ្នា គឺការបំផ្លាញដោយវិធីដុត និងការបំផ្លាញដោយវិធីបន្សាបតាមបច្ចេកទេសគីមីមានសុវត្ថិភាព»។
របាយការណ៍ដដែលបន្តថា គ្រឿងញៀនដែលត្រូវដុតកម្ទេចនិងបំផ្លាញចោលនៅដីឡូត៍មួយកន្លែងនៅផ្លូវ៦០ម៉ែត្រ រាជធានីភ្នំពេញនេះ ជាវត្ថុតាងដែលសាលាដំបូង និងអយ្យការអមសាលាដំបូងរាជធានីភ្នំពេញ ខេត្តស្វាយរៀង ខេត្តកំពង់ឆ្នាំង ខេត្តព្រៃវែង និងខេត្តតាកែវ ដកហូតទៅតាមអំណាចសាលក្រមរបស់តុលាការ ក្រោយសមត្ថកិច្ចជំនាញបង្ក្រាបនិងរឹបអូសបានកាលពីអំឡុងឆ្នាំ២០២០។
រដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃសៅរ៍ បានលើកឡើងនៅលើទំព័រហ្វេសប៊ុករបស់លោកថា ក្នុងរយៈពេល៦ខែ ឆ្នាំ២០២១នេះ ប្រទេសកម្ពុជាបានប្រឈមមុខនឹងគ្រោះថ្នាក់ធ្ងន់ធ្ងរបណ្ដាលមកពីការឆ្លងរីករាលដាលជំងឺកូវីដ-១៩ ជាកត្តារារាំងដល់កិច្ចប្រតិបត្តិការប្រយុទ្ធប្រឆាំងគ្រឿងញៀននៅក្នុងប្រទេស។
លោកបានគូសបញ្ជាក់ថា បញ្ហានេះបានបង្កឱ្យមានផលវិបាកមួយចំនួនដូចជា ការធ្លាក់ចុះកិច្ចសហប្រតិបត្តិការបង្ក្រាបក្នុងតំបន់ និងការធ្លាក់ចុះតម្លៃគ្រឿងញៀន ដែលធ្វើឱ្យក្រុមឧក្រិដ្ឋជនមានឱកាសបង្កើនការផលិត និងអំណោយផលទីផ្សារប្រើប្រាស់គ្រឿងញៀន។
តែយ៉ាងណា លោកថា សម្រាប់ឆមាសទី១ឆ្នាំនេះ សមត្ថកិច្ចបង្ក្រាបបទល្មើសគ្រឿងញៀនបានជាង៣ ០០០ករណី (៣ ២៥៨ករណី) ឃាត់ខ្លួនជនសង្ស័យបានជាង៧ ០០០នាក់ (៧ ២៥៩នាក់) រឹបអូសគ្រឿងញៀនសរុបបានជាង៨៥០គីឡូក្រាម ក្នុងនោះមានដូចជា មេតំហ្វេតាមីនក្រាមម្សៅ (ICE) ជាង១៩៣គីឡូក្រាម, មេតំហ្វេតាមីនគ្រាប់ (WY) ៦៨៣,៧៨ក្រាម, អិចស្តាស៊ីជាង១៥២គីឡូក្រាម, កេតាមីនជាង៤៧៨គីឡូក្រាម, ហេរ៉ូអ៊ីនជាង២៥គីឡូក្រាម, កាប់បំផ្លាញកញ្ឆាស្រស់ជាង៤ម៉ឺន៥ពាន់ដើម, សារធាតុគីមីផ្សំជាង១០គីឡូក្រាម៕