កម្មវិធីព្រឹត្តិការណ៍អ៊ីនធឺណិតបើកទូលាយលើកទី៦នាឆ្នាំនេះ នឹងប្រព្រឹត្តទៅនៅលើបណ្ដាញសង្គមហ្វេសប៊ុកនៅថ្ងៃទី២៥ ខែកក្កដា ឆ្នាំ២០២១ ក្រោមប្រធានបទរួម «ទាំងអស់គ្នាដើម្បីការប្រើប្រាស់អ៊ីនធឺណិតកាន់តែប្រសើរ»។
មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) បានចេញសេចក្ដីប្រកាសព័ត៌មានមួយកាលពីសប្តាហ៍មុនថា ព្រឹត្តិការណ៍នេះរៀបចំឡើងដោយមានកិច្ចសហការរួមគ្នាពីក្រុមការងារលើកកម្ពស់សិទ្ធិអ៊ីនធឺណិតចំនួន១១ស្ថាប័ននៅកម្ពុជា។
ប្រភពដដែលបន្តថា ចាប់តាំងពីឆ្នាំ២០១៥ មកព្រឹត្តិការណ៍អ៊ីនធឺណិតបើកទូលាយនេះ ត្រូវបានរៀបចំឡើងជារៀងរាល់ឆ្នាំក្នុងគោលដៅលើកកម្ពស់ប្រសិទ្ធភាពនៃការប្រើប្រាស់ប្រព័ន្ធអ៊ីនធឺណិតនិងបណ្ដាញសង្គមប្រកបដោយសុវត្ថិភាព លើកកម្ពស់យុត្តិធម៌សង្គម សិទ្ធិមនុស្ស សេរីភាព ការបញ្ចេញមតិ និងការអភិវឌ្ឍ ប្រកបដោយចីរភាពនៅកម្ពុជា។
សេចក្តីប្រកាសព័ត៌មានបន្តថា ប្រធានបទសំខាន់ៗដែលនឹងជជែកពិភាក្សានៅក្នុងព្រឹត្តិការណ៍នាពេលខាងមុខនេះ រួមមាន ទស្សនៈពីបទល្មើសបច្ចេកវិទ្យានៅកម្ពុជាឆ្នាំ២០២១ ច្បាប់និងសេរីភាពលើបណ្ដាញអ៊ីនធឺណិត ការរំលោភបំពាន និងការមាក់ងាយនៅលើបណ្ដាញអ៊ីនធឺណិត ស្ថានភាពការតស៊ូលើបណ្ដាញអ៊ីនធឺណិត ដើម្បីដោះស្រាយបញ្ហាសនិ្តសុខឌីជីថល (Digital Security Clinic (Webinar)។
សេចក្ដីប្រកាសព័ត៌មានដដែលបន្ថែមថា៖ «ព្រឹត្តិការណ៍អ៊ីនធឺណិតបើកទូលាយ នឹងមានការផ្សាយផ្ទាល់ពេញមួយថ្ងៃនៅលើទំព័រហ្វេសប៊ុកផ្លូវការរបស់ខ្លួន និងផ្សាយបន្តផ្ទាល់ទៅកាន់ទំព័រហ្វេសប៊ុកផ្លូវការរបស់ស្ថាប័នក្រុមការងាររៀបចំជាច្រើនផ្សេងទៀត។ នៅក្នុងកិច្ចពិភាក្សានីមួយៗមានវាគ្មិនជំនាញដែលមកពីស្ថាប័នផ្សេងៗដែលមានបទពិសោធន៍ទៅលើប្រធានបទថ្មីៗគួរឱ្យចាប់អារម្មណ៍ដែលទាក់ទងនឹងសេរីភាពបញ្ចេញមតិ ការបែងចែកព័ត៌មានពិតឬក៏ព័ត៌មានមិនពិត ឯកជនភាពលើប្រព័ន្ធអ៊ីនធឺណិត ការរំលោភបំពាន ឧក្រិដ្ឋកម្មតាមប្រព័ន្ធអ៊ីនធឺណិត និងការប្រើប្រាស់ប្រព័ន្ធអ៊ីនធឺណិត ប្រកបដោយសុវត្ថិភាព ដើម្បីលើកកម្ពស់យុត្តិធម៌សង្គម ជាដើម»។
នាយកផ្នែកអភិវឌ្ឍន៍ប្រព័ន្ធផ្សព្វផ្សាយរបស់មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ អ្នកស្រី ឆន សុគន្ធា ប្រាប់ វីអូឌី នៅថ្ងៃទី២០ ខែកក្កដានេះថា គោលបំណងនៃការរៀបចំកម្មវិធីព្រឹតិ្តការណ៍អ៊ីនធឺណិតបើកទូលាយនេះ ធ្វើឡើងដើម្បីផ្សព្វផ្យាយទៅកាន់ពលរដ្ឋទាំងអស់ឱ្យមានការយល់ដឹងបន្ថែមទៀត អំពីបញ្ហាសិទ្ធិនិងការប្រើប្រាស់ប្រព័ន្ធអ៊ីនធឺណិតឱ្យបានត្រឹមត្រូវ។
លើសពីនេះ អ្នកស្រីថា កម្មវិធីនេះក៏ផ្សព្វផ្សាយនូវរាល់កង្វល់នានារបស់សង្គមស៊ីវិលនិងសាធារណជនឱ្យបានឮទៅដល់រដ្ឋាភិបាល ដើម្បីចូលរួមគ្នាក្នុងការការពារសិទិ្ធសេរីភាពរបស់អ្នកប្រើប្រាស់ប្រព័ន្ធអ៊ីនធឺណិតតែម្តង។
អ្នកស្រីបន្តថា៖ «វត្ថុបំណងនៃការរៀបចំ Cyber Talk សម្រាប់ឆ្នាំ២០២១នេះ គឺយើងចង់ធ្វើការផ្សព្វផ្សាយពាក់ព័ន្ធនឹងបញ្ហាការប្រើប្រាស់ប្រព័ន្ធអ៊ីនធឺណិត ហើយដើម្បីឱ្យទាំងអស់គ្នាហ្នឹងទទួលបានសិទ្ធិទូលាយក្នុងការប្រើប្រាស់អ៊ីនធឺណិតក្នុងសម័យឌីជីថល»។
អ្នកស្រី គន្ធា ក៏បានបញ្ជាក់ដែរថា មូលហេតុដែលកម្មវិធីព្រឹត្តិការណ៍អ៊ីនធឺណិតបើកទូលាយនៅឆ្នាំ២០២១នេះ ត្រូវធ្វើឡើងតាមប្រព័ន្ធអនឡាញបែបនេះ ដោយសារស្ថានភាពជំងឺកូវីដ-១៩កំពុងរាត្បាតកាន់តែខ្លាំងនៅប្រទេសកម្ពុជា ក៏ដូចជានៅលើពិភពលោកផងដែរ។
ជាមួយគ្នានេះ អ្នកស្រីអំពាវនាវដល់សាធារណជនទាំងអស់ដែលចាប់អារម្មណ៍កម្មវិធីនេះ អាចចូលរួមតាមដានស្តាប់និងទស្សនានៅតាមទំព័រហ្វេសប៊ុកនានាដែលនឹងផ្សាយបន្តផ្ទាល់ ដើម្បីស្វែងយល់កាន់តែច្បាស់នូវបញ្ហាផ្សេងៗដែលកើតឡើងតាមរយៈការប្រើប្រាស់ប្រព័ន្ធអ៊ីនធឺណិតនាពេលបច្ចុប្បន្ននេះបានផងដែរ៕