ពលរដ្ឋប្រកបរបរសេដ្ឋកិច្ចក្រៅប្រព័ន្ធមួយចំនួនត្អូញត្អែរពីបញ្ហាជីវភាពប្រចាំថ្ងៃ ជាពិសេសនៅក្នុងអំឡុងវិបត្តិជំងឺកូវីដ-១៩នេះ ខណៈតម្លៃប្រេងសាំងនៅកម្ពុជាបន្តហក់ឡើងខ្ពស់ជាបន្តបន្ទាប់។
ការត្អូញត្អែរនេះកើតឡើងបន្ទាប់ពីតម្លៃប្រេងឥន្ធនៈលក់រាយនៅតាមស្ថានីយនានា នៅថ្ងៃទី២១ ខែកក្កដា ឆ្នាំ២០២១នេះ មានការកើនឡើង ដោយប្រេងសាំងធម្មតាមានតម្លៃ៤ ១០០រៀលក្នុងមួយលីត្រ ហើយប្រេងសាំងស៊ុបពែមានតម្លៃ៤ ៦០០រៀលក្នុងមួយលីត្រ និងប្រេងម៉ាស៊ូតមានតម្លៃ៣ ៦៥០រៀលក្នុងមួយលីត្រ។
ពលរដ្ឋប្រកបរបររត់រ៉ឺម៉កកង់បីនៅរាជធានីភ្នំពេញមួយរូប លោក ហ៊ុន ចាន់វណ្ណា អាយុ៥៩ឆ្នាំ បានត្អូញត្អែរថា ការឡើងថ្លៃប្រេងសាំងជាបន្តបន្ទាប់នេះ គឺជាបន្ទុកមួយបន្ថែមទៀតលើមុខរបររបស់ខ្លួន។ លោកថា ការឡើងថ្លៃប្រេងឥន្ធនៈនេះ ស្របពេលជំងឺកូវីដ-១៩កំពុងរាតត្បាតកាន់តែខ្លាំង ដែលធ្វើឱ្យប៉ះពាល់ដល់ជីវភាពប្រចាំថ្ងៃជាខ្លាំង។
លោកនិយាយថា៖ «វាប៉ះពាល់ធំ! ទីមួយ យើងរកអត់បានផង សាំងឡើងថ្លៃទៀត អាហ្នឹងកាន់តែបន្ថែមបន្ទុកមួយទៀតហើយ»។
ពលរដ្ឋដដែលស្នើឱ្យរដ្ឋាភិបាលជួយអន្តរាគមន៍លើបញ្ហានេះ ដោយធ្វើយ៉ាងណាអាចឱ្យតម្លៃប្រេងសាំងធ្លាក់ចុះជាងពេលបច្ចុប្បន្ន។
ដោយឡែក អ្នកបើកបររថយន្តឈ្នួលពីស្រុកស្រែអំបិល ខេត្តកោះកុង មកកាន់រាជធានីភ្នំពេញ ដែលមានវ័យ៥១ឆ្នាំ លោក វុទ្ធី មានប្រសាសន៍ថា ដោយសារតម្លៃប្រេងឥន្ធនៈឡើងខ្ពស់ ម៉្យាងមិនសូវមានភ្ញៀវជិះផង បានបង្ខំឱ្យលោកផ្អាកការប្រកបមុខរបរនេះរយៈពេល២ខែមកហើយ។
លោក វុទ្ធី បាននិយាយថា៖ «ដេកព្រួយហ្មងរាល់ថ្ងៃនេះ កូនចៅអីទៅធ្វើការអីមកជុំគ្នានៅផ្ទះអស់ហើយ! ទើបតែឪរត់តាក់ស៊ីហ្នឹង! ឥលូវ ឪហ្នឹងរត់អត់បានទៀត ហើយសាំងឡើងថ្លៃ ដឹកពីរបីនាក់ ទៅអត់រួចទៀត»។
ស្របពេលជាមួយគ្នានេះដែរ កញ្ញា បូ ផាត់ធីម ជាបុគ្គលិកនៅភោជនីយដ្ឋានមួយកន្លែងនៅរាជធានីភ្នំពេញ និងជានិស្សិតដែលកំពុងសិក្សានៅសាកលវិទ្យាល័យជាតិគ្រប់គ្រង បានលើកឡើងថា បញ្ហាកូវីដ-១៩បានជះឥទ្ធិពលអាក្រក់ដល់ជីវភាពរបស់គាត់មួយកម្រិត។ បន្ថែមពីនេះ បញ្ហាសាំងឡើងថ្លៃ ស្របគ្នានឹងការចំណាយប្រចាំថ្ងៃផ្សេងៗទៀត ធ្វើឱ្យការចាយវាយរបស់កញ្ញាកាន់តែត្រូវត្បិតត្បៀតបន្ថែមទៀត។
កញ្ញា បូ ផាត់ធីម បន្តថា៖ «សាំងឥលូវឡើងថ្លៃ! ទីមួយ ផ្ទះរបស់ខ្ញុំវារៀងឆ្ងាយដែរពីស្ទឹងមានជ័យមកវត្តភ្នំ អ៊ីចឹងខ្ញុំក៏ត្រូវការប្រើសាំងរៀងច្រើនដែរ ហើយបើម៉ូតូស៊ីសាំងទៀត អាហ្នឹងវាអស់លុយតាមហ្នឹង។ ហើយមួយទៀត ដូចខ្ញុំនិយាយអ៊ីចឹងថា ខ្ញុំត្បិតត្បៀត ខ្ញុំរស់ដោយខ្លួនឯង មិនពឹងឪពុកម្ដាយ អ៊ីចឹងអាការចាក់សាំងនិងហូបចុក គឺខ្ញុំមានកំណត់ដែរ»។
ឆ្លើយតបចំពោះការត្អូញត្អែររបស់ពលរដ្ឋនេះ អ្នកនាំពាក្យក្រសួងពាណិជ្ជកម្ម លោក ស៊ាង ថៃ មានប្រសាសន៍ប្រាប់ វីអូឌី តាមប្រព័ន្ធតេឡេក្រាមថា រហូតមកដល់ពេលនេះ ប្រេងឥន្ធនៈដែលប្រើប្រាស់នៅក្នុងប្រទេសកម្ពុជាសុទ្ធតែនាំចូលពីបរទេសទាំងអស់ ដូច្នេះតម្លៃលក់រាយប្រេងឥន្ធនៈ គឺអាស្រ័យទាំងស្រុងទៅនឹងថ្លៃប្រេងលើទីផ្សារអន្តរជាតិ។
យ៉ាងណា លោកថា កន្លងទៅ រដ្ឋាភិបាលធ្លាប់ធ្វើការដោះស្រាយបញ្ហាតម្លៃប្រេងឥន្ធនៈនេះ ដើម្បីសម្រួលដល់ការលំបាករបស់ពលរដ្ឋផងដែរ។
លោកបញ្ជាក់ថា៖ «កន្លងទៅ ដើម្បីសម្រួលដល់ការលំបាករបស់ប្រជាពលរដ្ឋ សម្ដេចតេជោនាយករដ្ឋមន្ត្រីបានសម្រេចបញ្ចុះពន្ធចំនួន២សេនដុល្លារក្នុងសាំងមួយលីត្រ ហើយក្រុមហ៊ុនប្រេងក៏ជួយសម្ដេចតេជោ ដោយបញ្ចុះតម្លៃ២សេនដុល្លារក្នុងសាំងមួយលីត្រដូចគ្នាដែរ បានន័យថា ប្រជាពលរដ្ឋទូទាំងប្រទេស ពេលចាក់សាំងមួយលីត្រត្រូវបានទទួលការជួយពីរាជរដ្ឋាភិបាលចំនួន៤សេនដុល្លារ»។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ សង្កេតឃើញថា ប្រជាពលរដ្ឋកំពុងជួបប្រទះវិបត្តិសេដ្ឋកិច្ចដោយសារវិបត្តិកូវីដ-១៩ ដូចជា ការបាត់បង់បា្រក់ចំណូលប្រចាំថ្ងៃ បាត់បង់ការងារ ហើយអាជីវកម្មជាច្រើនត្រូវបានបិទទ្វារ ជាដើម។ ស្របគ្នានេះ លោកថា បញ្ហាឡើងថ្លៃប្រេងឥន្ធនៈកាន់តែខ្ពស់បានបង្កផលប៉ះពាល់ខ្លាំងដល់ប្រជាពលរដ្ឋ ពិសេសអ្នកប្រកបរបរសេដ្ឋកិច្ចក្រៅប្រព័ន្ធនៅលើដងផ្លូវតែម្តង។
លោកមានប្រសាសន៍ថា៖ «ទាក់ទងការឡើងថ្លៃសាំងនេះ វាប៉ះពាល់ទៅដល់ប្រជាពលរដ្ឋធ្ងន់ធ្ងរមែនទែន។ ទីមួយ យើងឃើញថា ពលរដ្ឋកំពុងជួបប្រទះនូវបញ្ហាកូវីដ-១៩ ធ្វើឱ្យគាត់មិនអាចរកអ្វីបាន បាត់ប្រាក់ចំណូល អ្នកខ្លះប្រាក់ចំណូលធ្លាក់ដល់កម្រិតសូន្យហើយ។ ឥលូវសាំងវាឡើងថ្លៃទៀត វារឹតតែធ្វើឱ្យប៉ះពាល់បន្ថែមទៀតទៅលើការប្រកបរបរអាជីវកម្មរបស់ប្រជាពលរដ្ឋខ្មែរតូចតាចទាំងអស់ហ្នឹង ជាពិសេសអ្នករកស៊ីសេដ្ឋកិច្ចក្រៅប្រព័ន្ធ អ្នករត់ម៉ូតូឌុប អ្នករត់រ៉ឺម៉ក អាជីវករទាំងអស់ហ្នឹង គឺគាត់ប្រើសាំងទាំងអស់»។
លោក វន់ ពៅ ផ្ដល់ជាអនុសាសន៍ថា ដើម្បីដោះស្រាយបញ្ហានេះ រដ្ឋាភិបាលគួរពិភាក្សាជាមួយក្រុមហ៊ុនប្រេងឥន្ធនៈទាំងអស់នៅកម្ពុជា តាមរយៈការប្រើប្រាស់យន្តការសម្របសម្រួលឬបន្ធូរបន្ថយផ្នែកណាមួយ ដើម្បីឱ្យតម្លៃប្រេងសាំងអាចធ្លាក់ចុះដូចកាលពីឆ្នាំកន្លងទៅ។
កាលពីអំឡុងខែឧសភា ឆ្នាំ២០២០កន្លងទៅ តម្លៃប្រេងសាំងធម្មតាក្នុងប្រទេសកម្ពុជាបានធ្លាក់ចុះដល់២ ២៥០រៀលក្នុងមួយលីត្រ ហើយប្រេងម៉ាស៊ូតធ្លាក់ចុះដល់តម្លៃ២ ១៥០រៀលតែប៉ុណ្ណោះក្នុងមួយលីត្រ។ ការធ្លាក់ចុះនោះ បន្ទាប់ពីប្រមុខរាជរដ្ឋាភិបាលប្រកាសឱ្យប្រេងសាំងក្នុងប្រទេសបញ្ចុះតម្លៃ ដើម្បីជួយសម្រួលដល់ជីវភាពប្រជាពលរដ្ឋអំឡុងវិបត្តិជំងឺកូវីដ-១៩៕