ប្រមុខរដ្ឋាភិបាលអះអាងថា វ៉ាក់សាំងស៊ីណូហ្វាម (Sinopharm Vaccine) របស់ចិន ចំនួន១លានដូសបន្ថែមទៀតដែលជាការបញ្ជាទិញរបស់រាជរដ្ឋាភិបាល បានដឹកមកដល់កម្ពុជាហើយនៅព្រឹកថ្ងៃព្រហស្បតិ៍នេះ។
ទំព័រហ្វេសប៊ុករបស់លោកនាយករដ្ឋមន្ត្រី ហ៊ុន សែន នៅថ្ងៃទី២២ ខែកក្កដានេះ ឱ្យដឹងថា វ៉ាក់សាំងពិតជាមានសារៈសំខាន់ក្នុងការប្រយុទ្ធប្រឆាំងនឹងការរាតត្បាតជំងឺកូវីដ-១៩ ខណៈរាជរដ្ឋាភិបាលកម្ពុជាបានកំណត់ការចាក់វ៉ាក់សាំងជាផែនការយុទ្ធសាស្ត្រក្នុងការប្រយុទ្ធប្រឆាំងនឹងជំងឺផ្លូវដង្ហើមមួយនេះ។
ទំព័រហ្វេសប៊ុកប្រមុខរដ្ឋាភិបាលបន្តថា៖ «តាមរយៈផែនការយុទ្ធសាស្ត្រនេះ កម្ពុជាបានប្រឹងប្រែងគ្រប់វិធីក្នុងការរកវ៉ាក់សាំងចាក់ជូនប្រជាពលរដ្ឋ។ ហើយមកដល់ពេលនេះ កម្ពុជាទទួលបានវ៉ាក់សាំងសរុបជាង១៦លានដូសហើយ។ នៅក្នុងខែសីហាខាងមុខនេះ វ៉ាក់សាំង៤លានដូសទៀតក៏នឹងដឹកពីចិនមកដល់កម្ពុជាផងដែរ»។
លោក ហ៊ុន សែន អះអាងថា វ៉ាក់សាំងដែលកម្ពុជាទទួលបានជាបន្តបន្ទាប់នេះជាការសម្រេចផែនការរបស់កម្ពុជាក្នុងការរកវ៉ាក់សាំងឱ្យបានចំនួន២០លានដូស ដើម្បីចាក់ជូនប្រជាពលរដ្ឋប្រមាណ១០លាននាក់តាមការគ្រោងទុក។
គិតត្រឹមថ្ងៃទី២០ ខែកក្កដា ឆ្នាំ២០២១នេះ កម្ពុជាសម្រេចបាននូវការចាក់វ៉ាក់សាំងជូនប្រជាពលរដ្ឋជាង៦លាននាក់រួចហើយ ដែលស្មើជាង៦៣ភាគរយ (៦៣,៣៤%) ធៀបនឹងពលរដ្ឋគោលដៅចំនួន១០លាននាក់។
ដោយឡែក គិតត្រឹមព្រឹកថ្ងៃទី២២ ខែកក្កដានេះវិញ កម្ពុជារកឃើញអ្នកឆ្លងជំងឺកូវីដ-១៩ សរុបចំនួន៧០ ៤១៩នាក់ ក្នុងនោះ អ្នកជំងឺដែលព្យាបាលជាសះស្បើយមានចំនួន៦២ ៥៧៧នាក់ និងស្លាប់ចំនួន១១៨៨នាក់៕