អគ្គនាយកអង្គការសុខភាពពិភពលោក (WHO) បានព្រមានថា ពិភពលោកអាចនឹងមានវីរុសកូវីដ-១៩បំប្លែងថ្មីដែលឆ្លងសាហាវជាងប្រភេទវីរុស Delta ឬ Alpha ដែលកំពុងឆ្លងក្នុងពេលបច្ចុប្បន្ននេះទៅទៀត។
លោក ថេដ្រូស អាដាណម អគ្គនាយកអង្គការសុខភាពពិភពលោក (WHO) បានលើកឡើងនៅក្នុងបណ្តាញសង្គមធ្វីតធឺ (Twitter) របស់លោក កាលពីថ្ងៃទី២១ ខែកក្កដា ឆ្នាំ២០២១នេះថា នៅពេលខាងមុខ ពិភពលោកនឹងអាចមើលឃើញវីរុសកូវីដ-១៩បំប្លែងថ្មី ដែលកាចសហាវជាងវីរុស Delta ឬ Alpha ដែលកំពុងរាតត្បាតនិងសម្លាប់មនុស្សជាច្រើនរៀងរាល់ថ្ងៃនេះទៅទៀត។
លោកបន្តថា៖ «ហើយនៅពេលដែលមានវីរុសបំប្លែងខ្លួនថ្មីកាន់តែច្រើនហើយកាន់តែសាហាវ នោះកម្លាំងវ៉ាក់សាំងកាន់តែទន់ខ្សោយក្នុងការការពារចំពោះវីរុសបំប្លែងថ្មីៗនោះ ហើយវានឹងធ្វើឱ្យសកលលោកយើងដើរទៅរកផ្លូវទ័លនិងផ្លូវងងឹត»។
សារព័ត៌មាន CNA បានរាយការណ៍នៅថ្ងៃព្រហស្បតិ៍នេះថា មកដល់ពេលនេះ អង្គការ WHO បានបញ្ជាក់ថា វីរុសបំប្លែងថ្មី Delta នឹងក្លាយជាវីរុសរាតត្បាតពាសពេញពិភពលោកនៅប៉ុន្មានខែទៀតប៉ុណ្ណោះ។ ដោយឡែក វីរុសបំប្លែងខ្លួនថ្មីចំនួន៣ទៀត គឺ Alpha (ដែលមានប្រភពដើមនៅអង់គ្លេស) ត្រូវបានបានរកឃើញនៅ១៨០ប្រទេស-ដែនដី ខណៈវីរុសបំប្លែងថ្មី Beta (ដែលមានប្រភពដើមនៅអាហ្វ្រិកខាងត្បូង) ត្រូវបានរកឃើញនៅ១៣០ប្រទេស-ដែនដី និងវីរុសប្រភេទ Gamma (ដែលមានប្រភពដើមនៅប្រេស៊ីល) ត្រូវបានរកឃើញនៅ៧៨ប្រទេស-ដែនដី។ នេះបើតាមការចេញផ្សាយព័ត៌មាន CNA នាព្រឹកថ្ងៃព្រហស្បតិ៍ ទី២២ ខែកក្កដា ឆ្នាំ២០២១៕