ក្រសួងសុខាភិបាល ឱ្យដឹងថា សាច់ក្របីបង្កកដែលនាំចូលពីប្រទេសឥណ្ឌាចំនួន៣កុងតឺន័រ នៅទីលានផែស្ងួតត្រីកូដ ដ្រាយផត គឺពិតជាមានផ្ទុកវីរុសកូវីដ-១៩ (SARS-CoV-2)។
កាលពីថ្ងៃទី១៩ ខែមិថុនា ឆ្នាំ២០២១ រដ្ឋាភិបាលកម្ពុជាបានសម្រេចឱ្យប្រទេសឥណ្ឌានាំចូលសាច់បង្កកនិងមុខទំនិញបង្កកគ្រប់ប្រភេទឡើងវិញ បន្ទាប់ពីស្ថានភាពនៃការឆ្លងរាលដាលជំងឺកូវីដ-១៩នៅប្រទេសឥណ្ឌាធូរស្រាល និងក្រោយពីកម្ពុជាសម្រេចផ្អាកការនាំចូលសាច់បង្កកពីឥណ្ឌាជិត២ខែ។
ក្នុងសេចក្ដីប្រកាសព័ត៌មានរបស់ក្រសួងសុខាភិបាល ចុះថ្ងៃទី១៩ ខែកក្កដា ឆ្នាំ២០២១ ដែលទើបផ្សព្វផ្សាយនៅថ្ងៃនេះ ឱ្យដឹងថា ក្នុងចំណោមសាច់ក្របីបង្កកចំនួន៥កុងតឺន័រដែលនាំចូលពីប្រទេសឥណ្ឌា ក្រសួងបានយកទៅធ្វើតេស្តកាលពីថ្ងៃទី១៧ ខែកក្កដា ឆ្នាំ២០២១ ជាលទ្ធផល សាច់ក្របីបង្កកចំនួន៣កុងតឺន័រមានផ្ទុកវីរុសកូវីដ-១៩។
ក្រសួងបញ្ជាក់ថា សាច់ក្របីបង្កកទាំងនោះនាំចូលពីប្រទេសឥណ្ឌាដោយក្រុមហ៊ុន «បូវីនីហ៊្វូត ឯ. ក» និងក្រុមហ៊ុន «អើស្ដារី អ៊ិនវេសម៉ិន & ខនស្រ្តាក់សិន ឯ.ក»។
ចំណែកលិខិតដាច់ដោយឡែកមួយទៀតរបស់អគ្គនាយកដ្ឋានគយនិងរដ្ឋាករកម្ពុជា ចុះថ្ងៃទី២១ ខែកក្កដា ឆ្នាំ២០២១ ឱ្យដឹងថា សាច់ក្របីបង្កកទាំង៣កុងតឺន័រដែលរកឃើញមានវីរុសកូវីដ-១៩នេះ ត្រូវដុតកម្ទេចចោលនៅថ្ងៃទី២៧ ខែកក្កដា ឆ្នាំ២០២១នេះ នៅស្រុកឱរ៉ាល់ ខេត្តកំពង់ស្ពឺ។
អគ្គនាយកបច្ចេកទេសនៃក្រសួងសុខាភិបាល លោក ហុក គឹមចេង ដែលធ្វើកិច្ចការនេះ សុំមិនធ្វើអត្ថាធិប្បាយ ដោយបង្វែរសំណួរឱ្យសួរអ្នកនាំពាក្យក្រសួងសុខាភិបាលវិញ។
លោកថា៖ «ខ្ញុំសុំទោស! ភារកិច្ចហ្នឹងជូនទៅអ្នកនាំពាក្យក្រសួង ថ្នាក់ដឹកនាំ! ខ្ញុំមមាញឹកក្នុងការងារនេះ អត់បានផ្ដោតទៅលើការឆ្លើយទេ»។
វីអូឌី មិនអាចសុំការអត្ថាធិប្បាយបន្ថែមពីអ្នកនាំពាក្យក្រសួងសុខាភិបាល លោកស្រី ឱ វណ្ណឌីន និងអគ្គនាយកនៃអគ្គនាយកដ្ឋានគយនិងរដ្ឋាករកម្ពុជា លោក គុណ ញឹម ក៏មិនអាចសុំការបំភ្លឺបន្ថែមបានដែរ ដោយទូរសព្ទចូលគ្មានអ្នកទទួល។
អភិបាលខេត្តកំពង់ស្ពឺ លោក វ៉ី សំណាង សុំមិនបកស្រាយលើបញ្ហានេះឡើយ ដោយបង្វែរសំណួរឱ្យទៅសួរក្រសួងពាណិជ្ជកម្ម និងក្រសួងកសិកម្ម ដោយថា អាជ្ញាធរខេត្តមានភារកិច្ចត្រឹមតែដុតកម្ទេចតែប៉ុណ្ណោះ។
យ៉ាងណាក៏ដោយ ប្រធានសមាគមគ្រូពេទ្យគុណធម៌កម្ពុជា លោកវេជ្ជបណ្ឌិត អ៊ួច វុទ្ធី ជំរុញឱ្យក្រសួងពាក់ព័ន្ធត្រូវបំភ្លឺដល់ប្រជាពលរដ្ឋឱ្យច្បាស់លាស់ជុំវិញករណីនេះ ដើម្បីបញ្ចៀសហានិភ័យផ្សេងៗដែលអាចនឹងអាចកើតមានឡើង។
លោកថា៖ «អ៊ីចឹងហើយគួរណាតែក្រសួងដែលពាក់ព័ន្ធទាំអស់ហ្នឹង ដូចជា ក្រសួងឧស្សាហកម្ម ក្រសួងកសិកម្ម ក្រសួងសុខាភិបាល ពាក់ព័ន្ធច្រើនណាស់ បីបួនក្រសួងហ្នឹង! ដើម្បីចាត់វិធានការដើម្បីយកសាច់ហ្នឹងទៅបំផ្លាញចោលឬយ៉ាងម៉េច ព្រោះអានេះវាប្រសិនបើមកអ៊ីចឹងហើយ យើងពិនិត្យទៅឃើញមានវីរុសនិងបង្កប់ខ្លួននៅក្នុងហ្នឹង អាហ្នឹងវាហានិភ័យដល់ប្រជាពលរដ្ឋយើងទៅថ្ងៃក្រោយ»។
ស្ថានទូតឥណ្ឌាប្រចាំនៅប្រទេសកម្ពុជា នៅថ្ងៃនេះ ក៏បានបង្ហាញការមិនអស់ចិត្តចំពោះការរកឃើញវីរុសកូវីដ-១៩ នៅលើសាច់ក្របីដែលនាំចូលពីប្រទេសឥណ្ឌាមកកម្ពុជានេះ ដោយស្នើឱ្យមានការធ្វើតេស្តម្តងទៀត។
ស្ថានទូតឥណ្ឌាបានអះអាងថា សាច់ក្របីនេះត្រូវបានត្រួតពិនិត្យពីមន្ទីរពិសោធន៍ឥណ្ឌាស្របតាមស្ដង់ដារ ISO ត្រឹមត្រូវ មុននឹងនាំចូលមកប្រទេសកម្ពុជា។ ហើយមួយវិញទៀត សាច់ក្របីនេះនាំចេញមកតាមផ្លូវទឹកតាំងពីខែមេសា មកដល់កម្ពុជា នៅខែកក្កដា ដែលគ្មានភស្ដុតាងវិទ្យាសាស្ត្រណាមួយបង្ហាញថា វីរុសកូវីដ-១៩អាចរស់បានលើសម្ភារវេចខ្ចប់អាហារនិងចំណីអាហារក្នុងរយៈពេលជិត៣ខែនោះទេ។
កាលពីថ្ងៃទី១៩ ខែមិថុនា ឆ្នាំ២០២១ អគ្គនាយកដ្ឋានគយ និងរដ្ឋាករកម្ពុជា ចេញលិខិតមួយដោយលើកលែងបម្រាមលើការនាំចូលសាច់បង្កកនិងមុខទំនិញបង្កកគ្រប់ប្រភេទ ដោយដាក់មកជំនួសវិញនូវវិធានការបណ្តោះអាសន្ន ក្នុងនោះ តម្រូវឱ្យអាជ្ញាធរមានសមត្ថកិច្ចនៃប្រទេសដើមកំណើតទំនិញចេញវិញ្ញាបនបត្រឬលិខិតបញ្ជាក់បន្ថែមថា «គ្មានវីរុសកូវីដ-១៩លើសាច់បង្កក»។
លើសពីនេះទៀត រាល់ពេលដែលទំនិញមកដល់នោះ តម្រូវឱ្យយកសំណាកធ្វើតេស្តរកវីរុសកូវីដ-១៩ដោយវិទ្យាស្ថានប៉ាស្ទ័រកម្ពុជា មុននឹងអនុញ្ញាតឱ្យបំពេញបែបបទបញ្ចេញទំនិញពីគយ។
ការសម្រេចអនុញ្ញាតនេះ ធ្វើឡើងបន្ទាប់ពីឯកអគ្គរដ្ឋទូតឥណ្ឌាប្រចាំកម្ពុជា កាលពីថ្ងៃទី៣ ខែមិថុនា បានស្នើឱ្យកម្ពុជាដកចេញនូវបម្រាមលើការនាំចូលសាច់បង្កក និងទំនិញបង្កកផ្សេងៗទៀតពីប្រទេសឥណ្ឌា។
បើតាមស្ថានទូតឥណ្ឌាប្រចាំកម្ពុជា បង្ហាញរបាយការណ៍ថា ឥណ្ឌាជាទីផ្សារដ៏ធំមួយសម្រាប់ផ្គត់ផ្គង់សាច់ក្របីនិងអាហារនានា ខណៈកម្ពុជាក៏បាននាំចូលសាច់ក្របីពីប្រទេសឥណ្ឌាក្នុងតម្លៃជាង១៧លានដុល្លារ (១៧,៧) កាលពីឆ្នាំ២០២០ ហើយចំនួនបានកើនឡើងជាង៦លានដុល្លារ (៦,៤) បើប្រៀបធៀបនឹងឆ្នាំ២០១៩៕