វ៉ាក់សាំងការពារជំងឺកូវីដ-១៩ ប្រភេទ Johnson & Johnson ពាក់កណ្តាលនៃចំនួនសរុបជាង១លានដូសដែលជាអំណោយរបស់សហរដ្ឋអាមេរិក បានមកដល់ប្រទេសកម្ពុជាហើយ នៅព្រឹកថ្ងៃសុក្រនេះ។
យោងតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំនៅកម្ពុជា ឱ្យដឹងថា អំណោយជាវ៉ាក់សាំងរបស់សហរដ្ឋអាមេរិក តាមរយៈយន្តការកូវ៉ាក់ (COVAX) នេះ ជាផ្នែកមួយនៃការគាំទ្រជាបន្តបន្ទាប់របស់សហរដ្ឋអាមេរិកចំពោះប្រជាជនកម្ពុជានិងនៅក្នុងតំបន់ ក្នុងពេលដែលពិភពលោកកំពុងប្រឹងប្រែងងើបចេញពីជំងឺរាតត្បាតដ៏ធ្ងន់ធ្ងរមួយនេះ។
បើតាមស្ថានទូតមួយនេះ វ៉ាក់សាំងចំនួនពាក់កណ្តាលទៀត រំពឹងថា នឹងមកដល់កម្ពុជានៅថ្ងៃទី០២ ខែសីហា ឆ្នាំ២០២១ ខាងមុខ។
Johnson & Johnson ជាប្រភេទវ៉ាក់សាំងដែលចាក់តែមួយដូសទេ ដើម្បីបង្ការជំងឺកូវីដ-១៩ ហើយក្រុមអ្នកស្រាវជ្រាវនៅមហាវិទ្យាល័យពេទ្យ Grossman នៃសាកលវិទ្យាល័យ New York បានលើកឡើងកាលពីពេលថ្មីៗថា វ៉ាក់សាំង Johnson & Johnson អាចមានប្រសិទ្ធភាពតិចប្រឆាំងនឹងវីរុសកូវីដ-១៩បំប្លែងថ្មី ដែលតា (Delta)។
កម្ពុជាបានសម្រុកចាក់វ៉ាក់សាំងបង្ការជំងឺកូវីដ-១៩ដល់ពលរដ្ឋរបស់ខ្លួន រហូតមកដល់ពេលនេះបានជាង៧លាននាក់ហើយ ឬស្មើប្រមាណជាង ៧០% នៃគោលដៅចាក់ជូនពលរដ្ឋឱ្យបានយ៉ាងតិច១០លាននាក់៕
