ក្រុមប្រជាពលរដ្ឋដែលប្រកបរបរម៉ាស្សាត្អូញត្អែរពីផលលំបាកក្នុងការរកការងារថ្មី អំឡុងពេលកម្ពុជាកំពុងជួបវិបត្តិកូវីដ-១៩ និងក្រោយពីប្រមុខរដ្ឋាភិបាលស្នើឱ្យពួកគេរកអាជីពផ្សេងក្រៅពីនេះ។
ក្នុងពិធីបើកយុទ្ធនាការចាក់វ៉ាក់សាំងដល់កុមារអាយុចាប់ពី១២ទៅ១៨ឆ្នាំ កាលពីថ្ងៃទី១ ខែសីហា ឆ្នាំ២០២១ ម្សិលមិញនេះ លោកនាយករដ្ឋមន្ត្រី ហ៊ុន សែន បានប្រាប់ដល់ពលរដ្ឋត្រូវរៀនរស់នៅជាមួយនឹងកូវីដ-១៩ ដោយលោកជឿថា ជំងឺនេះនឹងមិនចប់នោះទេ។
ជាមួយគ្នានោះដែរ លោកនាយករដ្ឋមន្ត្រីក៏បានប្រាប់ទៅអ្នកដែលប្រកបរបរឬកំពុងរៀនដើម្បីចាប់យកអាជីពជាអ្នកម៉ាស្សានេះ គួរស្វែងរកមុខរបរថ្មីផងដែរ។
លោកបានថ្លែងថា៖ «អ្នកធ្លាប់ប្រកបរបរម៉ាស្សាឬអ្នកកំពុងរៀនពីអាជីពជាអ្នកម៉ាស្សា ប្រហែលត្រូវផ្លាស់ប្តូរមុខរបរហើយ ព្រោះក្នុងដំណាក់កាលនេះនិងតទៅមុខ គ្មានអ្នកណាគេទៅរកសេវាហ្នឹងទៀតទេ ព្រោះគេខ្លាចកូវីដ-១៩ដូចតែគ្នា»។
ពាក់ព័ន្ធនឹងការលើកឡើងនេះ លោក គឹម ឌួន ជាមេការនិងជាបុគ្គលិកនៅហាងម៉ាស្សាមួយឈ្មោះ «សម្ផស្សម៉ាស្សា» ស្ថិតនៅក្រុងសៀមរាប ខេត្តសៀមរាប បាននិយាយថា បើសិនជាឈប់ពីមុខរបរផ្នែកម៉ាស្សា លោកមិនដឹងថាគួរទៅរកការងារអ្វីផ្សេងនោះទេ ព្រោះពុំមានចំណេះដឹង។
លោកថា៖ «បើគ្មានភ្ញៀវ មានតែបិទហាង! មិនដឹងថាគួរទៅរកការងារអីនោះទេ ព្រោះមិនមានចំណេះដឹង។ បុគ្គលិកម៉ាស្សា គ្នាល្ងង់ ទើបចាប់យកអាជីពហ្នឹង ធ្វើការងារធំមិនកើតទេ»។
បុរសដែលមានកូន៤នាក់ក្នុងបន្ទុករូបនេះ បន្តថា បើសិនជាបាត់បង់ការងារនេះ លោកអាចនឹងទៅធ្វើជាកម្មករសំណង់វិញ ដើម្បីស្វែងរកប្រាក់សម្រាប់ផ្គត់ផ្គង់គ្រួសារនិងសងបំណុលធនាគារ ខណៈបច្ចុប្បន្ន ហាងម៉ាស្សាមួយនេះស្ទើរតែពុំមានភ្ញៀវចូលម៉ាស្សាសោះតែម្តង។
លោកបន្ថែមថា កាលពីមុន ហាងមួយនេះអាចមានភ្ញៀវចន្លោះពី១០នាក់ទៅ២០នាក់ក្នុងមួយថ្ងៃ តែក្រោយពីផ្ទុះឡើងនូវជំងឺកូវីដ-១៩ ភ្ញៀវបានធ្លាក់ចុះត្រឹមម្នាក់ក្នុងមួយថ្ងៃ ហើយថ្ងៃខ្លះមិនមានតែម្តង។
ទោះយ៉ាងណា លោក គឹម ឌួន ស្នើថា៖ «បើរដ្ឋាភិបាលជួយ ខ្ញុំមិនចង់ឱ្យជួយជាលុយទេ ព្រោះលុយឆាប់ចាយអស់។ តែបើផ្តល់ជាឱកាសការងារ ទើបអាចជួយបានយូរ»។
ចំណែកអ្នកស្រី វឿន ផល ដែលជាបុគ្គលិកម៉ាស្សាមួយរូបទៀតនៅក្រុងសៀមរាបដែរនោះ បានលើកឡើងស្រដៀងគ្នាដែរថា ចាប់តាំងពីកម្ពុជាមានករណីជំងឺកូវីដ-១៩ ឆ្លងចូលក្នុងសហគមន៍មក បានធ្វើឱ្យជីវភាពរបស់អ្នកស្រីធ្លាក់ចុះដុនដាបខ្លាំង។ អ្នកស្រីបន្តថា រូបគាត់ក៏មិនដឹងជាត្រូវរកអាជីពណាផ្សេងក្រៅពីនេះដែរ ដោយសារតែពុំមានចំណេះដឹងជ្រៅជ្រះដូចអ្នកផ្សេង។
អ្នកស្រីបន្ត៖ «បើគ្មានការងារម៉ាស្សា ខ្ញុំមិនដឹងជារកការងារអី ព្រោះគ្មានចំណេះ មិនចេះអក្សរ។ បើរដ្ឋាភិបាលជួយ ខ្ញុំចង់ឱ្យរដ្ឋជួយជាស្បៀងអាហារ»។
វីអូឌី មិនអាចសុំការបញ្ជាក់បន្ថែមជុំវិញករណីនេះពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានទេ នៅថ្ងៃនេះ។
ប្រធានសហភាពសហជីពកម្មករ ចំណីអាហារ និងសេវាកម្មកម្ពុជា អ្នកស្រី អ៊ូ ទេពផល្លីន យល់ថា រដ្ឋាភិបាលមិនគួរត្រឹមតែប្រាប់អ្នកប្រកបមុខរបរនេះឱ្យផ្លាស់ប្តូរការងារនោះទេ តែគួរផ្តល់ជាទុនទំនុកបម្រុងដល់ពួកគេ ព្រោះពួកគាត់ពុំមានចំណេះដឹងដែលអាចរកការងារផ្សេងបានដោយស្រួលឡើយ ខណៈអ្នកដែលមានជំនាញខាងម៉ាស្សាខ្លះមានវ័យចំណាស់ទៅហើយ។
អ្នកស្រីបន្តថា៖ «បុគ្គលិកម៉ាស្សាក្នុងបរិបទកូវីដ-១៩នេះ ប្រឈមនឹងភាពអត់ឃ្លាន គ្មានការងារធ្វើ ជំពាក់បំណុលធនាគារ និងគ្មានលុយព្យាបាលពេលមានឈឺថ្កាត់។ ហើយការប៉ះពាល់ មិនត្រឹមតែលើអ្នកប្រកបរបរនេះផ្ទាល់ទេ តែប៉ះពាល់ដល់កូនៗរបស់គេ ដូចជា គ្មានអាហារហូបចុក និងមិនបានទៅសាលារៀន ជាដើម»៕