សមត្ថកិច្ចរាជធានីភ្នំពេញ អះអាងថា ចាប់ពីយប់ថ្ងៃទី០៣ ខែសីហានេះទៅ អាជ្ញាធរនឹងអនុវត្តវិធានការក្តៅចំពោះអ្នកល្មើសបម្រាមគោចររបស់រដ្ឋបាលរាជធានីភ្នំពេញ ចាប់ពីម៉ោង៩យប់ ដល់ម៉ោង៣ទៀបភ្លឺ។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោកវរសេនីយ៍ឯក សាន សុខសីហា មានប្រសាសន៍ថា ក្នុងរយៈពេល៤ថ្ងៃកន្លងមកនេះ អាជ្ញាធរមិនបានឃាត់ខ្លួនជនល្មើសបញ្ជូនទៅតុលាការឬឃុំខ្លួននោះឡើយ ដោយអាជ្ញាធរប្រើវិធានការស្រាលៗសិន។
ក៏ប៉ុន្តែចាប់ពីយប់ថ្ងៃទី៣ ខែសីហានេះតទៅ លោកថា គណៈអភិបាលរាជធានីភ្នំពេញនឹងចាត់វិធានការតឹងរ៉ឹងខ្លាំង អាចនឹងមានការឃាត់ខ្លួនមនុស្ស និងមានការផាកពិន័យធ្ងន់ធ្ងរ ឬក៏អាចមានវិធានការច្បាប់ ប្រសិនបើគាត់នៅតែល្មើសនូវបម្រាមគោចរនេះ។
លោកបន្តថា ចំពោះហាងឬទីតាំងអាជីវកម្មនានាដែលមិនព្រមអនុវត្តឬគោរពតាមវិធានការរដ្ឋបាលរាជធានីភ្នំពេញទេ នោះអាជ្ញាធរនឹងចុះបិទទីតាំងហាងឬក៏អាចឈានដល់មានការដកអាជ្ញាបណ្ណហាងនោះតែម្តង ឬក៏អាចអនុវត្តទៅតាមនីតិវិធីច្បាប់។
គួរជម្រាបជូនថា ក្នុងរយៈពេល៤ថ្ងៃនៃការអនុវត្តបម្រាមគោចរចាប់ពីថ្ងៃទី២៩ ខែកក្កដា ដល់ថ្ងៃទី២ ខែសីហា អាជ្ញាធររាជធានីភ្នំពេញ បានឃាត់យានយន្តសរុបចំនួន១ ០៥៣គ្រឿង ក្នុងនោះ រថយន្តចំនួន៣០៧គ្រឿង បានធ្វើការផាកពិន័យរួចរាល់ ខណៈយានយន្តចំនួន២៦៣គ្រឿង ត្រូវបានបញ្ជូនទៅរក្សាទុកនៅក្នុងខណ្ឌរៀងៗខ្លួន។
បើតាមលោក សាន សុខសីហា ចំពោះការផាកពិន័យយានយន្តដែលមិនគោរពបម្រាមគោចរនាពេលកន្លងមក គឺម៉ូតូផាកចំនួន២០ម៉ឺនរៀល ខណៈរថយន្តត្រូវផាកចំនួន១លានរៀល៕