អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (CMAC) លោក ហេង រតនា បានអះអាងថា សុនខ៣ក្បាលមានសមត្ថភាពអាចហិតក្លិនរកឃើញអ្នកវិជ្ជមានជំងឺកូវីដ-១៩បាន ខណៈសុនខ៧ក្បាលទៀតកំពុងមានវឌ្ឍនភាពគួរឱ្យកត់សម្គាល់។
ការអះអាងរបស់លោក ហេង រតនា បានធ្វើឡើងបន្ទាប់ពីលោកបានចុះទៅត្រួតពិនិត្យនិងវាយតម្លៃផ្ទាល់លើការងារសិក្សាស្រាវជ្រាវ និងអភិវឌ្ឍន៍បច្ចេកទេសសុនខហិតរកអ្នកផ្ទុកវីរុសកូវីដ-១៩ នៅវិទ្យាស្ថានបច្ចេកទេសសកម្មភាពកម្ចាត់មីន (ស៊ីម៉ាក់) ខេត្តកំពង់ឆ្នាំង កាលពីថ្ងៃទី០២ ខែសីហា ម្សិលមិញនេះ។
លោកបានឱ្យដឹងថា ក្រោយពីបានទទួលសំណាកក្លិន (VOC) អ្នកជំងឺកូវីដ-១៩ ចំនួន៤៨សំណាក ពីក្រុមការងារបច្ចេកទេសនៃសាកលវិទ្យាល័យវិទ្យាសាស្ត្រសុខាភិបាលមក សុនខក្រុមទី១ ចំនួន៣ក្បាល មានសមត្ថភាពអាចហិតរកឃើញក្លិនសំណាកនៃអ្នកជំងឺកូវីដ-១៩ ប្រកបដោយជោគជ័យក្នុងដំណាក់កាលហ្វឹកហ្វឺនស្រាវជ្រាវបឋម។ រីឯសុនខក្រុមទី២ ចំនួន៧ក្បាលទៀត កំពុងមានវឌ្ឍនភាពគួរឱ្យកត់សម្គាល់។
លោកបន្តថា សំណាកទាំង៤៨ បានឆ្លងកាត់ការត្រួតពិនិត្យ PCR និងការបណ្តុះមេរោគ (cell culture) ដើម្បីធានាសុវត្ថិភាពសំណាកក្នុងការបម្រើឱ្យការងារហ្វឹកហ្វឺននេះ។
លោក ហេង រតនា បន្តទៀតថា ជាលក្ខណ:បច្ចេកទេស សុនខអាចហិតរកឃើញក្លិនសំណាកក្នុងរយ:ពេលប្រមាណតែ១០ទៅ១៥វិនាទីប៉ុណ្ណោះ។ លោកបញ្ជាក់បន្ថែមថា សុនខទាំងនេះកើតនៅកម្ពុជា និងបានបង្វឹកដោយគ្រូជំនាញសុនខកម្ពុជា។
យ៉ាងណាក្តី លោក ហេង រតនា នៅមិនទាន់បញ្ជាក់ថា តើនឹងត្រូវប្រើប្រាស់សុនខទាំងនេះឱ្យធ្វើប្រតិបត្តិការហិតក្លិនរកអ្នកផ្ទុកជំងឺកូវីដ-១៩នេះជាផ្លូវការនៅពេលណានៅឡើយទេ។ ប៉ុន្តែលោកបានបញ្ជាក់ថា ការប្រើប្រាស់សុនខហិតរកអ្នកផ្ទុកវីរុសកូវីដ-១៩ មានប្រសិទ្ធភាពសម្រាប់ហ្វូងមនុស្សប្រមូលផ្តុំច្រើន ដូចជា នៅព្រលានយន្តហោះ ច្រកទ្វារអន្តរជាតិ និងពហុកីឡដ្ឋាន ជាដើម។
ក្រុមការងារស៊ីម៉ាក់ បានបង្ហាញមោទកភាពចំពោះលទ្ធផលនៃការសិក្សាស្រាវជ្រាវនេះ និងមានក្តីសង្ឃឹមថាអាចឆ្លើយតបតាមការរំពឹងទុក។ ជាងនេះទៅទៀត ផ្អែកតាមអ្នកជំនាញបានឱ្យដឹងថា នៅមិនទាន់មានភស្តុតាងផ្លូវការណាមួយបញ្ជាក់ថា មានការឆ្លងវីរុសកូវីដ-១៩ ពីមនុស្សទៅសុនខឡើយទេ៕