អ្នកជំនាញផ្នែកសុខភាពផ្លូវចិត្ត បានឱ្យដឹងថា ក្នុងស្ថានភាពនៃការផ្ទុះរីករាលដាលជំងឺកូវីដ-១៩ ពលរដ្ឋកម្ពុជាកាន់តែច្រើនបានជួបប្រទះនូវវិបត្តិផ្លូវចិត្ត ហើយវិបត្តិនេះមានការកើនឡើងគួរឱ្យព្រួយបារម្ភ។
អ្នកជំនាញប្រឹក្សាយោបល់ផ្នែកសុខភាពផ្លូវចិត្តរបស់អង្គការចិត្តសង្គម អន្តរវប្បធម៌ ហៅកាត់ថា TPO អ្នកស្រី ស៊ុន សូលីដា ប្រាប់ វីអូឌី នៅថ្ងៃទី៣ ខែសីហា ឆ្នាំ២០២១នេះថា វិបត្តិផ្លូវចិត្តរបស់ប្រជាជនកម្ពុជាពិតជាមានការកើនឡើងគួរឱ្យកត់សម្គាល់ប្រាកដមែន ដោយយោងតាមចំនួនពលរដ្ឋដែលបានមកស្វែងរកជំនួយប្រឹក្សាយោបល់ផ្នែកផ្លូវចិត្តក្នុងបរិបទកូវីដ-១៩នេះ។
អ្នកស្រីបន្តថា ស្ថានភាពកូវីដ-១៩ពីមួយថ្ងៃទៅមួយថ្ងៃកាន់តែតានតឹងទៅៗ ហើយចំនួនអ្នកស្លាប់ចេះតែកើនឡើង រីឯចំនួនអ្នកឆ្លងថ្មីនៅតែជាក្តីបារម្ភនៅឡើយ។
អ្នកជំនាញរូបនេះថា ទោះបីជាមានការយកចិត្តទុកដាក់យ៉ាងណា ប៉ុន្តែបញ្ហាផ្លូវចិត្តរបស់ប្រជាជននៅតែប្រឈម ដូចជាបញ្ហាជំងឺ សម្ពាធក្នុងគ្រួសារ សេដ្ឋកិច្ចប្រចាំថ្ងៃ បន្ទុកនានា រួមទាំងបញ្ហាសមាជិកគ្រួសារច្រើនជាកុមារនិងមនុស្សចាស់ជាដើម។
អ្នកស្រី ស៊ុន សូលីដា៖ «នៅកម្ពុជាមានស្ថាប័នប្រឹក្សាយោបល់ផ្នែកផ្លូវចិត្តទាំងរដ្ឋនិងឯកជន។ បើផ្តោតតែអង្គការ TPO យើងកត់សម្គាល់ឃើញថា ករណីបញ្ហាផ្លូវចិត្តរបស់ប្រជាជនពិតជាមានការកើនឡើងមែន គួរឱ្យកត់សម្គាល់ មិនថាក្រុមជួរមុខ និងពលរដ្ឋទូទៅ សុទ្ធតែមានសម្ពាធផ្លូវចិត្ត។ ក្នុងនោះ ជ្រុងនៃក្រុមជួរមុខដូចជាពេទ្យនិងអ្នកចិត្តសាស្ត្រជាដើម មានបញ្ហាប្រឈមត្រួត ព្រោះត្រូវបារម្ភពីស្ថានភាពខ្លួនឯងនិងគ្រួសារផង ហើយត្រូវពង្រឹងស្មារតីយកចិត្តទុកដាក់លើពលរដ្ឋទូទៅដែលត្រូវការជំនួយផង»។
អ្នកស្រី សូលីដា បន្ថែមថា ភាគច្រើនអ្នកដែលមកសុំការប្រឹក្សាយោបល់ពីស្ថាប័នរបស់អ្នកស្រី គឺជាអ្នកដែលមានសម្ពាធ ខ្វល់ខ្វាយច្រើន បារម្ភពេក និងខ្លះមានបញ្ហាទាក់ទិននឹងការបរិភោគអាហារមិនត្រឹមត្រូវក្នុងស្ថានភាពនេះ។
ក្រៅពីនោះ ករណីមួយចំនួនធំដែលធ្វើឱ្យពលរដ្ឋមានវិបត្តិផ្លូវចិត្តដែរ ដូចជា បញ្ហាបំណុល កត្តាជីវភាព មិនថាអ្នកពាក់ព័ន្ធនឹងកូវីដ-១៩ ដោយផ្ទាល់ឬប្រយោលទេ។ បញ្ហាបាត់បង់ប្រាក់ចំណូលឬបាត់បង់ការងារធ្វើ បញ្ហាឆ្លងជំងឺផ្លូវដង្ហើមមួយនេះ និងបញ្ហាបាត់បង់សមាជិកគ្រួសារដោយសារវីរុសកូវីដ-១៩ ជាដើម។
អ្នកជំនាញរូបនេះអះអាងថា៖ «អ្នកដែលមករកជំនួយគាំទ្រផ្នែកផ្លូវចិត្ត ច្រើនភ័យ ខ្វាយខ្វល់ បារម្ភថា អាចឆ្លងកូវីដ-១៩ ដល់ថ្នាក់គេងមិនលក់។ ភ្ញាក់ពីគេងមកមិនស្រួលខ្លួន អស់កម្លាំង ល្ហិតល្ហៃ ឈឺសាច់ដុំ ហើយពេលខ្លះគាត់បរិភោគអាហារមិនល្អ ឧទាហរណ៍ អាហារផ្អាប់ ទឹកកក ជាដើម ដែលធ្វើឱ្យឈឺក។ ហើយគាត់ដាក់សម្ពាធខ្លួនឯងថា តើខ្លួនមានកូវីដ-១៩ ឬមានជំងឺផ្លូវចិត្តដែរទេ!»
ប្រភពដដែលឱ្យដឹងថា គិតត្រឹម៧ខែដើមឆ្នាំ២០២១នេះ អង្គការ TPO បានទទួលប្រឹក្សាយោបល់ជាមួយអ្នករកសេវាផ្លូវចិត្តមិនតិចជាង២ ០០០ករណីឡើយ។ នេះមិនទាន់រាប់បញ្ចូលករណីប្រឹក្សាយោបល់ក្រៅផ្លូវការមួយចំនួនទៀត។ អ្នកស្រីថា ចំនួនប្រឹក្សាយោបល់រយៈពេល៧ខែដើមឆ្នាំនេះ គឺកើនទ្វេដង បើប្រៀបធៀបទៅនឹងចំនួនដែលបានប្រឹក្សាយោបល់ជូនពលរដ្ឋរយៈពេលដូចគ្នា នៅមុនមានវិបត្តិកូវីដ-១៩ ប៉ុន្តែអ្នកស្រីមិនចាំទិន្នន័យនោះទេ។
រដ្ឋលេខាធិការ និងជាអ្នកនាំពាក្យក្រសួងសុខាភិបាល លោកស្រី ឱ វណ្ណឌីន ទទួលស្គាល់ថា បញ្ហាផ្លូវចិត្តសម្រាប់ប្រជាជនកម្ពុជាក្នុងស្ថានភាពកូវីដ-១៩នេះ ពិតជាកើតមានប្រាកដមែន។
យ៉ាងណា លោកស្រីនៅមិនទាន់មានព័ត៌មានច្បាស់លាស់លើរឿងនេះនៅឡើយទេ ប៉ុន្តែលោកស្រីថា ជាធម្មតា វិបត្តិផ្លូវចិត្តនេះតែងកើតឡើង ព្រោះជាបទពិសោធន៍ ប្រទេសផ្សេងក៏គេសង្កេតឃើញមានបញ្ហាផ្លូវចិត្តក្នុងបរិបទកូវីដ-១៩នេះផងដែរ។ លោកស្រីបញ្ជាក់ដែរថា សម្រាប់ពលរដ្ឋអ្នកមានជំងឺកូវីដ-១៩នេះ គឺមានការប៉ះពាល់ផ្លូវចិត្តច្រើន ខណៈអ្នកមិនទាន់មានជំងឺ ក៏មានបញ្ហាផ្លូវចិត្តមួយចំនួនដែរ ។
អ្នកនាំពាក្យក្រសួងសុខាភិបាលរូបនេះផ្តល់ជាអនុសាសន៍ថា៖ «សំខាន់ណាស់គឺការគាំទ្រពីក្រុមគ្រួសារនិងអ្នកជុំវិញខ្លួន។ ហើយបុគ្គលខ្លួនឯងត្រូវចេះវិធីសាស្ត្ររម្លស់នូវក្តីកង្វល់ដោយរំងាប់បញ្ហាក្នុងខ្លួន និងហាត់ប្រាណដើម្បីសម្រាលបញ្ហា។ បុគ្គលខ្លួនឯងត្រូវប្រយ័ត្នកុំឱ្យធ្លាក់ខ្លួនទៅក្នុងបញ្ហាផ្លូវចិត្តធ្ងន់ធ្ងរ ព្រោះវាធ្វើឱ្យស្ថានភាពជំងឺកាន់តែយ៉ាប់យឺន»៕
ពលរដ្ឋមួយរូបដែលឆ្លងជំងឺកូវីដ-១៩ ហើយកំពុងធ្វើចត្តាឡីស័កនៅស្តាតអូឡាំពិក លោក អន ខេ បានប្រាប់ វីអូឌី នៅថ្ងៃទី៤ ខែសីហានេះថា លោកមានសម្ពាធផ្លូវចិត្តនិងភ័យជាខ្លាំងបន្ទាប់ពីដឹងថាបានឆ្លងជំងឺនេះ។ លោកបន្តថា តាមពិតស្ថានភាពរបស់លោកត្រឹមកម្រិតស្រាលប៉ុណ្ណោះ និងត្រូវអនុញ្ញាតឱ្យចេញពីមណ្ឌលសម្រាកព្យាបាលនៅថ្ងៃនេះក្តី ប៉ុន្តែលោកនៅតែមានការព្រួយបារម្ភនិងភ័យខ្លាច ដោយសារឃើញទិដ្ឋភាពអ្នកផ្សេងទៀតឈានដល់កម្រិតធ្ងន់ធ្ងរ និងឃើញឡានសង្គ្រោះខ្វាត់ខ្វែងនៅជុំវិញខ្លួនលោក។
លើសពីនេះ លោកក៏មានសម្ពាធបន្ថែមទៀតផងដែរដោយសារបញ្ហាជំងឺមួយនេះ ខណៈលោកបានព្យាយាមលាក់រឿងឆ្លងជំងឺកូវីដ-១៩ មិនឱ្យគ្រួសារដឹងឡើយ ព្រោះមិនចង់ឱ្យពួកគេបារម្ភ។
លោក អន ខេ បន្ថែមថា៖ «ខ្ញុំរាងចាលហើយ មិនចង់ឱ្យមានបញ្ហានេះម្តងទៀត។ មានវិជ្ជមានកូវីដ-១៩ មានបញ្ហាដល់ការងារ។ មកទល់ពេលនេះ ម្តាយនិងបងប្អូនខ្ញុំទាំងអស់នៅឯស្រុក មិនដឹងថាខ្ញុំមានកូវីដ-១៩ទេ! មានតែមិត្តភក្តិនិងក្រុមការងារប៉ុណ្ណោះដែលដឹង។ មិនឱ្យគ្រួសារដឹង ដោយសារតែខ្ញុំដឹងថា ម្តាយខ្ញុំគិតច្រើន ចាស់ជរា ហើយសុខភាពទ្រុឌទ្រោម ងាយនឹងពិបាកចិត្ត។ តែខ្ញុំមិនអាចលាក់បាំងរហូតទេ ត្រឹមតែមួយរយៈពេលប៉ុណ្ណោះ»។
អ្នកជំនាញប្រឹក្សាយោបល់ផ្នែកសុខភាពផ្លូវចិត្តរបស់អង្គការ TPO អ្នកស្រី ស៊ុន សូលីដា ផ្តល់អនុសាសន៍បន្ថែមថា ប្រជាពលរដ្ឋគួរចូលរួមលើកទឹកចិត្តបែបវិជ្ជមាននិងផ្តល់តម្លៃដល់អ្នកមានជំងឺកូវីដ-១៩ ចៀសវាងរើសអើងឬប្រមាថ ដែលនាំពួកគេងាយធ្លាក់ទៅក្នុងវិបត្តិផ្លូវចិត្ត។ លើសពីនេះ បន្តគាំទ្រនិងលើកទឹកចិត្តដើម្បីឱ្យស្ថានភាពផ្លូវចិត្តរបស់អ្នកជំងឺកាន់តែប្រសើរឡើង បន្ថយសម្ពាធ ធ្វើឱ្យស្ថានភាពនៃការរីករាលដាលកាន់តែថយចុះផងដែរ។
បើតាមក្រសួងសុខាភិបាល គិតត្រឹមព្រឹកថ្ងៃពុធនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួនជិត៨ម៉ឺននាក់ (៧៩ ៦៣៤) ក្នុងនោះ អ្នកជំងឺព្យាបាលជាសះស្បើយចំនួនជាង៧ម៉ឺននាក់ (៧២ ៨០៣) អ្នកស្លាប់ចំនួន១ ៤៨៨នាក់ ៕
