ក្រសួងកសិកម្ម រុក្ខាប្រមាញ់ និងនេសាទ បញ្ជាក់ថា ក្នុងរយៈពេល៧ខែដើមឆ្នាំ២០២១នេះ កម្ពុជានាំចេញអង្ករទៅក្រៅប្រទេសមានការថយចុះខ្លាំង ស្របពេលប្រជាកសិករមួយចំនួនត្អូញត្អែរពីតម្លៃស្រូវចុះថោកនិងពិបាករកទីផ្សារលក់ស្រូវរបស់ខ្លួននៅរដូវប្រមូលផលខាងមុខ។
របាយការណ៍របស់ក្រសួងកសិកម្ម ចេញផ្សាយកាលពីថ្ងៃទី១ ខែសីហា ឆ្នាំ២០២១ ឱ្យដឹងថា ក្នុងរយៈពេល៧ខែដើមឆ្នាំ២០២១នេះ កម្ពុជាបាននាំអង្ករចេញទៅលក់នៅក្រៅប្រទេសបានចំនួនជាង៣០ម៉ឺនតោន (៣០៩ ៨៦៥តោន)។ ចំនួននេះមានការថយចុះជាង១១ម៉ឺនតោន (១១៦ ២០៨តោន) ឬស្មើជាង២៧ភាគរយ (២៧,២៧%) បើធៀបនឹងបរិមាណនាំចេញអង្ករក្នុងរយៈពេលដូចគ្នាកាលពីឆ្នាំ២០២០ ដែលមានចំនួនជាង៤២ម៉ឺនតោន (៤២០ ៦៧៣តោន)។
របាយការណ៍ដដែលបន្ថែមថា ទិសដៅកម្ពុជាក្នុងការនាំកសិផលចេញមានចំនួន៦៤ប្រទេស ដែលមានក្រុមហ៊ុននាំចេញអង្ករចេញចំនួន៥៨ក្រុមហ៊ុន។ ការនាំអង្ករទៅសហភាពអឺរ៉ុប ចំនួន២១ប្រទេស មានបរិមាណសរុប៧៧ ៧៨៦តោន ថយចុះ៤៦,០៧% ហើយការនាំទៅប្រទេសចិនមានបរិមាណសរុបចំនួន១៥៣ ៩២១តោន ថយចុះ០,៩១%។ បន្ថែមពីនេះ ការនាំចេញទៅប្រទេសអាស៊ានចំនួន៥ មានបរិមាណសរុបចំនួន២៩ ៤៥៣តោន ថយចុះ៤៨,៣៩% និងទិសដៅនាំអង្ករចេញដទៃទៀតចំនួន២២ប្រទេស មានបរិមាណសរុប៤៨ ៧០៥តោន ថយចុះ២៩,៨៦% ។
ក្រសួងកសិកម្មបញ្ជាក់ថា ចំពោះបញ្ហាដែលបណ្តាលឱ្យកម្ពុជានាំចេញអង្ករទៅក្រៅប្រទេសថយចុះ ដោយសារកត្តាកង្វះទូកុងតឺន័រសម្រាប់ផ្ទុក និងតម្លៃដឹកជញ្ជូនកើនឡើង។
កាលពីថ្មីៗនេះ ធនាគារអភិវឌ្ឍន៍ជនបទ និងកសិកម្ម បានបញ្ចេញថវិកាសរុបចំនួន៥០លានដុល្លារសហរដ្ឋអាមេរិកដែលជាប្រាក់ឥណទានផ្តល់ដល់ម្ចាស់រោងម៉ាស៊ីនកិនស្រូវ និងក្រុមហ៊ុនកែច្នៃនិងនាំចេញអង្ករ សម្រាប់បង្កើនទុន ដើម្បីជំរុញការទិញស្រូវពីប្រជាកសិករដែលកំពុងជួបបញ្ហាទីផ្សារ និងសំដៅធ្វើឱ្យតម្លៃស្រូវក្នុងប្រទេសមានស្ថិរភាព។ លើសពីនេះ ដើម្បីបង្កើនការកែច្នៃអង្ករ ផ្គត់ផ្គង់តម្រូវការក្នុងប្រទេស និងការនាំចេញ។
អ្នកនាំពាក្យធនាគារអភិវឌ្ឍន៍ជនបទ និងកសិកម្ម លោក ចាន់ សីហា មានប្រសាសន៍ថា ធនាគារនឹងជួយកសិករឱ្យអស់ពីលទ្ធភាពតាមដែលអាចធ្វើទៅបាន បើទោះបីជាកាលៈទេសៈបច្ចុប្បន្ននេះលំបាកនិងធ្ងន់ធ្ងរចំពោះវិស័យស្រូវ-អង្ករនៅកម្ពុជាក៏ដោយ។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន បញ្ជាក់ថា ជារឿងល្អ នៅក្នុងកាលៈទេសៈនេះដែលធនាគារអភិវឌ្ឍន៍ជនបទ និងកសិកម្ម ចូលរួមជួយដោះស្រាយបញ្ហាធ្លាក់ថ្លៃ និងជួយរកទីផ្សារឱ្យកសិករ ដែលនឹងអាចជួយដល់ពួកគាត់បានមួយកម្រិត។ ដោយឡែក លោកថា នៅពេលរោងម៉ាស៊ីនកិនស្រូវទទួលបានទុនទាំងនោះហើយ ធនាគារអភិវឌ្ឍន៍ជនបទ និងកសិកម្ម ត្រូវតាមដានបន្តទៀត ដើម្បីធានាថា ការប្រើប្រាស់ថវិកាទាំងអស់នោះត្រឹមត្រូវនិងចំគោលដៅ។
លោកមានប្រសាសន៍ថា៖ «ដើម្បីដោះស្រាយរឿងរ៉ាវបញ្ហាប្រឈមរបស់ពួកគាត់បាននោះ ត្រូវតែមានយុទ្ធនាការក្នុងការតាមដានបន្ថែមទៀតរបស់ធនាគារអភិវឌ្ឍន៍ជនបទ និងកសិករ ចំពោះរោងម៉ាស៊ីនកិនស្រូវ ដើម្បីធានាថា ថវិកាដែលបញ្ចេញទៅឱ្យកម្ចីហ្នឹង ក្រុមហ៊ុនឬរោងចក្រកិនស្រូវប្រើប្រាស់ស្របតាមកុងត្រា និងការដោះស្រាយបញ្ហានោះបាន»។
ប្រជាកសិករម្នាក់ទៀតរស់នៅខេត្តកំពង់ឆ្នាំង ថ្លែងក្នុងលក្ខខណ្ឌសុំមិនបញ្ចេញឈ្មោះ ប្រាប់ វីអូឌី នៅថ្ងៃអង្គារនេះថា អ្នកស្រីមានការព្រួយបារម្ភខ្លាំង ដោយសារតម្លៃស្រូវធ្លាក់ចុះ ពោលគឺមួយគីឡូក្រាមលក់មិនបាន១ ០០០រៀលផង ស្របពេលការនាំអង្ករចេញក៏មានការធ្លាក់ចុះថែមទៀត ដែលនឹងធ្វើឱ្យបញ្ហាតម្លៃស្រូវរបស់កសិករកាន់តែប្រឈមថែមទៀតនៅពេលខាងមុខ។
អ្នកស្រីបន្តថា៖ «សំណូមពរឱ្យរដ្ឋាភិបាលជួយសម្រួលដល់ផ្នែកស្រូវអង្ករហ្នឹងឱ្យបានឡើងថ្លៃផង ហើយខ្ញុំសំណូមពររឿងជីហ្នឹងឱ្យបានចុះថោកផង ចុះបើស្រូវយើងថោកហើយ តែជីថ្លៃ សាំងថ្លៃ មិនកសិករដួលអស់ហើយអ៊ីចឹង! របស់គេពីក្រៅមក នាំចូលមកថ្លៃ ដល់ពេលរបស់ក្នុងស្រុកខ្មែរថោក អ៊ីចឹងប្រជាជនគាត់ពិបាក»៕