សមត្ថកិច្ចរាជធានីភ្នំពេញ បានកសាងសំណុំរឿងបញ្ជូនមនុស្ស១៨នាក់ទៅតុលាការ បន្ទាប់ពីពួកគេបានល្មើសបម្រាមគោចររបស់រដ្ឋបាលរាជធានីភ្នំពេញ កាលពីយប់ថ្ងៃទី៣ ខែសីហា។
យោងតាមសេចក្តីជូនដំណឹង ស្តីពី «លទ្ធផលអនុវត្តវិធានការច្បាប់ចំពោះបុគ្គលដែលល្មើសនឹងវិធានការសុខាភិបាល និងវិធានការរដ្ឋបាល» សម្រាប់ថ្ងៃទី៤ ខែសីហា ឆ្នាំ២០២១ សមត្ថកិច្ចបានចុះអនុវត្តវិធានការច្បាប់លើអ្នកល្មើសបម្រាមគោចរចំនួន៨២២ករណី ក្នុងនោះ ឃាត់ខ្លួនដើម្បីអប់រំនិងពិន័យជាប្រាក់ចំនួន១ ៣៥៤នាក់ និងកសាងសំណុំរឿងបញ្ជូនទៅតុលាការចំនួន១៨នាក់។ ក្រៅពីនេះ សមត្ថកិច្ចបានឃាត់យានយន្តបានចំនួន៧៣៤គ្រឿង និងពិន័យជាប្រាក់បានចំនួន៣០ ៧០០ ០០០លានរៀល។
ដោយឡែក នៅយប់មិញនេះ សមត្ថកិច្ចបានឃាត់យានយន្តសរុបចំនួន១២១គ្រឿង និងបានឃាត់ខ្លួនមនុស្សចំនួន១៦នាក់បន្ថែមទៀត ដែលពួកគេបានល្មើសបម្រាមគោចរ រត់គេចពីសមត្ថកិច្ច និងបើកបរក្នុងស្ថានភាពស្រវឹងជាដើម។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោកវរសេនីយ៍ឯក សាន សុខសីហា មានប្រសាសន៍ថា ក្នុងចំណោមអ្នកល្មើសបម្រាមគោចរទាំង១៦នាក់នេះ កំពុងស្ថិតនៅក្នុងការសាកសួរនៅតាមបណ្តាអធិការខណ្ឌនានា មុននឹងសម្រេចថាតើត្រូវកសាងសំណុំរឿងបញ្ជូនទៅតុលាការឬត្រូវដោះលែងវិញ ដោយគ្រាន់តែធ្វើការអប់រំនិងពិន័យជាប្រាក់។
គួរជម្រាបជូនថា ចាប់តាំងពីយប់ថ្ងៃទី៣ ខែសីហាមក អាជ្ញាធររាជធានីភ្នំពេញ បានចាប់ផ្តើមអនុវត្តវិធានការក្តៅចំពោះអ្នកល្មើសបម្រាមគោចរចាប់ពីម៉ោង៩យប់ដល់ម៉ោង៣ទៀបភ្លឺ ខណៈអាជ្ញាធរកំពុងព្រួយបារម្ភពីការឆ្លងជំងឺកូវីដ-១៩បំប្លែងថ្មី (Delta) នៅក្នុងសហគមន៍។ បម្រាមគោចរនេះបានអនុវត្តចាប់ពីថ្ងៃទី២៩ ខែកក្កដា រហូតដល់ថ្ងៃទី១២ ខែសីហា ខាងមុខ៕