ក្រុមប្រជាពលរដ្ឋមានបញ្ហាដីធ្លីនៅសហគមន៍បឹងឈូក[A] សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ អះអាងថា នៅថ្ងៃព្រហស្បតិ៍នេះ អាជ្ញាធរខណ្ឌបានបន្តចុះរុះរើផ្ទះប្រជាពលរដ្ឋចំនួន២ខ្នងបន្ថែមទៀត ដោយពុំបានផ្តល់សំណងសមរម្យនោះឡើយ។
គិតចាប់តាំងពីថ្ងៃចន្ទដើមសប្តាហ៍នេះមក អាជ្ញាធរខណ្ឌឫស្សីកែវបានចុះរុះរើផ្ទះប្រជាពលរដ្ឋអស់ចំនួន១១ខ្នងមកហើយ ក្នុងចំណោមផ្ទះពលរដ្ឋចំនួន២០គ្រួសារដែលអាជ្ញាធរតម្រូវឱ្យរុះរើដើម្បីពង្រីកផ្លូវ ប៉ុន្តែពលរដ្ឋអះអាងថា ការរុះរើនេះធ្វើឡើងដោយមិនបានផ្ដល់សំណងណាមួយដល់ពួកគាត់ឡើយ។
ពលរដ្ឋម្នាក់ដែលត្រូវបានអាជ្ញាធរចុះទៅរុះរើផ្ទះរបស់គាត់នៅព្រឹកថ្ងៃទី០៥ ខែសីហានេះ អ្នកស្រី តូច ឡៃអៀង បានលើកឡើងថា គម្រោងរបស់អាជ្ញាធរនឹងបន្តរុះរើផ្ទះរបស់ពលរដ្ឋទាំង២០គ្រួសារនៅតំបន់បឹងឈូកអេនេះ ស្របពេលផ្ទះអ្នកស្រីត្រូវបានរុះរើអស់ពាក់កណ្ដាលហើយ ខណៈពាក់កណ្ដាលទៀត អាជ្ញាធរទុកឱ្យអ្នកស្រីនិងកូនរស់នៅបណ្ដោះអាសន្នសិន។
ស្រ្តីដែលទើបឆ្លងទន្លេហើយបាន៤ខែរូបនេះ បន្តថា ការរុះរើនេះ អាជ្ញាធរខណ្ឌមិនបានផ្តល់សំណងណាមួយដល់ពួកគាត់ឡើយ ដោយលើកហេតុផលថា ពួកគាត់រស់នៅខុសច្បាប់។ តែយ៉ាងណា អ្នកស្រីថា ពួកគាត់បានរស់នៅលើដីនេះជាង២០ឆ្នាំមកហើយ ហើយក៏ពុំមានលំនៅនៅទីណាផ្សេងទៀតដែរ ហើយបើអាជ្ញាធររុះរើបែបនេះ នឹងធ្វើឱ្យពួកគាត់កាន់តែជួបផលលំបាកក្នុងជីវភាព ជាពិសេសក្នុងអំឡុងពេលកម្ពុជាជួបវិបត្តិកូវីដ-១៩នេះ។
ស្ត្រីរូបនេះគូសបញ្ជាក់ថា៖ «ខ្ញុំមានក្ដីបារម្ភដែរ ខ្លាចតែគេ [អាជ្ញាធរ] មិនឱ្យខ្ញុំនៅហ្នឹង! ហើយខ្លាចតែគេឱ្យរុះរើទៀត ទាំងគ្មានសំណងដោះដូរ មិនដឹងទៅនៅណា! រស់ស៊ីឯណាទៀតទេ! អស់ដី អស់អីនៅ មានដីតែប៉ុណ្ណឹង! ខ្ញុំមានក្ដីបារម្ភខ្លាំងណាស់។ ណាមួយសម័យកូវីដទៀត អ៊ីចឹងរកអ្វីមិនបាន ហើយប្ដីក៏អត់មានការងារធ្វើ ចំណែកនាងខ្ញុំកូនខ្ចីទៀត មកទទួលទោសទណ្ឌអ៊ីចឹង ពិបាកណាស់»។
អ្នកស្រី យាត ណាត អាយុ៥០ឆ្នាំ ដែលកំពុងឈរមើលកម្លាំងអាជ្ញាធរប្រមាណ៣០នាក់រុះរើផ្ទះអ្នកជិតខាងរបស់ខ្លួននោះ បាននិយាយថា អាជ្ញាធរបានទុកពេល១អាទិត្យឱ្យគាត់រុះរើផ្ទះដែលកំពុងរស់នៅនេះ។
អ្នកស្រីថា៖ «ឱ្យខ្ញុំរើទៅណា? បើខ្ញុំមិនមានដី គ្មានផ្ទះផង បើមានផ្ទះតែប៉ុណ្ណឹង! កូនខ្ញុំ៥នាក់ ចៅខ្ញុំ៥នាក់ ខ្ញុំរស់នៅហ្នឹងតាំងពីដីគ្មានផ្លូវ រហូតដល់មានផ្លូវ [ផ្លូវថ្នល់ធំៗ]»។
ករណីនេះ ក្រុមប្រជាពលរដ្ឋបានស្នើដល់រដ្ឋាភិបាលនិងក្រសួងស្ថាប័នពាក់ព័ន្ធជួយអន្តរាគមន៍ដោះស្រាយសំណង តាមរយៈការដោះដូរទីតាំងឱ្យពួកគាត់មានលំនៅរស់នៅដូចពលរដ្ឋដទៃទៀតផង ដោយសារពួកគាត់កំពុងជួបបញ្ហាក្នុងជីវភាពដោយសារវិបត្តិជំងឺកូវីដ-១៩ ហើយបែរមកត្រូវអាជ្ញាធររុះរើផ្ទះដោយគ្មានសំណងបែបនេះទៀត។
អភិបាលរងខណ្ឌឫស្សីកែវ លោក ប្រាជ្ញា សីហា បានបដិសេធអត្ថាធិប្បាយ ដោយប្រាប់ឱ្យអ្នកសារព័ត៌មានទៅយកព័ត៌មានផ្ទាល់នៅរដ្ឋបាលខណ្ឌ។
បើតាមប្រធានសហគមន៍បឹងឈូកអេ លោក តូច សំអ៊ន់ ដែលបានប្រាប់ វីអូឌី នាពេលកន្លងមក ឱ្យដឹងថា ចាប់តាំងពីពួកគាត់រស់នៅឆ្នាំ១៩៩៥ រហូតមកដល់ឆ្នាំ១៩៩៩ នៅតំបន់នោះមិនទាន់មានការអភិវឌ្ឍនៅឡើយ គឺនៅតំបន់នោះជាបឹងតភ្ជាប់មកពី«បឹងពោងពាយ»ទល់នឹង«បឹងតាមោក» (បឹងកប់ស្រូវ) សព្វថ្ងៃ។ ហើយនៅកន្លែងនោះ មានទឹកលិចជាប្រចាំ មិនថារដូវប្រាំងឬរដូវវស្សានោះទេ។ ពលរដ្ឋរស់នៅទាំងគ្មានទឹកស្អាត ភ្លើងអគ្គិសនី គ្មានសេវាសាធារណៈ ជាដើម។
ប៉ុន្តែក្រោយមក ចាប់ពីឆ្នាំ១៩៩៩ ដល់ឆ្នាំ២០០០ ទើបរដ្ឋាភិបាលចាប់ផ្តើមធ្វើការអភិវឌ្ឍនៅតំបន់នោះឱ្យមានទឹកស្អាត ភ្លើងអគ្គិសនី និងសេវាសាធារណៈជាបន្តបន្ទាប់។ ហើយបច្ចុប្បន្ននេះ អាជ្ញាធរបែរជាបណ្តេញពួកគេចេញពីតំបន់នោះ ដោយមិនផ្តល់សំណង និងមិនបញ្ជាក់ពីមូលហេតុច្បាស់លាស់នោះទេ។
មន្រ្តីជាន់ខ្ពស់នៃអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា រដ្ឋាភិបាលឬអាជ្ញាធរគួរតែស្រាវជ្រាវឱ្យបានច្បាស់លាស់ចំពោះការកាន់កាប់ដីធ្លីរបស់ពលរដ្ឋនៅសហគមន៍បឹងឈូកអេនេះ។ ហើយប្រសិនបើពួកគាត់ពិតជាបានកាន់កាប់យូរឆ្នាំមែន អាជ្ញាធរគួរតែផ្តល់សំណងសមរម្យដល់ពួកគាត់ ចៀសវាងការបណ្តេញពួកគាត់ទាំងបង្ខំ។
លោកបានគូសបញ្ជាក់ថា៖ «យន្តការក្នុងការដោះស្រាយវាមានច្រើនមកហើយ រឿង[ដីធ្លី]ហ្នឹង! អាស្រ័យទៅលើការដោះស្រាយផ្ទាល់របស់អាជ្ញាធរ។ ក៏ប៉ុន្តែទោះជាយ៉ាងណាក៏ដោយ រដ្ឋាភិបាលគួរតែមានការស្រាវជ្រាវឱ្យបានច្បាស់លាស់ទាក់ទងនឹងការកាន់កាប់ ក៏ដូចជាដំណោះស្រាយសម្រាប់ពួកគាត់ ដើម្បីចៀសវាងនៃការចោទប្រកាន់ដែលដេញចេញទាំងបង្ខំ ឬក៏មានប៉ះពាល់ដល់ជីវភាពរស់នៅរបស់ប្រជាពលរដ្ឋ។ អ៊ីចឹងបទពិសោធន៍ដីធ្លីកន្លងមក វាល្មមគ្រប់គ្រាន់ហើយសម្រាប់អាជ្ញាធរនិងក្រសួងពាកព័ន្ធ ត្រូវស្វែងរកដំណោះស្រាយឱ្យបានសមរម្យ»៕