ក្រសួងសុខាភិបាលម៉ាឡេស៊ី នៅថ្ងៃព្រហស្បតិ៍នេះ បានឱ្យដឹងថា ខ្លួនបានផ្តល់ការអនុម័តតាមលក្ខខណ្ឌដល់វ៉ាក់សាំងការពារជំងឺកូវីដ-១៩ របស់ក្រុមហ៊ុន Moderna សម្រាប់ការប្រើប្រាស់ករណីបន្ទាន់។ នេះបើតាមការចុះផ្សាយរបស់ទីភ្នាក់ងារសារព័ត៌មាន Reuters។
អគ្គនាយកសុខាភិបាលម៉ាឡេស៊ី លោក Noor Hisham Abdullah បានថ្លែងនៅក្នុងសេចក្តីថ្លែងការណ៍មួយថា ក្រសួងនឹងបន្តវាយតម្លៃគុណភាព សុវត្ថិភាព និងប្រសិទ្ធភាពនៃវ៉ាក់សាំង ដើម្បីធានាឱ្យបានថា វាផ្ដល់អត្ថប្រយោជន៍ច្រើនជាងហានិភ័យ។
គួរបញ្ជាក់ថា ក្រសួងសុខាភិបាលម៉ាឡេស៊ី កាលពីខែកក្កដាកន្លងទៅ ក៏បានអនុម័តសម្រាប់ការប្រើប្រាស់ជាបន្ទាន់ចំពោះវ៉ាក់សាំងកូវីដ-១៩ របស់មន្ទីរពិសោធន៍ចិន Sinopharm និងវ៉ាក់សាំងកូវីដ-១៩ Janssen របស់ក្រុមហ៊ុនឱសថអាមេរិក Johnson & Johnson ដែលផលិតនៅក្នុងប្រទេសបែលហ្ស៊ិកផងដែរ។
ប្រទេសម៉ាឡេស៊ី នៅថ្ងៃព្រហស្បតិ៍នេះ ក៏បានរាយការណ៍ពីការឆ្លងវីរុសកូវីដ-១៩ថ្មី ចំនួន២០ ៥៩៦ករណី ខណៈដែលតួលេខឆ្លងសរុបនៅទូទាំងប្រទេសមានចំនួនជាង១លានករណី៕
