ក្រសួងមហាផ្ទៃបានអនុញ្ញាតឱ្យបង្កើតគណបក្សនយោបាយថ្មីមួយទៀតមានឈ្មោះថា «គណបក្សសំឡេងសហគមន៍កម្ពុជា»។
លិខិតអនុញ្ញាតនេះបានធ្វើឡើងនៅថ្ងៃទី៤ ខែសីហា ម្សិលមិញនេះ ដោយមានលោក សា លីម ដែលគេមិនដែលឮឈ្មោះសោះនោះ ធ្វើជាតំណាងស្ថាបនិកគណបក្ស។
យោងតាមបញ្ញត្តិមាត្រា៩ នៃច្បាប់ស្តីពីគណបក្សនយោបាយ ក្រសួងមហាផ្ទៃសម្រេចអនុញ្ញាតឱ្យបង្កើត «គណបក្សសំឡេងសហគមន៍កម្ពុជា» ដែលមានអាសយដ្ឋាននៃទីស្នាក់ការកណ្តាល ស្ថិតនៅផ្ទះលេខ១៥ ផ្លូវជាតិលេខ១ ភូមិព្រែកធំ២ សង្កាត់ក្បាលកើ ខណ្ឌច្បារអំពៅ រាជធានីភ្នំពេញ។
ប៉ុន្តែយោងតាមកថាខណ្ឌទី២ នៃមាត្រា៩ មាត្រា១៨ថ្មី និងមាត្រា២០ នៃច្បាប់ស្តីពីគណបក្សនយោបាយ តំណាងស្ថាបនិកគណបក្សនេះត្រូវរៀបចំបែបបទនិងបំពេញលក្ខខណ្ឌស្នើសុំចុះបញ្ជីនៅក្រសួងមហាផ្ទៃនៅក្នុងរយៈពេល១៨០ថ្ងៃ បន្ទាប់ពីបានបង្កើតរួចហើយ។
ស្របពេលមាននិន្នាការបង្កើតគណបក្សថ្មីៗកាន់តែច្រើននេះ ក្រសួងមហាផ្ទៃក៏បានលុបឈ្មោះគណបក្សនយោបាយចំនួន៣ទៀតចេញពីបញ្ជីឈ្មោះគណបក្សនយោបាយនៅក្រសួងមហាផ្ទៃ តាមសាលដីការបស់តុលាការកំពូល។ គណបក្សទាំង៣នោះ រួមមាន «គណបក្សសង្គមប្រជាធិបតេយ្យ» «គណបក្សវង្គតខេមរៈមហានគរ» និង«គណបក្សប្រជាធិបតេយ្យខ្មែរ»៕