រដ្ឋបាលរាជធានីភ្នំពេញ បានជូនដំណឹងនៅមុននេះបន្តិចថា អាជ្ញាធរបានសម្រេចបិទខ្ទប់កំណាត់ផ្លូវលេខ១១៣ ចន្លោះផ្លូវលេខ២៣២ និងផ្លូវលេខ២៤២ ស្ថិតនៅភូមិ២ សង្កាត់បឹងព្រលិត ខណ្ឌ៧មករា បន្ទាប់ពីរកឃើញមានការឆ្លងរាលដាលនៃមេរោគបំប្លែងខ្លួនថ្មី ប្រភេទ “ដែលតា (Delta)”។
ការបិទខ្ទប់នេះមានរយៈពេល១៤ថ្ងៃ ដោយរាប់គិតចាប់តាំងពីថ្ងៃទី០៥ រហូតដល់ថ្ងៃទី១៨ ខែសីហា ឆ្នាំ២០២១ ដើម្បីទប់ស្កាត់និងកាត់ផ្ដាច់ការឆ្លងរាលដាលនូវមេរោគបំប្លែងខ្លួនថ្មី ប្រភេទ “ដែលតា (Delta)” នៅក្នុងសហគមន៍។
សេចក្តីជូនដំណឹងនេះបានឱ្យដឹងថា នៅក្នុងរយៈពេលនៃការបិទខ្ទប់នេះ អាជ្ញាធរបានហាមឃាត់រាល់ការចេញ-ចូល និងរាល់ការជួបជុំឬការប្រមូលផ្តុំមនុស្ស លើកលែងសកម្មភាពចាំបាច់មួយចំនួន។ ដោយឡែក ចំពោះជនណាដែលមិនគោរពតាមវិធានការបិទខ្ទប់នេះ អាជ្ញាធរនឹងកសាងសំណុំរឿងបញ្ជូនទៅតុលាការ ដើម្បីផ្តន្ទាទោសដាក់ពន្ធនាគារឬពិន័យជាប្រាក់ ស្របតាមមាត្រា១០ និងមាត្រា១១ នៃច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩។
នៅថ្ងៃជាមួយគ្នានេះ អាជ្ញាធរក៏បានសម្រេចបិទខ្ទប់ផ្សារទួលសង្កែ ស្ថិតនៅភូមិចុងខ្សាច់ សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ រយៈពេល១៤ថ្ងៃ ចាប់ពីថ្ងៃទី៥ ដល់ថ្ងៃទី១៨ ខែសីហា ឆ្នាំ២០២១។ ការបិទខ្ទប់នេះ គឺបន្ទាប់ពីមានការរកឃើញអ្នកឆ្លងជំងឺកូវីដ-១៩បំប្លែងថ្មី ប្រភេទ “ដែលតា (Delta)”។
បើតាមការជូនដំណឹងរបស់ក្រសួងសុខាភិបាលជាបន្តបន្ទាប់ ឱ្យដឹងថា គិតចាប់ពីថ្ងៃទី៣១ ខែមីនា ដល់ថ្ងៃទី០៣ ខែសីហា ឆ្នាំ២០២១ កម្ពុជារកឃើញអ្នកវិជ្ជមានវីរុសកូវីដ-១៩បំប្លែងថ្មី (Delta) លើពលករត្រឡប់មកពីប្រទេសថៃ អ្នកដំណើរមកតាមយន្តហោះ បុគ្គលិកសុខាភិបាល និងអ្នកភូមិនៅក្នុងសហគមន៍ សរុបចំនួន២៦០នាក់ (ស្ត្រី១២៥នាក់)៕