មន្ទីរពេទ្យ Royal Phnom Penh ជាមន្ទីរពេទ្យឯកជនដំបូងគេនៅកម្ពុជាដែលទទួលបានសិទ្ធិអនុញ្ញាតឱ្យនាំចូលនិងគ្រប់គ្រងវ៉ាក់សាំង Pfizer Biontech និង Moderna ពីសហរដ្ឋអាមេរិក ដល់អ្នកដែលអាចមានលទ្ធភាពនឹងត្រូវការចាក់ប្រភេទវ៉ាក់សាំងទាំងនេះ។ នេះបើតាមការប្រកាសឱ្យដឹងពីរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ នៅល្ងាចម្សិលមិញនេះ។
ក្រសួងសុខាភិបាល កាលពីថ្ងៃទី២៩ ខែកក្កដា បានអនុញ្ញាតឱ្យមន្ទីរពេទ្យឯកជន (មន្ទីរពេទ្យ មន្ទីរពហុព្យាបាល មន្ទីរសម្រាកព្យាបាល និងមន្ទីរសម្ភព) ក្នុងការនាំចូល គ្រប់គ្រង និងផ្ដល់សេវាវ៉ាក់សាំងកូវីដ-១៩ ដែលទទួលស្គាល់ដោយអង្គការសុខភាពពិភពលោក។ ក៏ប៉ុន្តែដើម្បីទទួលបានសិទ្ធិនេះ មន្ទីរពេទ្យឯកជនត្រូវដាក់ពាក្យស្នើសុំសិទ្ធិ និងត្រូវគោរពតាមលក្ខខណ្ឌស្តង់ដារសុវត្ថិភាព ដូចជា ការដឹកជញ្ជូន ការក្សាទុក និងការបែងចែក ជាដើម៕
