រដ្ឋមន្រ្តីការបរទេសអូស្រ្តាលី លោកស្រី Marise Payne បានថ្លែងឱ្យដឹងថា អូស្ត្រាលីនឹងមិនទទួលយកការទាមទាររបស់ចិនក្នុងការផ្លាស់ប្តូរគោលនយោបាយ ដើម្បីចាប់ផ្តើមកិច្ចចរចាទ្វេភាគីឡើងវិញនោះទេ។
ទំនាក់ទំនងរវាងប្រទេសអូស្រ្តាលីជាមួយប្រទេសចិនមានភាពរង្គោះរង្គើរួចទៅហើយ បន្ទាប់ពីប្រទេសអូស្ត្រាលីមិនអនុញ្ញាតឱ្យក្រុមហ៊ុនចិន Huawai ធ្វើប្រតិបត្តិការនៅក្នុងបណ្តាញទូរគមនាគមន៍ចល័តអ៊ីនធឺណិត 5G នៅក្នុងទឹកដីរបស់ខ្លួនចាប់តាំងពីឆ្នាំ២០១៨ ខណៈដែលទីក្រុងកង់បេរ៉ា កាលពីឆ្នាំមុន ក៏បានអំពាវនាវឱ្យមានការស៊ើបអង្កេតឯករាជ្យមួយ ទៅលើប្រភពដើមនៃជំងឺរាតត្បាតកូរ៉ូណា ដែលត្រូវបានរាយការណ៍ជាលើកដំបូងនៅភាគកណ្តាលប្រទេសចិន កាលពីឆ្នាំមុន។
ទាក់ទិននឹងករណីនេះ ប្រទេសចិនបានឆ្លើយតបតាមរយៈការដាក់ពន្ធលើទំនិញនានារបស់ប្រទេសអូស្ត្រាលី រួមមាន ស្រា ស្រូវបាឡេ (barley) និងការកំណត់ក្នុងការនាំចូលសាច់គោ ធ្យូងថ្ម និងផ្លែទំពាំងបាយជូរអូស្ត្រាលី ជាដើម។
ទីភ្នាក់ងារសារព័ត៌មាន Reuters បានស្រង់សម្ដីរបស់លោកស្រី Marise Payne ដែលបានថ្លែងក្នុងសុន្ទរកថាមួយកាលពីល្ងាចថ្ងៃព្រហស្បតិ៍ នៅទីក្រុងកង់បេរ៉ា ថា៖ «យើងត្រូវបានជូនដំណឹងដោយប្រទេសចិនថា ពួកគេនឹងចូលរួមក្នុងការសន្ទនាកម្រិតខ្ពស់ លុះត្រាតែយើងបំពេញតាមលក្ខខណ្ឌជាក់លាក់មួយចំនួន។ យើងមិនអាចបំពេញតាមលក្ខខណ្ឌរបស់ពួកគេបាននោះទេ»។
ស្ថានទូតចិនប្រចាំនៅទីក្រុងកង់បេរ៉ា មិនបានឆ្លើយតបភ្លាមៗចំពោះសំណើសុំការអត្ថាធិប្បាយទាក់ទងនឹងការលើកឡើងរបស់លោកស្រី Marise Payne បានទេ។
បើទោះបីជាមានភាពតានតឹងទ្វេភាគីយ៉ាងណាក្ដី ចិននៅតែជាដៃគូពាណិជ្ជកម្មធំបំផុតរបស់អូស្ត្រាលី។
ក្នុងរយៈពេល១២ខែ (គិតចាប់ពីខែមីនា ឆ្នាំ២០២០ ដល់ខែមីនា ឆ្នាំ២០២១) អូស្រ្តាលីបាននាំចេញទំនិញដែលមានទំហំទឹកប្រាក់ចំនួន១៤៩ពាន់លានដុល្លារអូស្ត្រាលី (ឬស្មើប្រមាណ១១០,១ពាន់លានដុល្លារអាមេរិក) ទៅកាន់ប្រទេសចិន ធ្លាក់ចុះ០,៦% បើប្រៀបធៀបទៅនឹងឆ្នាំមុន៕