សមត្ថកិច្ចនៅខេត្តកំពង់ចាម បានកោះហៅយុវជនម្នាក់ទៅសួរនាំ ក្រោយពីយុវជនរូបនេះបានរាយការណ៍ពីបញ្ហាគ្រឿងញៀននៅក្នុងសហគមន៍របស់ខ្លួនប្រាប់ទៅរដ្ឋមន្ត្រីក្រសួងមហាផ្ទៃ លោក ស ខេង។
យុវជនរូបនេះមានឈ្មោះ ឃីម សុខុម រស់នៅភូមិខ្នុរដំបង ឃុំខ្នុរដំបង ស្រុកជើងព្រៃ ខេត្តកំពង់ចាម បានផ្ញើសារតាមប្រអប់ខាំមិនត៍ (Comment) លើទំព័រហ្វេសប៊ុករបស់រដ្ឋមន្ត្រីក្រសួងមហាផ្ទៃ លោក ស ខេង កាលពីថ្ងៃទី១៥ ខែកក្កដា ឆ្នាំ២០២១ ដើម្បីសុំឱ្យជួយអន្តរាគមន៍ជុំវិញការប្រើប្រាស់និងការចរាចរគ្រឿងញៀននៅក្នុងសហគមន៍របស់គាត់។ ប៉ុន្តែយុវជនរូបនេះត្រូវបានសមត្ថកិច្ចកោះហៅទៅសួរនាំនៅព្រឹកថ្ងៃទី៦ ខែសីហានេះ។
លោក ឃីម សុខុម ប្រាប់ វីអូឌី ថាសមត្ថកិច្ចបានហៅលោកទៅសួរនាំជាង១ម៉ោងនៅសាលាឃុំខ្នុរដំបង នាព្រឹកថ្ងៃសុក្រនេះ ដោយមានការចូលរួមពីលោកមេឃុំ និងអធិការរងស្រុកជើងព្រៃផងដែរ។ លោកថា ក្នុងជំនួបនៅព្រឹកនេះ សមត្ថកិច្ចបានសួរនាំនិងឱ្យលោកប្រាប់ព័ត៌មានឬហេតុការណ៍លម្អិតបន្ថែមទៀតលើអ្វីដែលលោកបានរាយការណ៍ប្រាប់ទៅលោក ស ខេង តាមរយៈប្រអប់សារហ្វេសប៊ុកនោះ។
លោកបន្ថែមថា៖ «គាត់ [សមត្ថកិច្ច] មិនបានឱ្យខ្ញុំធ្វើកិច្ចសន្យាអីទេ! គាត់សួរខ្ញុំបន្ថែម គាត់ថា ខ្ញុំឃើញហេតុការណ៍ហ្នឹងនៅណាខ្លះ? យូរនៅ? ហើយគាត់សរសេររបាយការណ៍ហ្នឹងបន្ថែម ដែលគាត់ប្រាប់ខ្ញុំថា នឹងបញ្ជូនរបាយការណ៍ហ្នឹងទៅសម្តេចក្រឡាហោមបន្ថែម»។
លោក ឃីម សុខុម បន្ថែមថា លោកមានការព្រួយបារម្ភពីសុវត្ថិភាព ដោយសាររឿងដែលលោកបានរាយការណ៍ទៅលោក ស ខេង ឱ្យជួយអន្តរាគមន៍នោះ ជារឿងគ្រឿងញៀន ដែលលោកបានរាយការណ៍ដោយសម្ងាត់ ប៉ុន្តែរឿងនេះត្រូវបានផ្សព្វផ្សាយដល់អាជ្ញាធរមូលដ្ឋាន រហូតមានការកោះហៅរូបគាត់ទៅសួរនាំនិងសុំអាសយដ្ឋានរបស់លោកថែមទៀត។
ពលរដ្ឋរូបនេះបន្ថែមថា អ្វីដែលលោកចង់បាននោះ គឺចង់ឱ្យសមត្ថកិច្ចពាក់ព័ន្ធចុះស្រាវជ្រាវនិងស៊ើបអង្កេត ក្រោយទទួលបានការរាយការណ៍ពីប្រជាពលរដ្ឋណាម្នាក់ទៅលើបញ្ហាគ្រឿងញៀន ជាជាងហៅអ្នករាយការណ៍បញ្ហានោះមកសួរនាំ ដែលធ្វើឱ្យពលរដ្ឋភ័យខ្លាចនិងមិនហ៊ានរាយការណ៍បន្តទៀត។
មេឃុំខ្នុរដំបង លោក ឌី ឌិន មានប្រសាសន៍ថា ការហៅយុវជន ឃីម សុខុម ទៅសួរនាំនៅសាលាឃុំនោះ មិនមែនជាការគំរាមកំហែងឬបំភិតបំភ័យនោះទេ។ លោកថា ការហៅនេះ គឺដើម្បីសួររកព័ត៌មានបន្ថែមជុំវិញការប្រើប្រាស់គ្រឿងញៀននិងបញ្ហាក្មេងទំនើងនៅក្នុងសហគមន៍ប៉ុណ្ណោះ ដោយលោកបានទទួលស្គាល់ថា នៅក្នុងឃុំនេះពិតជាមានការប្រើប្រាស់គ្រឿងញៀននិងមានក្មេងទំនើងពិតមែន។
លោកបន្ថែមថា៖ «បញ្ហាក្មេងទំនើងនិងការប្រើប្រាស់គ្រឿងញៀន កន្លែងណាក៏ដូចកន្លែងណាដែរ មិនថាតែនៅភូមិឃុំខ្ញុំទេ វាមានទូទាំងប្រទេសហ្នឹង។ អាជ្ញាធរយើងខិតខំប្រឹងប្រែងទប់ស្កាត់និងបង្ក្រាបណាស់ មិនមែនមិនប្រឹងប្រែងទេ! គាត់មិនអាចនិយាយបន្ទោសអាជ្ញាធរទាំងស្រុងបានទេ»។
កន្លងមក ក្រសួងមហាផ្ទៃបានបង្កើតក្រុមការងារមួយ ដើម្បីតាមដានមតិមហាជនដែលបានលើកឡើងឬរាយការណ៍ និងការស្នើសុំកិច្ចអន្តរាគមន៍ឱ្យជួយដោះស្រាយបញ្ហាផ្សេងៗរបស់ពួកគេ តាមរយៈបណ្តាញសង្គមហ្វេសប៊ុករបស់លោកនាយករដ្ឋមន្ត្រី ហ៊ុន សែន និងហ្វេសប៊ុករបស់រដ្ឋមន្ត្រីក្រសួងមហាផ្ទៃ លោក ស ខេង ក្នុងការឆ្លើយតបនិងដោះស្រាយចំពោះមតិមហាជនដែលបានលើកឡើងនោះ។
នាយករងអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា ប្រសិនបើការហៅនោះគ្រាន់តែចង់បានព័ត៌មានបន្ថែម នោះមិនជាបញ្ហាទេ។ ប៉ុន្តែលោកទាមទារឱ្យមានការរក្សាការសម្ងាត់ចំពោះអ្នករាយការណ៍ផងដែរ ដើម្បីការពារសុវត្ថិភាពរបស់គាត់ និងមិនត្រូវសួរនាំច្រើនពេកនោះទេ ដែលធ្វើឱ្យគាត់ភ័យខ្លាចមិនហ៊ានរាយការណ៍ពេលក្រោយទៀត។
លោក អំ សំអាត បានកោតសរសើរចំពោះយុវជន គីម សុខុម ដែលហ៊ានរាយការណ៍ពីបញ្ហាសង្គម ដូចជា គ្រឿងញៀន និងក្មេងទំនើងនៅក្នុងសហគមន៍ ទៅដល់ថ្នាក់ដឹកនាំបែបនេះ។ លោកថា អ្នកដែលហ៊ានរាយការណ៍របៀបនេះ គួរតែត្រូវបានលើកទឹកចិត្តពីអាជ្ញាធរពាក់ព័ន្ធ។
លោកបន្ថែមថា៖ «អ៊ីចឹង! អ្វីដែលសំខាន់ហ្នឹង ប្រសិនបើមានការរាយការណ៍ព័ត៌មានអ៊ីចឹង អាជ្ញាធរពាក់ព័ន្ធត្រូវធ្វើការស្រាវជ្រាវថា មានឬក៏មិនមាន! បើមាន ត្រូវចាត់វិធានការយ៉ាងម៉េច ដើម្បីធ្វើការលុបបំបាត់ កុំឱ្យវាកើតមានតទៅទៀត ទាក់ទងនឹងភូមិឃុំមានសុវត្ថិភាព។ ហើយអ្នកដែលហ៊ានរាយការណ៍អ៊ីចឹង គួរតែត្រូវបានលើកទឹកចិត្ត»។
យោងតាមរបាយការណ៍របស់ក្រសួងមហាផ្ទៃដែលផ្សព្វផ្សាយនៅលើទំព័រហ្វេសប៊ុករបស់លោក ស ខេង កាលពីថ្ងៃទី១០ ខែកក្កដា ឱ្យដឹងថា សម្រាប់ឆមាសទី១ឆ្នាំនេះ សមត្ថកិច្ចបង្ក្រាបបទល្មើសគ្រឿងញៀនបានជាង៣ពាន់ករណី (៣ ២៥៨ករណី) ឃាត់ខ្លួនជនសង្ស័យបានជាង៧ពាន់នាក់ (៧ ២៥៩នាក់) រឹបអូសគ្រឿងញៀនសរុបបានជាង៨៥០គីឡូក្រាម ក្នុងនោះមានដូចជា មេតំហ្វេតាមីនក្រាមម្សៅ (ICE) ជាង១៩៣គីឡូក្រាម, មេតំហ្វេតាមីនគ្រាប់ (WY) ៦៨៣,៧៨ក្រាម, អិចស្តាស៊ី ជាង១៥២គីឡូក្រាម, កេតាមីន ជាង៤៧៨គីឡូក្រាម, ហេរ៉ូអ៊ីន ជាង២៥គីឡូក្រាម, កាប់បំផ្លាញកញ្ឆាស្រស់ជាង៤ម៉ឺន៥ពាន់ដើម, សារធាតុគីមីផ្សំជាង១០គីឡូក្រាម។
អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វិរិទ្ធ មានប្រសាសន៍បន្ថែមលើរបាយការណ៍នោះថា បទល្មើសដែលសមត្ថកិច្ចបង្ក្រាបបានមកនេះ បានថយចុះជាង២០ភាគរយ បើធៀបនឹងឆ្នាំមុនក្នុងរយៈពេលដូចគ្នា។
របាយការណ៍ដែលមានចំណងជើងថា «ការវិវត្តចុងក្រោយនិងការប្រឈមលើបញ្ហាគ្រឿងញៀននៅតំបន់អាស៊ីបូព៌ានិងអាស៊ីអាគ្នេយ៍» របស់អង្គការសហប្រជាជាតិដើម្បីប្រឆាំងនឹងឧក្រិដ្ឋកម្មគ្រឿងញៀន (UNODC) ចេញផ្សាយកាលពីខែមិថុនា ឆ្នាំ២០២១នេះ ឱ្យដឹងថា កម្ពុជាគឺជាគោលដៅនៃក្រុមឧក្រិដ្ឋជនគ្រឿងញៀនប្រើប្រាស់សម្រាប់ចរាចរគ្រឿងញៀន ផលិត និងចែកចាយបន្ត។ របាយការណ៍នោះបន្តថា ការជួញដូរគ្រឿងញៀននៅក្នុងតំបន់អាស៊ីអាគ្នេយ៍ ជាពិសេសនៅតំបន់ត្រីកោណមាស មិនមានការថយចុះឡើយ បើទោះបីជាមានការឆ្លងរីករាលដាលនៃជំងឺកូវីដ-១៩ក្តី ក្នុងនោះ រដ្ឋសាន (Shan) នៃប្រទេសភូមា គឺជាប្រភពរោងចក្រផលិតគ្រឿងញៀនដ៏ធំជាងគេ៕