កម្មវិធីស្បៀងអាហារពិភពលោក (WFP) នៃអង្គការសហប្រជាជាតិ (UN) ឱ្យដឹងនៅថ្ងៃសុក្រនេះថា ខ្លួនអាចនឹងមិនមានមូលនិធិគ្រប់គ្រាន់សម្រាប់រយៈពេល៦ខែខាងមុខនេះ ដើម្បីជួយដល់ប្រជាជនរាប់លាននាក់នៅមីយ៉ាន់ម៉ាដែលប្រឈមនឹងបញ្ហាអសន្តិសុខស្បៀង ស្របពេលដែលប្រទេសនេះកំពុងតែប្រឈមនឹងរលកនៃការឆ្លងជំងឺកូវីដ-១៩ និងភាពចលាចលនយោបាយនៅក្នុងប្រទេស។
កម្មវិធីស្បៀងអាហារពិភពលោក បានលើកឡើងនៅក្នុងសេចក្តីថ្លែងការណ៍មួយដែលត្រូវបានយកមកចុះផ្សាយដោយទីភ្នាក់ងារសារព័ត៌មាន Reuters ថា ខ្លួនត្រូវការថវិកាចំនួន៨៦លានដុល្លារ ដើម្បីជួយប្រយុទ្ធប្រឆាំងនឹងភាពអត់ឃ្លាននៅក្នុងប្រទេសដែលកំពុងប្រឈមនឹងការកើនឡើងនៃការឆ្លងមេរោគកូវីដ-១៩ ហើយបានធ្លាក់ចូលក្នុងភាពច្របូកច្របល់ គិតចាប់តាំងពីក្រុមយោធាបានដណ្តើមយកអំណាចមកគ្រប់គ្រងកាលពីថ្ងៃទី១ ខែកុម្ភៈ និងបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី។
ប្រធានទីភ្នាក់ងារ WFP ប្រចាំប្រទេសមីយ៉ាន់ម៉ា លោក Stephen Anderson បានឱ្យដឹងនៅក្នុងសេចក្តីថ្លែងការណ៍នេះថា៖ «យើងបានសង្កេតឃើញថា ភាពអត់ឃ្លានមានការរីករាលដាលកាន់តែខ្លាំងឡើងនៅក្នុងប្រទេសមីយ៉ាន់ម៉ា»។
អង្គការមនុស្សធម៌របស់ពិភពលោកមួយនេះបានប៉ាន់ប្រមាណផងដែរថា ប្រជាជនមីយ៉ាន់ម៉ាចំនួន៦,៣លាននាក់អាចប្រឈមមុខនឹងអសន្តិសុខស្បៀងក្នុងរយៈពេល៦ខែខាងមុខនេះ ពោលគឺកើនឡើងពី២,៨លាននាក់ មុនពេលក្រុមយោធាដណ្តើមអំណាចនៅខែកុម្ភៈ។
លោក Stephen Anderson បន្ថែមថា៖ «វាពិតជាមានសារៈសំខាន់ខ្លាំងណាស់សម្រាប់យើងក្នុងការជួយដល់អ្នកដែលត្រូវការ ដើម្បីផ្តល់ជាជំនួយមនុស្សធម៌ដល់ពួកគេ»៕