វ៉ាក់សាំង AstraZeneca ដែលជាជំនួយរបស់ប្រទេសជប៉ុនចំនួន ៦៧០ ០០០ ដូសទៀត បានមកដល់កម្ពុជាហើយ កាលពីយប់ថ្ងៃទី៦ ខែសីហា។
នេះគឺជាវ៉ាក់សាំងបាច់ទី២ក្នុងចំណោមវ៉ាក់សាំង ១ ០០០ ០០០ ដូស ដែលរដ្ឋាភិបាលជប៉ុនបានសន្យាផ្តល់ឱ្យប្រទេសកម្ពុជា ដើម្បីប្រយុទ្ធប្រឆាំងនឹងការឆ្លងរីករាលដាលនៃជំងឺកូវីដ-១៩។ វ៉ាក់សាំង AstraZeneca បាច់ទី១ ដែលជាជំនួយរបស់រដ្ឋាភិបាលជប៉ុន ចំនួន ៣៣០ ០០០ ដូសបានមកប្រទេសកម្ពុជា កាលពីថ្ងៃទី២៣ ខែកក្កដា។
គិតមកទល់ពេលនេះ រដ្ឋាភិបាលជប៉ុនបានផ្តល់ជំនួយគិតជាទឹកប្រាក់ប្រមាណជាង ៥០ លានដុល្លារអាមេរិកដល់កម្ពុជា នៅក្នុងបរិបទនៃកិច្ចសហប្រតិបត្តិការទ្វេភាគីដើម្បីទប់ទល់នឹងជំងឺកូវីដ-១៩នេះ។ ជំនួយទាំងនេះរួមមាន ការផ្ដល់ឧបករណ៍បរិក្ខារពេទ្យ ការកែលម្អមន្ទីរពេទ្យ ការគាំទ្រវិធានការទប់ស្កាត់ការចម្លងជំងឺតាមព្រំដែន ដោយមានការគាំទ្រពីអង្គការអន្តរជាតិនានា និងការផ្គត់ផ្គង់ប្រព័ន្ធត្រជាក់ដើម្បីរក្សាទុកនិងដឹកជញ្ជូនវ៉ាក់សាំងកូវីដ១៩ ឱ្យបានត្រឹមត្រូវ ដែលមានការគាំទ្រពីយូនីសេហ្វ (UNICEF) និងចៃកា (JICA) ជាដើម។
ក្រៅពីនេះ រដ្ឋាភិបាលជប៉ុនក៏បានផ្ដល់ជាកម្ចីប្រមាណ ២២៧លានដុល្លារអាមេរិក ដែលត្រួវបានប្រើប្រាស់ក្នុងកម្មវិធីឧបត្ថម្ភសាច់ប្រាក់ដល់ប្រជាជនកម្ពុជាដែលរងផលប៉ះពាល់ដោយសារជំងឺកូវីដ-១៩ និងសម្រាប់ពង្រឹងប្រព័ន្ធសុខាភិបាលកម្ពុជាផងដែរ។
ឯកអគ្គរាជទូតជប៉ុនប្រចាំនៅកម្ពុជាលោក មិកាមិ ម៉ាសាហ៊ីរ៉ូ បានសរសេរនៅក្នុងសេចក្តីប្រកាសព័ត៌មានកាលពីថ្ងៃទី៦ ខែសីហានេះដោយសង្ឃឹមថា ជំនួយទាំងនេះ នឹងអាចជួយគាំទ្រដល់កិច្ចខិតខំប្រឹងប្រែងរបស់រដ្ឋាភិបាលកម្ពុជាក្នុងការប្រយុទ្ធប្រឆាំងជាមួយនឹងជំងឺកូវីដ-១៩ ក៏ដូចជាអាចបន្ធូរបន្ថយក្តីកង្វល់មួយចំនួនរបស់ប្រជាជនកម្ពុជាបាន៕