ប្រទេសកូរ៉េខាងត្បូង ចាប់ផ្តើមបើកយុទ្ធនាការចាក់វ៉ាក់សាំងការពារជំងឺកូវីដ-១៩ដល់មនុស្សពេញវ័យទាំងអស់ដែលមានអាយុចាប់ពី១៨ឆ្នាំជាលើកដំបូង នៅថ្ងៃចន្ទនេះ ដើម្បីទប់ស្កាត់ការកើនឡើងនៃជំងឺរាតត្បាតដែលភាគច្រើនឆ្លងក្នុងចំណោមប្រជាជនវ័យក្មេងមិនទាន់បានចាក់វ៉ាក់សាំង។ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Reuters។
កូរ៉េខាងត្បូង ត្រូវបានចាត់ទុកថាជាប្រទេសមួយដែលគ្រប់គ្រងករណីជំងឺកូវីដ-១៩បានយ៉ាងល្អក្នុងអំឡុងពេលមានការរីករាលដាលនៃជំងឺរាតត្បាតដំបូង តាមរយៈការតាមដាននិងធ្វើតេស្តយ៉ាងហ្មត់ចត់។ ទោះជាយ៉ាងណា ភាពយឺតយ៉ាវក្នុងការផ្ដល់វ៉ាក់សាំងរបស់ប្រទេសនេះបានបណ្ដាលឱ្យមានការកើនឡើងនៃការឆ្លងជាច្រើនបង្កដោយវីរុសកូវីដ-១៩បំប្លែងខ្លួនថ្មី។
គិតត្រឹមយប់ថ្ងៃអាទិត្យម្សិលមិញនេះ ក្នុងចំណោមប្រជាជនកូរ៉េខាងត្បូងចំនួន៥២លាននាក់ ក្នុងនោះមានចំនួន៤៥%ទទួលបានការចាក់វ៉ាក់សាំងការពារជំងឺកូវីដ-១៩ យ៉ាងហោចណាស់ដូសទីមួយ និង ១៥%ទទួលបានការចាក់វ៉ាក់សាំងគ្រប់ដូស។
ជាមួយគ្នានេះផងដែរ ប្រទេសកូរ៉េខាងត្បូងក៏មានគោលបំណងក្នុងការចាក់វ៉ាក់សាំងការពារជំងឺកូវីដ-១៩ដល់ប្រជាជនរបស់ខ្លួនឱ្យបានជាង៧០% ត្រឹមខែកញ្ញាខាងមុខនេះ សម្រាប់អ្នកដែលមានអាយុពី១៨ឆ្នាំ ដល់៤៩ឆ្នាំ ដោយប្រើប្រាស់វ៉ាក់សាំងរបស់ក្រុមហ៊ុន Moderna ក្រុមហ៊ុនអាមេរិក Pfizer និងមន្ទីរពិសោធន៍អាល្លឺម៉ង់ BioNTech។
ទីភ្នាក់ងារគ្រប់គ្រង និងបង្ការជំងឺឆ្លងកូរ៉េ (KDCA) ក៏បានរាយការណ៍ពីការឆ្លងវីរុសកូវីដ-១៩ថ្មី ចំនួន១ ៤៩២ករណីផងដែរកាលពីថ្ងៃអាទិត្យម្សិលមិញនេះ ដែលធ្វើឱ្យតួលេខឆ្លងសរុបនៅក្នុងប្រទេសឈានដល់ចំនួន២១២ ៤៤៨ករណី និងអ្នកស្លាប់ចំនួន២ ១២៥នាក់ គិតចាប់តាំងពីការផ្ទុះឡើងដំបូងនៃជំងឺរាតត្បាត៕
