ប្រទេសបង់ក្លាដែស បានទទួលវ៉ាក់សាំងការពារជំងឺកូវីដ-១៩ ចំនួន៥,៦លានដូសពីសហរដ្ឋអាមេរិក ក្រោមក្របខណ្ឌរបស់កូវ៉ាក់ (COVAX) ខណៈប្រទេសនេះបានទិញវ៉ាក់សាំងរបស់មន្ទីរពិសោធន៍ចិន Sinopharm ចំនួន២លានដូសបន្ថែមទៀតពីទីក្រុងប៉េកាំងផងដែរ។
ទាក់ទិននឹងករណីនេះ រដ្ឋមន្ត្រីក្រសួងការបរទេសបង់ក្លាដែស លោក Abul Kalam Abdul Momen មានសុទិដ្ឋិនិយមថា បញ្ហាកង្វះវ៉ាក់សាំងការពារជំងឺកូវីដ-១៩ នឹងត្រូវបញ្ចប់ក្នុងពេលឆាប់ៗខាងមុខនេះ ខណៈដែលទីក្រុងដាកា រំពឹងថា នឹងមានការផ្គត់ផ្គង់វ៉ាក់សាំងពីប្រភពផ្សេងៗគ្នាជាច្រើនទៀត។
វ៉ាក់សាំងការពារជំងឺកូវីដ-១៩ជាច្រើនដូសបន្ថែមទៀតពីសហរដ្ឋអាមេរិកនឹងទៅដល់ប្រទេសបង់ក្លាដែសក្នុងរយៈពេលប៉ុន្មានខែខាងមុខនេះ។ ជាមួយគ្នានេះដែរ ក្រសួងសុខាភិបាលបង់ក្លាដែសក៏បានចុះហត្ថលេខាលើកិច្ចព្រមព្រៀងទិញវ៉ាក់សាំងចិនចំនួន១៥លានដូសបន្ថែមទៀតផងដែរ។
ប្រទេសបង់ក្លាដែស កាលពីខែកក្កដាកន្លងទៅ បានចាប់ផ្តើមកម្មវិធីចាក់វ៉ាក់សាំងការពារជំងឺកូវីដ-១៩ក្នុងទ្រង់ទ្រាយធំឡើងវិញ បន្ទាប់ពីមានការផ្អាកដែលបណ្តាលមកពីកង្វះការផ្គត់ផ្គង់វ៉ាក់សាំង។
នៅក្នុងបទសម្ភាសន៍ជាមួយសារព័ត៌មាន A24 News លោកវេជ្ជបណ្ឌិត Wahidur Rahman ជាបុគ្គលិកសុខាភិបាលនៅមន្ទីរពេទ្យ Dhaka Medical College Hospital បានឱ្យដឹងថា៖ «ដូចអ្វីដែលយើងបានឃើញ មនុស្សម្នាបានមកតម្រង់ជួរនៅខាងក្រៅ ខណៈដែលយើងផ្ដល់វ៉ាក់សាំងការពារជំងឺកូវីដ-១៩ដល់ប្រជាជនក្នុងតំបន់និងកម្មករចំណាកស្រុកប្រមាណជា១ ៥០០នាក់ជារៀងរាល់ថ្ងៃ។ ក្រៅពីមជ្ឈមណ្ឌលនេះ យើងក៏មានមជ្ឈមណ្ឌលវ៉ាក់សាំងដាច់ដោយឡែកមួយទៀត សម្រាប់តែនិស្សិតពេទ្យផងដែរ។ កាលពីពេលកន្លងទៅ យើងត្រូវលើកទឹកចិត្តដល់មនុស្សគ្រប់គ្នាឱ្យមកចាក់វ៉ាក់សាំង ប៉ុន្តែសកម្មភាពនោះត្រូវបានផ្លាស់ប្តូរ។ ពលករចំណាកស្រុក នាពេលបច្ចុប្បន្ននេះ ចង់ទទួលបានវ៉ាក់សាំងក្នុងពេលឆាប់ៗ ដោយសារតែពួកគេត្រូវការវិញ្ញាបនបត្រចាក់វ៉ាក់សាំង ដើម្បីធ្វើដំណើរត្រឡប់ទៅវិញ»។
លោកឧត្តមសេនីយ៍ត្រី Nazmul Haque ប្រធានមន្ទីរពេទ្យ Dhaka Medical College Hospital បានថ្លែងថា៖ «មនុស្សគ្រប់រូបត្រូវតែចាក់វ៉ាក់សាំងដើម្បីសុវត្ថិភាពផ្ទាល់ខ្លួន ខណៈដែលពួកគេគ្មានជម្រើសអ្វីផ្សេងនោះទេ ហើយរដ្ឋាភិបាលកំពុងតែធ្វើការលើករណីនេះ។ យើងបានជម្នះលើបញ្ហាកង្វះវ៉ាក់សាំង ដោយសារការផ្គត់ផ្គង់របស់ក្រុមហ៊ុន AstraZeneca មានការរំខាន ហើយបច្ចុប្បន្ននេះ យើងកំពុងតែព្យាយាមចាក់វ៉ាក់សាំងដល់ប្រជាជនភាគច្រើនឱ្យបានឆាប់តាមដែលអាចធ្វើទៅបាន។ សង្ឃឹមថា ត្រឹមខែកក្កដា និងសីហានេះ យើងនឹងសម្រេចបាននូវតួលេខចាក់វ៉ាក់សាំងគួរឱ្យកត់សម្គាល់មួយ។ បច្ចុប្បន្ន អាយុដែលត្រូវបានអនុញ្ញាតឱ្យចុះឈ្មោះចាក់វ៉ាក់សាំង គឺទាបបំផុត២៥ឆ្នាំ ហើយក្នុងពេលឆាប់ៗនេះ យើងនឹងបើកសម្រាប់អ្នករាល់គ្នា ដើម្បីឱ្យពួកគេទាំងអស់គ្នាអាចការពារបាន»។
លោកសាស្រ្តាចារ្យ Nazmul Islam នាយកគ្រប់គ្រងជំងឺនៅអគ្គនាយកដ្ឋានសេវាសុខភាព (Directorate General of Health Service) ថ្លែងថា៖ «កូវ៉ាក់នឹងផ្ដល់វ៉ាក់សាំងចំនួន៦០,៨លានដូសដល់ប្រទេសបង់ក្លាដែស ខណៈដែលយើងបានទទួលវ៉ាក់សាំងរបស់ក្រុមហ៊ុន Moderna ចំនួន៥,៥លានដូស និងរបស់ក្រុមហ៊ុនអាមេរិក Pfizer ជាង១លានដូស រួចទៅហើយកាលពីពេលកន្លងទៅ។ ជាមួយគ្នានេះ យើងក៏បានទទួលអំណោយជាវ៉ាក់សាំងពីប្រទេសចិន ហើយក៏បានចុះកិច្ចព្រមព្រៀងទិញវ៉ាក់សាំងចិនចំនួន១៥លានដូសបន្ថែមទៀតផងដែរ។ ទម្រង់បែបបទមួយចំនួននៃការទិញវ៉ាក់សាំងចំនួន៣០លានដូសពីវិទ្យាស្ថាន Serum Institute ត្រូវបានបញ្ចប់រួចរាល់ហើយ ខណៈដែលគំនិតផ្តួចផ្តើមមួយទៀតក្នុងការទិញវ៉ាក់សាំងរបស់ក្រុមហ៊ុនឱសថអាមេរិក Johnson & Johnson ក៏ត្រូវបានធ្វើឡើងផងដែរ។ នៅពេលដែលការផ្គត់ផ្គង់វ៉ាក់សាំងពីប្រភពទាំងនោះត្រូវបានផ្ដល់ជូន យើងនឹងអាចបន្តការចាក់វ៉ាក់សាំងក្នុងទ្រង់ទ្រាយធំកាន់តែមានប្រសិទ្ធភាពបន្ថែមទៀត»៕
