ក្រុមមន្ត្រីបានឱ្យដឹងថា ប្រទេសបង់ក្លាដែសបានចាប់ផ្តើមចាក់វ៉ាក់សាំងការពារជំងឺកូវីដ-១៩ដល់ជនជាតិភាគតិចមូស្លីមរ៉ូហ៊ីងយ៉ារាប់ពាន់នាក់ នៅថ្ងៃអង្គារនេះ ស្របពេលដែលមានការកើនឡើងធ្ងន់ធ្ងរនៃការឆ្លងជំងឺកូវីដ-១៩នៅក្នុងប្រទេសនេះ។
លោក Mahbubur Rahman ប្រធានមន្រ្តីសុខាភិបាលនៅក្នុងតំបន់ Cox’Bazar ត្រូវបានដកស្រង់សម្ដីដោយទីភ្នាក់ងារសារព័ត៌មាន Reuters យកមកចុះផ្សាយថា៖ «ជនភៀសខ្លួនរ៉ូហ៊ីងយ៉ាប្រមាណជា៤៨ ០០០នាក់ដែលមានអាយុចាប់ពី៥៥ឆ្នាំឡើងទៅ នឹងត្រូវទទួលបានវ៉ាក់សាំងការពារជំងឺកូវីដ-១៩ នៅចន្លោះថ្ងៃអង្គារដល់ថ្ងៃព្រហស្បតិ៍សប្ដាហ៍នេះ ដោយមានជំនួយពីទីភ្នាក់ងារអង្គការសហប្រជាជាតិ»។
លោក Mahbubur Rahman បានថ្លែងប្រាប់ទីភ្នាក់ងារសារព័ត៌មាន Reuters តាមរយៈទូរសព្ទពីទីតាំងចាក់វ៉ាក់សាំងមួយកន្លែងថា៖ «សកម្មភាពនេះគ្រាន់តែជាការចាប់ផ្តើមដំបូងប៉ុណ្ណោះ ខណៈដែលជនភៀសខ្លួនរ៉ូហ៊ីងយ៉ាពេញវ័យទាំងអស់នឹងទទួលបានការចាក់វ៉ាក់សាំងជាដំណាក់កាល»។
គួរបញ្ជាក់ថា ប្រទេសបង់ក្លាដែសបាននិងកំពុងប្រយុទ្ធប្រឆាំងនឹងការកើនឡើងនៃការឆ្លងនិងស្លាប់ដែលបង្កដោយជំងឺរាតត្បាតនៅក្នុងរយៈពេលប៉ុន្មានសប្តាហ៍ចុងក្រោយនេះ ខណៈប្រទេសនេះមានការឆ្លងសរុបជាង១លានករណី និងស្លាប់បាត់បង់ជីវិតចំនួន២២ ៨៩៧នាក់។
ប្រធានសហព័ន្ធអន្តរជាតិកាកបាទក្រហម អឌ្ឍចន្ទក្រហម (IFRC) ប្រចាំនៅក្នុងតំបន់ Cox’Bazar លោក Hrusikesh Harichandan ក៏បានថ្លែងដែរថា៖ «ប្រជាជននៅក្នុងជុំរុំទាំងនេះកំពុងតែរស់នៅដោយប្រឈមនឹងហានិភ័យនៃការឆ្លងជំងឺរាតត្បាតខ្ពស់។ ការចាក់វ៉ាក់សាំងគឺពិតជាមានសារៈសំខាន់ ដើម្បីការពារការឆ្លងមេរោគដ៏សាហាវនេះ»។
លោកបន្ថែមថា៖ «យើងត្រូវការកិច្ចប្រឹងប្រែងរួមគ្នាដោយទីភ្នាក់ងារជាតិនិងអង្គការអន្តរជាតិនានា ដើម្បីជួយចាក់វ៉ាក់សាំងដល់មនុស្សពេញវ័យទាំងអស់នៅក្នុងជុំរុំនេះ»៕