គណបក្សភ្លើងទៀន បានប្រកាសពន្យារពេលការធ្វើសមាជសាមញ្ញគណបក្សដែលគ្រោងធ្វើនៅថ្ងៃទី២២ ខែសីហា ឆ្នាំ២០២១នេះ ដោយលើកហេតុផលបារម្ភពីការឆ្លងរាលដាលនៃជំងឺកូវីដ-១៩ប្រភេទថ្មី Delta។
សេចក្តីប្រកាសព័ត៌មានរបស់គណបក្សភ្លើងទៀន នៅថ្ងៃនេះ បានឱ្យដឹងថា គណៈកម្មាធិការអចិន្ត្រៃយ៍គណបក្សបានសម្រេចពន្យារពេលធ្វើសមាជនៅថ្ងៃទី២២ ខែសីហានេះ បន្ទាប់ពីបានឃើញស្ថានភាពជំងឺកូវីដ-១៩បំប្លែងថ្មីកំពុងរីករាលដាលគួរឱ្យព្រួយបារម្ភ។
ម្យ៉ាងទៀត គណបក្សនេះថា ជំងឺកូវីដ-១៩បំប្លែងថ្មីនេះមានលក្ខណៈសាហាវនិងឆ្លងពីមនុស្សម្នាក់ទៅមនុស្សម្នាក់ទៀតយ៉ាងឆាប់រហ័ស ទើបគណៈកម្មាធិការអចិន្ត្រៃយ៍គណបក្សបានប្រជុំសម្រេចនៅថ្ងៃនេះ លើកពេលធ្វើសមាជសាមញ្ញគណបក្សភ្លើងទៀន នៅថ្ងៃទី២២ ខែសីហា រហូតដល់មានការជូនដំណឹងជាថ្មី។
សូមជម្រាបថា គម្រោងធ្វើសមាជសាមញ្ញរបស់«គណបក្សភ្លើងទៀន»ដែលមានដើមកំណើតមកពីគណបក្ស សម រង្ស៊ីនោះ គឺដើម្បីពិភាក្សាទៅលើការធ្វើវិសោធនកម្មប្រការមួយចំនួននៃលក្ខន្តិកៈគណបក្ស និងរៀបចំជ្រើសរើសថ្នាក់ដឹកនាំគណបក្សសម្រាប់អាណត្តិថ្មី ព្រមទាំងកំណត់យុទ្ធសាស្រ្តនយោបាយរបស់គណបក្សផងដែរ។
គិតចាប់តាំងពីថ្ងៃទី៣១ ខែមីនា ដល់ថ្ងៃទី៧ ខែសីហា ឆ្នាំ២០២១ កម្ពុជាបានរកឃើញវីរុសកូវីដ-១៩បំប្លែងថ្មីប្រភេទ Delta ចំនួន៣៨៥នាក់។
កាលពីថ្ងៃទី៨ ខែសីហា ក្រសួងសុខាភិបាលបានប្រកាសថា វីរុសកូវីដ-១៩បំប្លែងថ្មីប្រភេទ Delta កំពុងពង្រីកខ្លួនយ៉ាងលឿនដល់ជិត២០រាជធានី-ខេត្តហើយ ដែលតម្រូវឱ្យពលរដ្ឋបន្តចូលរួមគោរពវិធានសុខាភិបាលឱ្យបានខ្ជាប់ខ្ជួន ដើម្បីកាត់ផ្តាច់រលកចម្លង៕
