ប្រទេសឥណ្ឌូនេស៊ី បានពង្រីកវិធានការទប់ស្កាត់វីរុសកូវីដ-១៩របស់ខ្លួនបន្ថែមទៀតនៅលើកោះជ្វា (Java) និងកោះបាលី (Bali) រហូតដល់ថ្ងៃទី១៦ ខែសីហា។
ខណៈដែលឥណ្ឌូនេស៊ីត្រូវបានចាត់ទុកថាជាប្រទេសមួយក្នុងតំបន់អាស៊ីដែលរងផលប៉ះពាល់ធ្ងន់ធ្ងរដោយសារជំងឺរាតត្បាតកូវីដ-១៩នោះ អាជ្ញាធរប្រទេសនេះបានសម្រេចរឹតបន្តឹងការធ្វើដំណើរបម្លាស់ទីរបស់ប្រជាពលរដ្ឋ ដើម្បីទប់ស្កាត់ការរីករាលដាលនៃវីរុសកូវីដ-១៩បំប្លែងខ្លួនថ្មីប្រភេទ Delta ដែលឆ្លងខ្លាំងនៅកោះជ្វា និងកោះបាលី នៅដើមខែកក្កដា។
ទីភ្នាក់ងារសារព័ត៌មាន Reuters បានស្រង់សម្ដីទេសរដ្ឋមន្ត្រីទទួលបន្ទុកលើកិច្ចការប្រយុទ្ធប្រឆាំងជំងឺកូវីដ-១៩ ប្រទេសឥណ្ឌូនេស៊ី លោក Luhut Pandjaitan ដែលបានថ្លែងកាលពីល្ងាចថ្ងៃចន្ទថា៖ «សូមកុំបណ្តោយឱ្យកិច្ចខិតខំប្រឹងប្រែងដែលយើងសម្រេចបានដោយលំបាកបាត់បង់ទៅវិញឱ្យសោះ»។
លោកបន្ថែមថា ទីតាំងផ្សារទំនើបមួយចំនួននឹងបើកដំណើរការឡើងវិញ សម្រាប់អ្នកដែលបានចាក់វ៉ាក់សាំងរួចរាល់ លើកលែងតែកុមារនិងមនុស្សចាស់ ខណៈដែលពួកគេតម្រូវឱ្យបង្ហាញលិខិតបញ្ជាក់អំពីការចាក់វ៉ាក់សាំងរបស់ពួកគេផងដែរ។
ជាមួយគ្នានេះដែរ វិធានការរឹតត្បិតនៅក្នុងតំបន់ខាងក្រៅកោះជ្វា និងកោះបាលី ក៏នឹងត្រូវបន្តរហូតដល់ថ្ងៃទី២៣ ខែសីហា ខណៈករណីឆ្លងបានកើនឡើងចំនួន១,២%។
ទិន្នន័យរបស់រដ្ឋាភិបាលបានបង្ហាញថា នៅក្នុងទីក្រុងហ្សាកាតា ការឆ្លងវីរុសកូវីដ-១៩ថ្មីមានចំនួន៧២៧ករណីនៅថ្ងៃចន្ទម្សិលមិញនេះ។
គួរបញ្ជាក់ថា គិតរហូតមកដល់បច្ចុប្បន្ននេះ ប្រជាជនឥណ្ឌូនេស៊ីជាង៥០លាននាក់ទទួលបានការចាក់វ៉ាក់សាំងការពារជំងឺកូវីដ-១៩ យ៉ាងហោចណាស់ដូសទីមួយ ខណៈដែលជាង២៣លាននាក់ផ្សេងទៀតទទួលបានចាក់វ៉ាក់សាំងគ្រប់ដូស៕