ក្រសួងសុខាភិបាលមិនអនុញ្ញាតឱ្យអ្នកជំងឺកូវីដ-១៩បំប្លែងថ្មីប្រភេទ “ដែលតា (Delta)” សម្រាកព្យាបាលជំងឺនៅតាមផ្ទះនោះឡើយ។
យោងតាមលិខិតរបស់រដ្ឋមន្ត្រីក្រសួងសុខាភិបាល លោក ម៉ម ប៊ុនហេង កាលពីថ្ងៃទី៩ ខែសីហា ឱ្យដឹងថា ដោយផ្អែកទៅតាមទិន្នន័យផ្នែកអេពីដេមីសាស្ត្រនៃការឆ្លងរាលដាលវីរុសកូវីដ-១៩បំប្លែងខ្លួនថ្មីប្រភេទ ដែលតា (Delta Variant) ព្រមទាំងការសិក្សាស្រាវជ្រាវពីលទ្ធភាពចម្លង និងរយៈពេលសកម្មរបស់វីរុសបំប្លែងខ្លួនថ្មីនេះ ក្រសួងមិនអនុញ្ញាតឱ្យអ្នកជំងឺកូវីដ-១៩បំប្លែងថ្មីប្រភេទ “ដែលតា (Delta)” សម្រាកព្យាបាលនៅតាមផ្ទះនោះឡើយ។
ក្រសួងបន្តថា ការសម្រាកព្យាបាលគឺតម្រូវឱ្យទៅទទួលការព្យាបាលនៅមណ្ឌលព្យាបាលជំងឺកូវីដ-១៩ ឬមន្ទីរពេទ្យព្យាបាលជំងឺកូវីដ-១៩ដែលបានកំណត់អាស្រ័យទៅតាមកត្តាសុខភាពជាក់ស្តែងរបស់អ្នកជំងឺ។ ការហាមឃាត់នេះ គឺអនុវត្តទាំងចំពោះករណីនាំចូលពីក្រៅប្រទេស និងករណីឆ្លងនៅក្នុងសហគមន៍។
កាលពីថ្ងៃទី៨ ខែសីហា ក្រសួងសុខាភិបាលបានប្រកាសដែរថា វីរុសកូវីដ-១៩បំប្លែងថ្មីប្រភេទ Delta កំពុងពង្រីកខ្លួនយ៉ាងលឿនដល់ជិត២០រាជធានី-ខេត្តហើយ ដែលតម្រូវឱ្យពលរដ្ឋបន្តចូលរួមគោរពវិធានសុខាភិបាលឱ្យបានខ្ជាប់ខ្ជួន ដើម្បីកាត់ផ្តាច់រលកចម្លង។
តាមសេចក្តីជូនដំណឹងរបស់ក្រសួងសុខាភិបាល ចុះថ្ងៃទី៨ ខែសីហា ឆ្នាំ២០២១ ឱ្យដឹងថា លទ្ធផលនៃការធ្វើវិភាគដោយវិទ្យាស្ថានប៉ាស្ទ័រ ចុះថ្ងៃទី៧ ខែសីហា បានបង្ហាញពីការរកឃើញករណីឆ្លងវីរុសកូវីដ-១៩បំប្លែងថ្មី ប្រភេទ Delta ចំនួន៥៨ករណីបន្ថែមទៀត ក្នុងនោះ វីរុសនេះបានវាយលុកចូលក្នុងសហគមន៍ ជាពិសេសនៅខេត្តឧត្ដរមានជ័យ រាជធានីភ្នំពេញ ខេត្តសៀមរាប ព្រះវិហារ កំពង់ចាម កំពង់ធំ និងបណ្តាខេត្តមួយចំនួនទៀត។
បើគិតចាប់តាំងពីថ្ងៃទី៣១ ខែមីនា ដល់ថ្ងៃទី៧ ខែសីហា ឆ្នាំ២០២១ ពោលគឺរយៈពេលជាង៤ខែប៉ុណ្ណោះ កម្ពុជាបានរកឃើញវីរុសបំប្លែងថ្មី Delta នេះ ចំនួន៣៨៥នាក់ ក្នុងនោះមានស្រី្ត១៨៧នាក់ ដែលឆ្លងលើពលរដ្ឋខ្មែរត្រឡប់ពីប្រទេសថៃ បុគ្គលិកសុខាភិបាល ពលរដ្ឋក្នុងសហគមន៍ និងអ្នកដំណើរតាមជើងហោះហើរចូលកម្ពុជា ជាដើម៕
