អាជ្ញាធររាជធានីភ្នំពេញ បានឃាត់យានយន្តដែលល្មើសបម្រាមគោចរក្នុងរយៈពេល១សប្តាហ៍នេះបានជិត២ ០០០គ្រឿង ខណៈមនុស្សជិត៣០នាក់ត្រូវបានបញ្ជូនទៅកាន់តុលាការ។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោកវរសេនីយ៍ឯក សាន សុខសីហា មានប្រសាសន៍ថា ចាប់តាំងពីថ្ងៃទី៣ ខែសីហា ដល់ថ្ងៃទី១០ ខែសីហានេះ អាជ្ញាធររាជធានីភ្នំពេញបានឃាត់យានយន្តដែលល្មើសបម្រាមគោចរចំនួន១ ៧៩៨គ្រឿង ក្នុងនោះមានរថយន្តចំនួន៥៥២គ្រឿង ខណៈយានយន្តចំនួន៤៦៣គ្រឿងបានផាកពិន័យរួចរាល់។ បើតាមការកត់សម្គាល់របស់អ្នកនាំពាក្យរូបនេះ មួយរយៈពេលចុងក្រោយនេះ អ្នកល្មើសបម្រាមគោចរនៅក្នុងរាជធានីភ្នំពេញ បានធ្លាក់ចុះ។
ដោយឡែក យោងតាមសេចក្តីជូនដំណឹងស្តីពីលទ្ធផលអនុវត្តវិធានការច្បាប់ចំពោះបុគ្គលដែលល្មើសនឹងវិធានការសុខាភិបាលនិងវិធានការរដ្ឋបាល សម្រាប់ថ្ងៃទី១០ ខែសីហា ឆ្នាំ២០២១ អាជ្ញាធរបានចុះអនុវត្តវិធានការច្បាប់ចំនួន៩៤១ករណី ឃាត់ខ្លួន (អប់រំនិងពិន័យ) ចំនួន១ ៦៨២នាក់ ឃាត់យានយន្តចំនួន៨១១គ្រឿង និងពិន័យជាប្រាក់ ចំនួន៤៦ ១០០ ០០០រៀល។ ប៉ុន្តែមិនមានករណីបញ្ជូនទៅតុលាការទេ។
គួរជម្រាបថា ការអនុវត្តបម្រាមគោចរដើម្បីបង្ការការឆ្លងជំងឺកូវីដ-១៩នៅក្នុងរាជធានីភ្នំពេញ បានអនុវត្តចាប់តាំងពីថ្ងៃទី២៩ ខែកក្កដា ហើយនឹងត្រូវបញ្ចប់នៅត្រឹមថ្ងៃទី១២ ខែសីហា ស្អែកនេះ៕
