អង្គការសង្គមស៊ីវិលមួយចំនួនដែលធ្វើការពាក់ព័ន្ធនឹងស្ត្រី បង្ហាញពីក្តីបារម្ភចំពោះការប្រើប្រាស់ភាសាបន្តុះបង្អាប់វាយប្រហារគ្នាដោយពាក្យសម្តីនៅលើបណ្តាញសង្គម ខណៈសកម្មភាពនេះផ្តល់គំរូមិនល្អក្នុងសង្គមនិងប៉ះពាល់ដល់សតិអារម្មណ៍ជនរងគ្រោះ ដែលពិបាកនឹងប៉ាន់ស្មានពីទំហំនៃផលវិបាកនោះបាន។
ការបន្តុះបង្អាប់ ឬ (Bully) ត្រូវបានគេឱ្យនិយមន័យថា ជាការប្រើពាក្យពេចន៍ប្រមាថ គំរាមកំហែងដល់សតិអាម្មណ៍ ឬធ្វើឱ្យមានអារម្មណ៍ថាគ្មានផាសុកភាព។
អ្នកជំនាញជារឿយៗបានលើកឡើងថា ការបន្តុះបង្អាប់តាមបណ្តាញសង្គមបានបង្កឱ្យមានផលអវិជ្ជមានទាំងផ្ទាល់និងប្រយោលច្រើនណាស់ ជាពិសេសការបន្តុះបន្អាប់ទៅលើស្ត្រី។ ការរិះគន់ខ្លះធ្វើឡើងដោយផ្ទាល់ឬប្រយោលផ្តោតលើរូបរាងកាយ សម្រស់ និងរសនិយមជាដើម ហើយអ្នកប្រព្រឹត្តនឹងស្តែងចេញតាមរយៈការវាយប្រហារបុគ្គលផ្សេងទៅតាមរូបភាពផ្សេងៗគ្នា។
អគ្គលេខាធិការរបស់ក្រុមគណៈកម្មាធិការនៃអង្គការមិនមែនរដ្ឋាភិបាល ដើម្បីលុបបំបាត់រាល់ទម្រង់នៃការរើសអើងលើស្ត្រីភេទ ហៅកាត់ថា អិន.ជី.អូ ស៊ីដ (NGO CEDAW) អ្នកស្រី ជឹម ចាន់នាង មានប្រសាសន៍នៅថ្ងៃទី៩ ខែសីហា ឆ្នាំ២០២១ ថាគ្រប់ទម្រង់ទាំងអស់នៃការបន្តុះបង្អាប់ (Bully) ឬការបំពានតាមអនឡាញ សុទ្ធតែផ្តល់នូវផលប៉ះពាល់ ហើយមានតែបុគ្គលដែលរងគ្រោះប៉ុណ្ណោះទើបដឹងពីទំហំនៃផលប៉ះពាល់នេះ។
អ្នកស្រីមានប្រសាសន៍ថា៖ «ការិះគន់បន្សល់ជាស្លាកស្នាមដិតដាមនៅជាប់សតិអារម្មណ៍។ មានជនរងគ្រោះមួយចំនួនដោយសារត្រូវគេរិះគន់ពីរូបរាងកាយរបស់ខ្លួន បានសម្រេចចិត្តកែសម្ផស្សដើម្បីតម្រូវចិត្តមនុស្សជុំវិញខ្លួន ប៉ុន្តែនៅតែមិនត្រូវចិត្តគេ។ ការរកសេវាខ្លះបង្កគ្រោះថ្នាក់ដល់សុខភាពក្រោយកែសម្ផស្សជាដើម។ ចំណែកអ្នកខ្លះទៀត តូចចិត្តដល់ថ្នាក់សម្រេចចិត្តធ្វើអត្តឃាតក៏មាន នេះជាផលប៉ះពាល់ផ្ទាល់ដល់ជនរងគ្រោះ»។
អ្នកស្រីមើលឃើញថា ការប្រើប្រាស់បណ្តាញសង្គមសព្វថ្ងៃហាក់មានលក្ខណៈទូលំទូលាយខ្លាំង ដោយសារអ្នកប្រើប្រាស់មួយចំនួនមិនបានដឹងពីរបៀបប្រើ ខណៈការយល់ដឹងរបស់គាត់នៅមានកម្រិត ពោលគឺចូលទៅផ្តល់មតិ ឬខំមិន (Comment) ចែកចាយឬស៊ែរ (Share) ឬកាត់តរូបអ្នកដទៃយកទៅបង្ហោះនៅលើបណ្តាញសង្គម ដោយមិនដឹងថា ទង្វើដែលប្រព្រឹត្តអាចប៉ះពាល់អ្វីខ្លះដល់បុគ្គលទាំងនោះទេ។
អ្នកស្រី ជឹម ចាន់នាង អះអាងថា ការបន្តុះបង្អាប់ (Bully) មិនមែនជារឿងសាមញ្ញឡើយ ហើយការបន្តឱ្យមានសកម្មភាពនេះអាចធ្វើឱ្យប៉ះពាល់ដល់ស្ថិរភាពសង្គមទាំងមូលដោយមិនអាចស្មានដឹង។ អ្នកស្រីថា ស្ថាប័នរដ្ឋាភិបាលដែលមានជំនាញ គួរចាប់ផ្តើមតាមដាននិងស្រាវជ្រាវរកឫសគល់នៃបញ្ហា រួចធ្វើការដោះស្រាយ និងផ្សព្វផ្សាយឱ្យបានទូលាយ ពីផលវិបាកនៃសកម្មភាពបន្តុះបង្អាប់ (Bully) នៅលើអនឡាញនេះ។
នាយិកាអង្គការយេនឌ័រ និងអភិវឌ្ឍន៍ដើម្បីកម្ពុជា (GADC) អ្នកស្រី រស់ សុភាព បានលើកឡើងស្រដៀងគ្នាថា ការបន្តុះបង្អាប់តាមបណ្តាញសង្គមបច្ចុប្បន្នកាន់តែងាយស្រួលនិងខ្លាំងជាងមុន ដែលធ្វើឱ្យមនុស្សលែងគោរពសិទ្ធិគ្នា ព្រមទាំងបង្ហាញពីភាពខ្វះសីលធម៌នៅក្នុងសង្គមផងដែរ។
អ្នកស្រីថែ្លងថា៖ «តាំងពីមានបណ្តាញសង្គមមក ការបន្តុះបង្អាប់កាន់តែខ្លាំងក្លានិងងាយស្រួល។ មនុស្សមិនស្គាល់គ្នាសោះ ក៏អាចបន្តុះបង្អាប់បាន ទាំងដែលអ្នកបន្តុះបង្អាប់និងអ្នករងគ្រោះមើលមុខគ្នាមិនឃើញ។ វាធ្វើឱ្យមនុស្សលែងគោរពគ្នា រំលោភសិទ្ធិមនុស្ស និងសង្គមបាត់បង់ក្រមសីលធម៌។ អ្នកខ្លះបាក់ស្បាត ខូចសុខភាពផ្លូវចិត្ត បាត់បង់ភាពក្លាហាន លែងចង់បញ្ចេញមតិយោបល់ ឬមិនចង់ទៅណាមកណាទៀតផង។ ខ្ញុំមានអារម្មណ៍ថា សោកស្តាយនិងព្រួយបារម្ភណាស់លើអ្នកប្រើបណ្តាញសង្គមមួយសព្វថ្ងៃ»។
អ្នកស្រី រស់ សុភាព បន្តថា ការបញ្ចេញមតិជាសេរីភាពពិតមែន តែត្រូវស្ថិតក្រោមក្រមសីលធម៌។ អ្នកស្រីថា មនុស្សគ្រប់រូបមានសិទ្ធិនិយាយ តែបើនិយាយប៉ះពាល់ដល់អ្នកដទៃ នោះមានន័យថា រំលោភសិទ្ធិរបស់អ្នកដទៃ។ ជាដំណោះស្រាយ អ្នកស្រីថា ប្រព័ន្ធផ្សព្វផ្សាយគួរមាននាទីសម្រាប់ផ្សព្វផ្សាយពីសីលធម៌និងវប្បធម៌ ដើម្បីពង្រឹងនិងអភិវឌ្ឍការគិតរបស់មនុស្ស ហើយកម្មវិធីសិក្សាគួរមាននាទីវប្បធម៌និងពង្រឹងការអនុវត្តផងដែរ។
នាយិកាប្រតិបត្តិនៃអង្គការកម្ពុជាដើម្បីជួយស្ត្រីមានវិបត្តិ អ្នកស្រី ប៉ុក បញ្ញាវិចិត្រ មានប្រសាសន៍ថា រូបរាងខាងក្រៅរបស់ស្ត្រីអាចនឹងត្រូវបានគេរិះគន់និងបន្តុះបង្អាប់ ប៉ុន្តែមនុស្សគ្រប់រូបមិនអាចធ្វើអ្វីមួយឱ្យគេពេញចិត្តទាំងអស់ឡើយ។ អ្នកស្រីបន្តថា ស្ត្រីអាចរក្សាជំហររឹងមាំលើចំណេះដឹងនិងសមត្ថភាពរបស់ខ្លួន ជាជាងគិតតែរូបរាងខាងក្រៅ ដោយធ្វើយ៉ាងណាឱ្យសង្គមទទួលយកឱ្យបាន។
អ្នកស្រីថ្លែងថា៖ «អ្នកទិតៀនស្ត្រី ជាមនុស្សមិនយល់ដឹងពីសង្គម មិនយល់ពីតម្លៃស្រ្តី។ បើយកសម្តីអ្នកដទៃមកបន្ទាបតម្លៃរបស់ខ្លួនឯង នោះយើងមិនមែនជាស្រ្តីជើងខ្លាំងដែលចង់កែប្រែសង្គមទេ»។
ទាក់ទងនឹងការបន្តុះបង្អាប់នៅលើបណ្តាញអ៊ីនធឺណិត អ្នកស្រី បញ្ញាវិចិត្រ សង្កេតឃើញថា មានទាំងទៅលើបុរសនិងស្រ្តី តែស្រ្តីរងគ្រោះពីការរិះគន់នេះខ្លាំងជាងបុរស។
អ្នកស្រីបន្តថា៖ «ផលប៉ះពាល់ទៅលើបុរសខុសពីស្ត្រី។ ឧទាហរណ៍ និយាយឱ្យអស់ បុរសទោះបីមានចំណុចខ្វះខាតយ៉ាងណាក៏ដោយ ក៏នៅតែរកភរិយាបាន តែស្ត្រីវិញបើជួបប្រទះការវាយកម្ទេចខ្លាំង គឺជីវិតរបស់នាងនឹងចុះតែម្តង ជាពិសេសនៅលើអនឡាញ។ អាវុធហ្វេសប៊ុកជាអាវុធដ៏ខ្លាំងក្លាបំផុត សឹងតែស្មើនឹងអាវុធនុយក្លេអ៊ែរ។ អ៊ឹចឹងបានជាខ្ញុំចង់ឱ្យសេរីភាពនៃការបញ្ចេញមតិរបស់មនុស្សម្នាក់ៗនៅលើសង្គមហ្វេសប៊ុក សូមឱ្យពិចារណាថាតើវាមានផលលំបាកអ្វីនិងចំណេញអ្វី»។
អនុប្រធាននាយកដ្ឋានការពារផ្លូវច្បាប់នៃក្រសួងកិច្ចការនារី អ្នកស្រី ស ស៊ីណែត បានទទួលស្គាល់ថា ការបន្តុះបង្អាប់រូបរាងកាយស្ត្រី ជាទង្វើដែលមិនអាចទទួលយកបានទាល់តែសោះ។ អ្នកស្រីបន្តថា អ្នកដែលបញ្ចេញមតិរិះគន់និងបន្តុះបង្អាប់អ្នកដទៃនៅលើបណ្តាញសង្គម បានធ្វើឱ្យប៉ះពាល់ដល់សតិអារម្មណ៍និងផ្លូវចិត្តរបស់អ្នកទទួល។ បញ្ហានេះ អ្នកស្រីទាមទារឱ្យបុគ្គលម្នាក់ៗចូលរួមទប់ស្កាត់ទាំងអស់គ្នា។
អ្នកស្រី ស ស៊ីណែត៖ «យើងត្រូវស្គាល់ពីតម្លៃរបស់បុគ្គលម្នាក់ៗនិងសមត្ថភាពរបស់គេ ដោយមិនត្រូវជាន់ឈ្លីអ្នកដទៃឡើយ។ ដើម្បីកាត់បន្ថយការបៀតបៀនតាមអនឡាញ យើងត្រូវចាប់ផ្តើមពីបុគ្គល ពោលគឺម្ចាស់គណនីបណ្តាញសង្គមខ្លួនឯងម្នាក់ៗត្រូវចៀសវាងការបន្ទុចបង្អាក់អ្នកដទៃ និងកុំប្រៀបធៀបលើកតម្កើងខ្លួនឯងហើយបន្ទាបតម្លៃអ្នកដទៃឱ្យសោះ»។
លោក អ៊ូ ទេពច័ន្ទណារឹទ្ធ អ្នកបង្កើតមាតិកា (Content creator) ឯករាជ្យមួយរូបដែលធ្លាប់រងនូវការបន្តុះបង្អាប់នៅលើបណ្តាញសង្គម មានប្រសាសន៍នៅថ្ងៃអង្គារនេះថា លោកពិបាកនឹងទទួលយកណាស់នៅពេលដែលលោកកំពុងធ្វើការផ្សាយផ្ទាល់តាមរយៈគេហទំព័រផ្លូវការឱ្យក្រុមហ៊ុនផ្សេងៗ ស្រាប់តែឃើញការបញ្ចេញមតិរិះគន់បន្តុះបង្អាប់ពីរូបរាងរបស់លោក ជាជាងសមត្ថភាពការងាររបស់លោក។
លោកថា បញ្ហាបន្តុះបង្អាប់នេះបានប៉ះពាល់អារម្មណ៍លោកជាខ្លាំង ហើយស្ត្រីកាន់តែរងផលប៉ះពាល់ធ្ងន់ធ្ងរជាងបុរសថែមទៀត។
លោកលើកឡើងថា៖ «ខ្ញុំកំពុងផ្សាយផ្ទាល់ ទទួលការងារពីក្រុមហ៊ុនផ្សេងៗ ពេលកំពុងធ្វើការស្រាប់តែគេចូលខំមិន[បញ្ចេញមតិលើហ្វេសប៊ុក]ថា ធ្មេញខ្ញុំអាក្រក់ ស្ញេញស្ញាញដូចខ្មោច ដូចព្រាយបិសាច។ ឃើញខំមិនរិះគន់ពីរូបរាងខាងក្រៅអីអស់ហ្នឹង វាប៉ះពាល់អារម្មណ៍ខ្ញុំខ្លាំងមែនទែន។ ខ្ញុំចង់រំលងខំមិនហ្នឹងណាស់ តែវាបានកន្ត្រាក់អារម្មណ៍ខ្ញុំរួចទៅហើយ។ វាជាចំណុចខ្សោយរបស់យើង វាជាកង្វះខាតរបស់យើង តែធ្វើម៉េចបើធម្មជាតិបានតែប៉ុណ្ណឹង។ វាធ្វើឱ្យខ្ញុំអស់ជំនឿចិត្ត ហើយចង់តែសម្ងំស្ងៀមម្នាក់ឯង។ ពាក្យពិតខ្លះវាត្រឹមត្រូវ តែមិនគួរឱ្យនិយាយចេញទាល់តែសោះ។ ខ្ញុំជាបុរស ខ្ញុំរឹងប៉ឹងបានបុណ្ណឹង ចុះទម្រាំបងប្អូនជានារី តើគាត់បាត់បង់ការជឿជាក់ប៉ុណ្ណា»៕
