រដ្ឋបាលរាជធានីភ្នំពេញបានសម្រេចពន្យារពេលដាក់បម្រាមគោចររយៈពេល៧ថ្ងៃបន្ថែមទៀត ខណៈសកម្មភាពការងារ មុខរបរ ឬអាជីវកម្មផ្សេងៗត្រូវបន្តផ្អាករហូតដល់ថ្ងៃទី២៦ ខែសីហា។
យោងតាមសេចក្តីសម្រេចរបស់រដ្ឋបាលរាជធានីភ្នំពេញ ចុះថ្ងៃទី១១ ខែសីហានេះ បានពន្យារពេលការអនុវត្តបម្រាមគោចររយៈពេល៧ថ្ងៃបន្តទៀត ចាប់ពីថ្ងៃទី១៣ ដល់ថ្ងៃទី១៩ ខែសីហា។ បម្រាមគោចរលើកនេះ គឺអនុវត្តចាប់ពីវេលាម៉ោង១០យប់ ដល់ម៉ោង៣ទៀបភ្លឺ។
ក្រៅពីនេះ អាជ្ញាធររាជធានីភ្នំពេញក៏បានបន្តផ្អាកសកម្មភាពការងារ មុខរបរ ឬអាជីវកម្មផ្សេងៗ ចាប់ពីថ្ងៃទី១៣ រហូតដល់ថ្ងៃទី២៦ ខែសីហា ដើម្បីបន្តប្រយុទ្ធប្រឆាំងនឹងជំងឺកូវីដ-១៩។
រដ្ឋបាលរាជធានីភ្នំពេញ បន្តថា នៅក្នុងអំឡុងពេលនៃការអនុវត្តវិធានការរដ្ឋបាលនេះ ត្រូវផ្អាកជាបណ្តោះអាសន្នចំពោះសកម្មភាពការងារ មុខរបរ ឬអាជីវកម្មដែលមានហានិភ័យខ្ពស់នៃការឆ្លងរាលដាលជំងឺកូវីដ-១៩ ការជួបជុំ ឬការប្រមូលផ្តុំមនុស្សជាលក្ខណៈឯកជនលើសពី១៥នាក់។ មិនតែប៉ុណ្ណោះ សាលារៀន អាជីវកម្មក្លឹបកម្សាន្តគ្រប់ប្រភេទ រមណីយដ្ឋាន សារមន្ទីរ សួនកុមារ អាជីវកម្មម៉ាស្សា សូណា និងស្ទីម ហាងលក់និងសេពគ្រឿងស្រវឹង រោងភាពយន្ត រោងសម្ដែងសិល្បៈ ក្លឹបហាត់ប្រាណ និងមជ្ឈមណ្ឌលកីឡាគ្រប់ប្រភេទ ក៏ត្រូវបានផ្អាកជាបណ្តោះអាសន្នបន្តទៀតផងដែរ។
សូមបញ្ជាក់ថា អាជ្ញាធររាជធានីភ្នំពេញបានដាក់វិធានការរដ្ឋបាលនិងបម្រាមគោចរលើកទី១ ចាប់ពីថ្ងៃទី២៩ ខែកក្កដា រហូតដល់យប់ថ្ងៃទី១៣ ខែសីហានេះ៕