ប៉ូលិសថៃបានចាត់ទុកការប្រើប្រាស់កងកម្លាំងរបស់ពួកគេប្រឆាំងនឹងក្រុមអ្នកតវ៉ាថាជាវិធានការសុវត្ថិភាពសាធារណៈដ៏ចាំបាច់មួយ ខណៈដែលបាតុកម្មបានបន្តកើតមានឡើងបន្ថែមទៀតក្នុងទីក្រុងបាងកក នៅថ្ងៃពុធនេះ ដើម្បីទាមទារសារជាថ្មីឱ្យនាយករដ្ឋមន្ត្រីរបស់ខ្លួនចុះចេញពីតំណែង ជុំវិញការដោះស្រាយករណីវីរុសកូវីដ-១៩មិនបានល្អ។
ប៉ូលិសបានប្រើប្រាស់ឧស្ម័នបង្ហូរទឹកភ្នែក កាណុងបាញ់ទឹក និងគ្រាប់កាំភ្លើងកៅស៊ូ កាលពីថ្ងៃអង្គារ ដើម្បីបំបែកក្រុមអ្នកតវ៉ាដែលបានប្រមូលផ្តុំគ្នានៅជិតគេហដ្ឋានរបស់នាយករដ្ឋមន្ត្រីថៃ លោក ប្រាយុទ្ធ ចាន់អូចា ដើម្បីបង្ហាញពីកំហឹងរបស់ពួកគេចំពោះករណីផ្ទុះឡើងនៃជំងឺរាតត្បាតដែលបានធ្វើឱ្យតួលេខស្លាប់បាត់បង់ជីវិតកើនឡើងខ្ពស់ក្នុងរយៈពេលប៉ុន្មានថ្ងៃចុងក្រោយនេះ។
ក្រុមបាតុកររាប់ពាន់នាក់បានធ្វើដំណើរតាមក្បួនរថយន្តនិងម៉ូតូឆ្លងកាត់ទីក្រុងបាងកក ដោយឈប់នៅទីតាំងទាំងឡាយណាដែលមានជាប់ទំនាក់ទំនងជាមួយសមាជិកគណៈរដ្ឋមន្ត្រីឬអ្នកគាំទ្រលោក ប្រាយុទ្ធ ចាន់អូចា ដែលបានការពារយុទ្ធសាស្ត្ររបស់លោកក្នុងការប្រយុទ្ធប្រឆាំងនឹងមេរោគនេះ។
ប៉ូលិសថៃបានឱ្យដឹងទៀតថា នៅក្នុងហេតុការណ៍នោះ កងកម្លាំងសមត្ថកិច្ចចំនួន៩នាក់បានរងរបួសដោយសារគ្រាប់បែកប៉េងប៉ុង ដុំថ្ម និងផាវ ដែលបាតុករបានប្រើប្រាស់ ខណៈដែលទ្រព្យសម្បត្តិសាធារណៈផ្សេងទៀតក៏រងការខូចខាតផងដែរ។
ទីភ្នាក់ងារសារព័ត៌មាន Reuters បានស្រង់សម្ដីអធិការប៉ូលិសក្រុងបាងកក លោក Pakapong Pongpetra យកមកចុះផ្សាយថា៖ «ប៉ូលិសបានសម្រេចចិត្តប្រើឧស្ម័នបង្ហូរទឹកភ្នែក កាណុងបាញ់ទឹក និងគ្រាប់កាំភ្លើងកៅស៊ូ ពីព្រោះយើងគិតថា បើយើងមិនធ្វើដូច្នេះទេ វានឹងបង្កឱ្យមានជាការខូចខាតច្រើនជាងនេះ»។
លោកបន្តថា នៅក្នុងហេតុការណ៍នោះ ក៏មានការឃាត់ខ្លួនមនុស្សចំនួន៤៨នាក់ ក្នុងនោះមានយុវជន១៥នាក់ ខណៈដែលម៉ូតូចំនួន១២២គ្រឿងត្រូវបានរឹបអូស។
គួរបញ្ជាក់ថា ការតវ៉ាតាមដងផ្លូវប្រឆាំងនឹងនាយករដ្ឋមន្ត្រីថៃ លោក ប្រាយុទ្ធ ចាន់អូចា ត្រូវបានធ្វើឡើងជាបន្តបន្ទាប់ ក្នុងរយៈពេលចុងក្រោយនេះ ទាក់ទងទៅនឹងការដោះស្រាយវិបត្តិកូវីដ-១៩មិនបានល្អ និងការខូចខាតដល់សេដ្ឋកិច្ចដែលបង្កដោយជំងឺរាតត្បាត ខណៈដែលតួលេខឆ្លងសរុបនៅក្នុងប្រទេសមានចំនួនជាង៧៨ម៉ឺនករណី និងអ្នកស្លាប់មានចំនួនជាង៦ពាន់នាក់ គិតរហូតមកដល់ពេលបច្ចុប្បន្ននេះ៕