រដ្ឋាភិបាលកម្ពុជាបានប្រកាសពន្យារពេលការអនុវត្ត «យុទ្ធនាការពង្រឹងវិធានការប្រយុទ្ធនិងទប់ស្កាត់ការឆ្លងរាលដាលជំងឺកូវីដ-១៩» នៅទូទាំងប្រទេស រយៈពេល៧ថ្ងៃបន្តទៀត ខណៈវិធានការបិទខ្ទប់ខេត្តជាប់ព្រំដែន និងខេត្តសៀមរាប ត្រូវបញ្ចប់នៅថ្ងៃនេះ។
យោងតាមសេចក្តីប្រកាសលេខ០៤ របស់រដ្ឋាភិបាល ចុះថ្ងៃទី១១ ខែសីហា «យុទ្ធនាការពង្រឹងវិធានការប្រយុទ្ធនិងទប់ស្កាត់ការឆ្លងរាលដាលជំងឺកូវីដ-១៩» នៅទូទាំងប្រទេស នឹងបន្តរហូតដល់ថ្ងៃទី១៩ ខែសីហា។ ចំណែកវិធានការបិទខ្ទប់ខេត្តជាប់ព្រំដែនចំនួន៧ និងខេត្តសៀមរាប នឹងត្រូវបញ្ចប់ចាប់ពីវេលាម៉ោង២៣និង៥៩នាទី ថ្ងៃទី១២ ខែសីហានេះទៅ។
រដ្ឋាភិបាលបានទទួលស្គាល់ថា ការអនុវត្តវិធានការបិទខ្ទប់បណ្តាខេត្តជាប់ព្រំដែន និងខេត្តសៀមរាប និងយុទ្ធនាការថ្នាក់ជាតិរយៈពេល១៤ថ្ងៃកន្លងមកនេះ បានជួយដល់ការគ្រប់គ្រងនិងការពន្យារពេលបានមួយកម្រិតនូវការឆ្លងរាលដាលទ្រង់ទ្រាយធំក្នុងសហគមន៍ នៃមេរោគកូវីដ-១៩ ប្រភេទ “ដែលតា” (Delta)។
ជាក់ស្តែង អត្រានៃការឆ្លងរាលដាលនៃជំងឺកូវីដ-១៩ប្រចាំថ្ងៃមានលក្ខណៈថេរ បើទោះជាមេរោគបំប្លែងខ្លួនថ្មី ប្រភេទ ដែលតា បានធ្លាយចូលក្នុងសហគមន៍ ហើយបច្ចុប្បន្នបានរីករាលដាលរហូតទៅដល់១៧រាជធានី-ខេត្តក្តី៕
