ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃព្រហស្បតិ៍នេះថា នាយករដ្ឋមន្ត្រីកូរ៉េខាងជើងបានចុះត្រួតពិនិត្យតំបន់ដែលរងផលប៉ះពាល់ដោយទឹកជំនន់ ខណៈភ្លៀងធ្លាក់ខ្លាំងបានបន្តវាយប្រហារទីប្រជុំជននៅតាមបណ្តោយឆ្នេរសមុទ្រភាគខាងកើត ដែលបង្កឱ្យមានការព្រួយបារម្ភអំពីការខូចខាតដំណាំនានា។
ទីភ្នាក់ងារព័ត៌មាន KCNA របស់កូរ៉េខាងជើង បានរាយការណ៍ថា នាយករដ្ឋមន្ត្រីកូរ៉េខាងជើង លោក Kim Tok Hun បានធ្វើដំណើរទៅកាន់តំបន់នានានៃខេត្ត South Hamgyong ដោយបានថ្លែងទៅកាន់កងទ័ពនិងអ្នកជួយសង្គ្រោះបន្ទាន់ផ្សេងទៀតឱ្យជួយជួសជុលរាល់ការខូចខាតទាំងឡាយ។
ទីភ្នាក់ងារព័ត៌មានដដែលបានឱ្យដឹងថា៖ «ស្របពេលដែលស្វែងយល់ពីស្ថានភាពរស់នៅរបស់ជនរងគ្រោះដោយទឹកជំនន់ លោក Kim Tok Hun ក៏បានសង្កត់ធ្ងន់ពីតម្រូវការរបស់មន្រ្តីខេត្ត ដើម្បីជួយសម្រាលទុក្ខលំបាករបស់ជនរងគ្រោះឱ្យបានទាន់ពេលវេលាផងដែរ»។
កាលពីខែមិថុនាកន្លងទៅ មេដឹកនាំកូរ៉េខាងជើង លោក Kim Jong Un បានថ្លែងថា ប្រទេសនេះប្រឈមមុខនឹងស្ថានភាពស្បៀងអាហារដ៏តានតឹង ខណៈលោកថា ការរីករាលដាលនៃជំងឺរាតត្បាត បញ្ហាព្យុះទីហ្វុងកាលពីឆ្នាំមុន និងរលកថ្មីនៃព្យុះ បានបង្កឱ្យមានការព្រួយបារម្ភអំពីកង្វះស្បៀងអាហារ។
កាលពីថ្ងៃអាទិត្យ លោកក៏បានរៀបចំទាហាន ដើម្បីអនុវត្តការងារជួយសង្គ្រោះនៅតំបន់ដែលរងគ្រោះដោយភ្លៀងធ្លាក់ខ្លាំងនាពេលថ្មីៗនេះផងដែរ។
យោងតាមទូរទស្សន៍រដ្ឋកូរ៉េខាងជើង KRT បានរាយការណ៍ថា តំបន់មួយចំនួននៃខេត្ត North Hamgyong ត្រូវបានវាយប្រហារដោយទឹកភ្លៀងសារជាថ្មី កាលពីថ្ងៃពុធ។
ប្រភពដដែលបានបន្តថា៖ «ជំនន់ទឹកភ្លៀងបានវាយប្រហារតំបន់ទាំងនេះ ដូច្នេះយើងចាំបាច់ត្រូវរៀបចំវិធានការទប់ស្កាត់ឱ្យបានហ្មត់ចត់»។
វិធានការនានាគឺត្រូវការចាំបាច់សម្រាប់ការពារផ្ទះ អគារ ដំណាំ រោងចក្រថាមពល ផ្លូវថ្នល់ ផ្លូវដែក និងច្រាំងទន្លេ ជាពិសេសការខូចខាតពីការបាក់ដីដែលបណ្តាលមកពីទឹកជំនន់៕