ខេត្តព្រះសីហនុ បានប្រកាសរកឃើញករណីអ្នកវិជ្ជមានជំងឺកូវីដ-១៩បំប្លែងថ្មីប្រភេទ “ដែលតា” (Delta) ជាលើកដំបូង លើកុមារាម្នាក់អាយុ៨ឆ្នាំដែលទើបធ្វើដំណើរមកពីប្រទេសថៃ។
តាមសេចក្តីជូនដំណឹងរបស់រដ្ឋបាលខេត្តព្រះសីហនុ បានឱ្យដឹងថា កុមារាវ័យ៨ឆ្នាំរូបនេះបានធ្វើដំណើរមកពីប្រទេសថៃ ចូលមកប្រទេសកម្ពុជាតាមច្រកឡែម ដោយបានធ្វើចត្តាឡីស័កនៅខេត្តបន្ទាយមានជ័យ នៅថ្ងៃទី២០ ខែកក្កដា ឆ្នាំ២០២១ និងបានមកដល់ខេត្តព្រះសីហនុ នៅថ្ងៃទី៦ ខែសីហា ឆ្នាំ២០២១ ដោយបន្តធ្វើចត្តាឡីស័កនៅអគារព្យាបាល សាកាណា៣។
បន្ទាប់មក នៅថ្ងៃទី៧ ខែសីហា ឆ្នាំ២០២១ ក្រុមគ្រូពេទ្យបានយកសំណាករបស់គាត់បញ្ជូនទៅធ្វើតេស្តនៅវិទ្យាស្ថានប៉ាស្ទ័រ ហើយរហូតដល់ថ្ងៃទី១២ ខែសីហា ឆ្នាំ២០២១ ទើបទទួលបានលទ្ធផលវិជ្ជមានជំងឺកូវីដ-១៩បំលែងថ្មីប្រភេទ Delta។
រដ្ឋបាលខេត្តជាប់មាត់សមុទ្រមួយនេះ បានអំពាវនាវឱ្យសាធារណជនទាំងអស់ត្រូវបង្កើនការប្រុងប្រយ័ត្នខ្ពស់បំផុត ដោយអនុវត្តឱ្យបានខ្ជាប់ខ្ជួននូវគោលការណ៍ណែនាំរបស់ក្រសួងសុខាភិបាល។
គិតត្រឹមថ្ងៃទី១០ ខែសីហា ឆ្នាំ២០២១ កម្ពុជារកឃើញអ្នកមានវិជ្ជមានកូវីដ-១៩បំប្លែងថ្មីប្រភេទ Delta លើពលករដែលត្រលប់មកពីប្រទេសថៃ និងវៀតណាម អ្នកដំណើរតាមជើងហោះហើរ បុគ្គលិកសុខាភិបាល មន្ត្រីរាជការ និងអ្នកភូមិក្នុងសហគមន៍សរុបចំនួនសរុប៤២៩នាក់ហើយ ក្នុងចំណោម១៨រាជធានី-ខេត្ត រួមទាំងខេត្តព្រះសីហនុផង៕
