មន្ត្រីជាន់ខ្ពស់ក្រសួងសុខាភិបាលបញ្ជាក់ថា មិនមានការបែងចែកជនមានពិការភាពនិងមិនពិការភាពឡើយក្នុងការទទួលបានឱកាសចាក់វ៉ាក់សាំងប្រឆាំងកូវីដ-១៩ ពោលគឺក្រុមជនមានពិការភាពមានឱកាសទទួលបានការចាក់វ៉ាក់សាំងដូចមនុស្សទូទៅ និងត្រូវបានយកចិត្តទុកដាក់ខ្ពស់ថែមទៀតផង។
រដ្ឋលេខាធិការ និងអ្នកនាំពាក្យក្រសួងសុខាភិបាល លោកស្រី ឱ វណ្ណឌីន មានប្រសាសន៍ថា ក្នុងការចាក់វ៉ាក់សាំង ក្រសួងមិនមានការបែងចែករឿងពិការភាពនិងមិនពិការភាពឡើយ ពោលគឺមិនមានការរើសអើងឡើយ ត្បិតមនុស្សគ្រប់រូបមានឱកាសដូចគ្នា។
បន្ថែមពីនេះ លោកស្រីថា ការចាក់វ៉ាក់សាំងគឺផ្តល់អាទិភាពជានិច្ចទៅដល់ជនពិការ ចាស់ជរា និងស្ត្រីមានផ្ទៃពោះ ជាដើម ឱ្យតែគាត់ស្ម័គ្រចិត្តទៅចាក់។ ទោះជាបែបនេះក្តី លោកស្រីថា មានលក្ខខណ្ឌខ្លះដែរដែលជនមានពិការភាពមិនអាចចាក់វ៉ាក់សាំងប្រឆាំងជំងឺកូវីដ-១៩បាន។
លោកស្រី ឱ វណ្ណឌីន ថ្លែងថា៖ «ជាទូទៅ ការចាក់វ៉ាក់សាំងតែងតែមានលក្ខខណ្ឌសុខភាពមួយចំនួនដែលមិនអាចចាក់បាន។ បើយើងនិយាយទៅលើតែភាពពិការរបស់គាត់ មិនមែនជាលក្ខខណ្ឌដែលគាត់មិនអាចចាក់វ៉ាក់សាំងបានទេ។ តែប្រហែលជាពួកគាត់មានបញ្ហាសុខភាពមួយចំនួនដែលក្រុមគ្រូពេទ្យពិនិត្យទៅឃើញថា គាត់មិនអាចចាក់បាន។ សំខាន់លើកត្តាសុខភាពរបស់គាត់ទេ បើបុគ្គលមានសុខភាពមិនល្អ ក៏យើងមិនទាន់ចាក់ឱ្យគាត់ដែរ ដើម្បីចៀសវាងហេតុការណ៍ណាមួយដែលកើតឡើងដោយយថាហេតុ»។
នាយិកាអង្គការជនពិការកម្ពុជា អ្នកស្រី ម៉ាក់ ម៉ូនីកា ប្រាប់ វីអូឌី ថាបច្ចុប្បន្ន ជនមានពិការភាពសរុបចំនួន៣២នាក់ក្នុងអង្គការរបស់អ្នកស្រី បានទទួលការចាក់វ៉ាក់សាំងរួចរាល់អស់ហើយ។ អ្នកស្រីថា ក្រោយចាក់វ៉ាក់សាំងរួច មិនទាន់មានបុគ្គលណាម្នាក់ក្នុងចំណោមនោះមានបញ្ហាអ្វីនៅឡើយទេ។ អ្នកស្រីថា នៅពេលទៅចាក់វ៉ាក់សាំង ខាងក្រសួងសុខាភិបាលបានផ្តល់អាទិភាពឱ្យជនមានពិការភាពខ្ពស់ជាងមនុស្សធម្មតាទៀតផង។
អ្នកស្រីថា៖ «ជនមានពិការភាពនៅក្នុងអង្គការយើង មានបំណងចង់ចាក់វ៉ាក់សាំងឱ្យគ្រប់៣ដងតាមគោលការណ៍របស់រដ្ឋាភិបាល។ យើងនៅតែលើកទឹកចិត្តឱ្យជនមានពិការភាពទៅទទួលការចាក់វ៉ាក់សាំង គោរពតាមការណែនាំរបស់រដ្ឋាភិបាល ដើម្បីទប់ស្កាត់ទាំងអស់គ្នា»។
យ៉ាងណា អ្នកស្រីបានបន្ថែមថា ករណីដែលជនពិការមិនអាចចាក់វ៉ាក់សាំងបាន មិនមែនមកពីពិការភាពរបស់ពួកគាត់ទេ ប៉ុន្តែមកពីករណីបុគ្គលនោះមានជំងឺប្រចាំកាយដែលជាលក្ខខណ្ឌជាប់បម្រាមរបស់ក្រសួងសុខាភិបាល។
លោក ស្រៀង គឹមស្រ៊ុន មានពិការភាពដៃ ជើង និងសរសៃទាញ មានប្រសាសន៍ថា លោកបានទៅសុំចាក់វ៉ាក់សាំងនៅសាលារៀនមួយក្នុងសង្កាត់ទឹកថ្លា រាជធានីភ្នំពេញ តាំងពីខែឧសភា ឆ្នាំ២០២១ ប៉ុន្តែកាលនោះ គ្រូពេទ្យនៅទីនោះបានបដិសេធចាក់វ៉ាក់សាំងជូនលោក។
លោកថា៖ «ខ្ញុំអត់ទាន់បានចាក់វ៉ាក់សាំងបង្ការកូវីដ-១៩នៅឡើយទេ! ពេទ្យថា ចាក់ទៅខ្លាចមានបញ្ហាអី អត់មានអ្នកទទួលខុសត្រូវ អ៊ឹចឹងគេមិនហ៊ានចាក់ឱ្យ។ ខ្ញុំសង្ឃឹមថា នឹងមានការចាក់វ៉ាក់សាំងឱ្យជនពិការដែរ ព្រោះអីបើសិនអត់បានចាក់វ៉ាក់សាំង គេមិនឱ្យធ្វើការងារអី។ វាពិបាកដែរ ឥលូវកូវីដ-១៩ គេឱ្យចាក់វ៉ាក់សាំងកាពារ»។
បែបនេះក្តី ជនមានពិការភាពវ័យ២៦ឆ្នាំរូបនេះ អះអាងថា លោកនៅតែចិញ្ចឹមចិត្តចង់ចាក់វ៉ាក់សាំងបង្ការកូវីដ-១៩នេះ។ លោកថា បើអត់ចាក់វ៉ាក់សាំង លោកបារម្ភខ្លាចកន្លែងការងារគេមិនឱ្យធ្វើ ម៉្យាងស្ថានភាពនៃការឆ្លងរីករាលដាលជំងឺកូវីដ-១៩កំពុងស្ថិតនៅក្នុងក្តីបារម្ភនៅឡើយ ខណៈបច្ចុប្បន្ន លោកស្ទើរតែមិនហ៊ានចេញទៅណាមកណាឡើយ។
លោក ស្រៀង គឹមស្រ៊ុន បន្តថា៖ «ខ្ញុំខ្លាច មិនហ៊ានចេញទៅណាផង វាមានការលំបាកច្រើន មិនទៅណាបាន។ មានផលពិបាកច្រើន មានគេរើសអើងច្រើន ដោយសារយើងមិនបានចាក់វ៉ាក់សាំង។ តែបើគេមិនឱ្យចាក់ដើម្បីការពារជីវិតដែលមានពិការភាព យើងកុំចាក់ក៏បាន»។
បើតាមរបាយការណ៍របស់ក្រសួងសុខាភិបាល គិតមកទល់ថ្ងៃទី១៣ ខែសីហា ឆ្នាំ២០២១នេះ ប្រជាជនវ័យ១៨ឆ្នាំឡើងទៅចំនួនជាង៨លាននាក់នៅទូទាំងប្រទេស រាប់ទាំងជនមានពិការភាព មនុស្សចាស់ ចាស់ជរា ស្រ្តីបំបៅកូន ជាដើម បានទទួលការចាក់វ៉ាក់សាំងបង្ការកូវីដ-១៩៕