ក្រសួងសុខាភិបាលបានប្រកាសនៅថ្ងៃសៅរ៍នេះថា អ្នកជំងឺកូវីដ-១៩ ចំនួន ១២ នាក់ទៀត បានស្លាប់ ដែលធ្វើឱ្យចំនួននេះកើនឡើងដល់ ១ ៦៦៦ នាក់ ខណៈអ្នកឆ្លងថ្មីមានចំនួន ៥៩៨ នាក់បន្ថែមទៀត។
ទោះជាយ៉ាងនេះក្តី ក្រសួងបានប្រកាសថា នៅថ្ងៃដដែលនោះ មានអ្នកជំងឺកូវីដ-១៩ ចំនួន ៦៨២ បានជាសះស្បើយ។
គិតត្រឹមថ្ងៃសៅរ៍ ទី១៤ ខែសីហា ឆ្នាំ២០២១ ចំនួនអ្នកឆ្លងជំងឺកូវីដ-១៩ នៅកម្ពុជា មានចំនួនសរុប ៨៤ ៨៦០ នាក់ ស្លាប់ ១ ៦៦៦ នាក់ ជាសះស្បើយចំនួន ៧៩ ៦៥៤ នាក់។ ក្នុងនោះករណីនាំចូលពីក្រៅប្រទេសមានចំនួនសរុប ១២ ៦៨៩ នាក់។
ដោយឡែកទាក់ទងនឹងការចាក់វ៉ាក់សាំងការពារជំងឺកូវីដ-១៩ គិតត្រឹមថ្ងៃទី១៣ ខែសីហា ឆ្នាំ២០២១ សម្រេចបាន ៨២,៦៨% ហើយ ធៀបជាមួយចំនួនប្រជាជនគោលដៅ ១០ លាននាក់។ ចំណែកការចាក់វ៉ាក់សាំងលើកុមារ-យុវវ័យ ដែលមានអាយុ ចាប់ពី ១២ ឆ្នាំ ទៅក្រោម ១៨ ឆ្នាំវិញ សម្រេចបាន ២៤,៥២% ធៀបជាមួយនឹងចំនួនកុមារ-យុវជនគោលដៅចំនួន ១ ៩៦៦ ៩៣១ នាក់៕