អតីតគណបក្សសង្គ្រោះជាតិបានចេញសេចក្តីប្រកាសបដិសេធថា ថ្នាក់ដឹកនាំរបស់ខ្លួនមានការជាប់ពាក់ព័ន្ធជាមួយនឹងគណបក្សនយោបាយដែលទើបបង្កើតថ្មីនោះទេ។
ការបដិសេធនេះ មិនបានបញ្ជាក់ឱ្យចំឈ្មោះគណបក្សនយោបាយណាមួយឬថ្នាក់ដឹកនាំណាម្នាក់ទេ។ ប៉ុន្តែកន្លងមក មានការផ្សព្វផ្សាយព័ត៌មាននៅលើបណ្តាញសង្គមហ្វេសប៊ុកថា លោក សម រង្ស៊ី និងថ្នាក់ដឹកនាំអតីតគណបក្សសង្គ្រោះជាតិមួយចំនួនទៀត ស្ថិតនៅពីក្រោយនៃការបង្កើតគណបក្ស «បេះដូងជាតិ» របស់លោក សៀម ភ្លុក ដែលក្រសួងមហាផ្ទៃបានប្រកាសទទួលស្គាល់កាលពីពេលថ្មីៗនេះ។
សេចក្តីប្រកាសបដិសេធនេះបានសរសេរយ៉ាងដូច្នេះថា៖ «គណបក្សសង្គ្រោះជាតិ សូមធ្វើការបដិសេធ ចំពោះពាក្យចចាមអារាម ដែលថា មានថ្នាក់ដឹកនាំគណបក្សសង្គ្រោះជាតិខ្លះ មានការពាក់ព័ន្ធជាមួយគណបក្សនយោបាយថ្មីខ្លះ ដែលបានចាប់ផ្តើម ឬគ្រោងធ្វើសកម្មភាពនយោបាយនៅក្នុងប្រទេសកម្ពុជា»។
កាលពីសប្តាហ៍មុន មេធាវីការពារក្តីលោក កឹម សុខា គឺលោក ចាន់ ចេន ក៏បានចេញមកប្រកាសបដិសេធដែរថា លោក កឹម សុខា មិនពាក់ព័ន្ធ មិនគាំទ្រ និងមិននៅពីក្រោយនៃការបង្កើតគណបក្សនយោបាយថ្មីៗ ដោយបុគ្គល ឬ ក្រុមណាមួយនោះទេ។
សូមបញ្ជាក់ថា ចាប់តាំងពីការរំលាយគណបក្សសង្គ្រោះជាតិដោយតុលាការកំពូលនៅខែវិច្ឆិកា ឆ្នាំ២០១៧មក មានអតីតមន្ត្រីជាន់ខ្ពស់គណបក្សសង្គ្រោះជាតិមួយចំនួន បានសុំសិទ្ធិធ្វើនយោបាយ និងចេញទៅបង្កើតគណបក្សនយោបាយយ៉ាងហោចចំនួន ៦ ដែលក្នុងនោះរួមមាន គណបក្សឆន្ទៈខ្មែររបស់លោក គង់ មុនីកា កូនប្រុសរបស់លោក គង់ គាំ គណបក្សខ្មែរស្រលាញ់ជាតិ របស់លោក ជីវ កត្តា និងលោក កង គឹមហាក់ គណបក្សខ្មែរអភិរក្សនិយម របស់លោក រៀល ខេមរិន្ទ គណបក្សកែទម្រង់កម្ពុជា របស់លោក អ៊ូ ច័ន្ទរ័ត្ន និងលោក ប៉ុល ហំម គណបក្សកម្ពុជានិយម របស់លោក យ៉ែម បុញ្ញឬទ្ធិ និងគណបក្សបេះដូងជាតិ របស់លោក សៀម ភ្លុក ជាដើម។ អតីតមន្ត្រីទាំងនេះបានអះអាងថា ការចេញទៅបង្កើតគណបក្សនយោបាយថ្មី គឺដើម្បីត្រៀមចូលរួមបោះឆ្នោតឃុំសង្កាត់នៅឆ្នាំ២០២២ និងការបោះឆ្នោតជាតិនៅឆ្នាំ២០២៣ ខណៈលោក សម រង្ស៊ី និងលោក កឹម សុខា នៅរក្សាគោលជំហរដើមដដែល៕