សមាគមចិញ្ចឹមសត្វកម្ពុជា ឱ្យដឹងថា កសិករប្រមាណ៣ ០០០គ្រួសារបានសម្រេចចិត្តបោះបង់របរចិញ្ចឹមសត្វ ដោយសារតែការខាតបង់ច្រើនក្នុងអំឡុងវិបត្តិជំងឺកូវីដ-១៩ និងមិនអាចប្រកួតប្រជែងតម្លៃក្នុងទីផ្សារជាមួយផលិតផលនាំចូលពីប្រទេសជិតខាងបាន។
ប្រធានសមាគមចិញ្ចឹមសត្វកម្ពុជា លោក ស៊្រុន ពៅ មានប្រសាសន៍ថា សមាគមនេះមានសមាជិកដែលជាកសិករចិញ្ចឹមសត្វជ្រូក គោ មាន់ និងទា ជាដើម ប្រហែលជាជាង១០ ០០០គ្រួសារ ក្នុងនោះ តាមការស្រង់ស្ថិតិ គឺមានកសិករប្រមាណ៣ ០០០គ្រួសារហើយដែលសម្រេចចិត្តបោះបង់ការចិញ្ចឹមសត្វក្នុងអំឡុងវិបត្តិកូវីដ-១៩នេះ។
លោកបន្តថា ក្នុងបរិបទកូវីដ-១៩នេះ អត្រាចិញ្ចឹមសត្វរបស់កសិករមានការកើនឡើងជាងមុន ប៉ុន្តែតម្រូវការក្នុងទីផ្សារមានការថយចុះ ដោយសារពុំមានអតិថិជនទិញច្រើនដូចមុន ខណៈការនាំចូលសត្វពីក្រៅប្រទេសក៏មានច្រើន ដែលធ្វើឱ្យមានការប្រកួតប្រជែងតម្លៃក្នុងទីផ្សារខ្លាំងរវាងផលិតផលក្នុងស្រុកនិងផលិតផលនាំចូល។ លោកថា ករណីនេះក៏បានធ្វើឱ្យកសិករកាន់តែលំបាក ហើយឈានទៅរកការបោះបង់មុខរបរចិញ្ចឹមសត្វនេះ។
លោកបានអំពាវនាវថា៖ «គយនៅតាមព្រំដែនសូមជួយពង្រឹងកុំឱ្យមានការនាំចូលសត្វអត់ច្បាប់ពីបរទេស មានទាំងជំងឺនិងប៉ះពាល់ដល់សុខភាពអ្នកហូប រឹតបន្តឹងកុំឱ្យនាំចូលខុសច្បាប់ ជាកត្តាសំខាន់ដើម្បីកសិករ ដើម្បីជាតិ។ បើគាត់មិនជួយទេ វាប៉ះពាល់ដល់ការចិញ្ចឹមសត្វនៅក្នុងស្រុក»។
បើតាមលោក ស៊្រុន ពៅ ការជួយដល់កសិករប្រកបរបរចិញ្ចឹមសត្វ នឹងជួយដល់កសិករអាចរកចំណូលបាន និងផ្តល់ការងារធ្វើដល់កសិករផ្សេងទៀតដែលដាំដំណាំកសិកម្មសម្រាប់ផ្គត់ផ្គង់ចំណីដល់ការចិញ្ចឹមសត្វ ហើយក៏ជួយកាត់បន្ថយការចំណាកស្រុករបស់ពលរដ្ឋផងដែរ។
អ្នកស្រី ម៉ក់ សុជាតិ អតីតអ្នកចិញ្ចឹមសត្វជ្រូកនៅស្រុកកៀនស្វាយ ខេត្តកណ្តាល បានឱ្យដឹងថា គ្រួសារគាត់បានបោះបង់អាជីពជាអ្នកចិញ្ចឹមជ្រូកនេះកាលពីចុងឆ្នាំ២០១៩ ក្រោយចិញ្ចឹមអស់រយៈពេលជិត២០ឆ្នាំ។ អ្នកស្រីបន្តថា ការបោះបង់របរនេះ ដោយសារការចិញ្ចឹមចុងក្រោយនេះមានការខាតបង់ច្រើនអស់ប្រមាណជិត១០ម៉ឺនដុល្លារ។
ស្ត្រីដែលធ្លាប់ចិញ្ចឹមមេជ្រូកចំនួន១០០ក្បាលរូបនេះ និយាយថា៖ «ពេលយើងមិនទាន់បានផល វាបានថ្លៃ! ស្រាប់តែដល់ពេលយើងបានផល ត្រូវលក់ វា[តម្លៃ]ចុះថោក ព្រោះមានជ្រូកនាំចូលពីនេះពីនោះអ៊ីចឹង។ ខាតមិនដឹងប៉ុន្មានសារហើយ ថោកថ្លៃៗនៅហ្នឹង! ឡើងថ្លៃ វាបានរយៈពេលខ្លី តែពេលបានផល វាថោករយៈពេលយូរ យើងទប់ជាមួយចំណីមិនរួចទេ។ អ៊ីចឹងដូចបាក់ទឹកចិត្ត ដូចលែងមានទំនុកចិត្តនឹងចិញ្ចឹម»។
ចំណែកលោក ជៀម លុយ ម្ចាស់កសិដ្ឋានចិញ្ចឹមមាន់យកពង នៅស្រុកឧដុង្គ ខេត្តកំពង់ស្ពឺ បានលើកឡើងថា កសិករមួយចំនួនបានសម្រេចចិត្តបោះបង់ការចិញ្ចឹមមាន់ ដោយសារមានការនាំចូលពងមាន់ពីប្រទេសវៀតណាមច្រើន ហើយតម្លៃទាបជាងពងមាន់ចិញ្ចឹមក្នុងស្រុក។
លោកថា៖ «រយៈកាលមុន កសិករយើងចិញ្ចឹមមាន់ខាត កសិករខ្លះបោះបង់ ដោយសារមានការនាំចូលពងមាន់ពីវៀតណាមច្រើនពេក ធ្វើឱ្យពងមាន់ក្នុងស្រុកលក់បានតម្លៃទាបតាមដែរ។ កាលណាគាត់នាំចូលមក គាត់ទម្លាក់តម្លៃចុះទាប។ ចំណែកការផលិតរបស់យើងត្រូវការដើមទុនច្រើន តែត្រូវលក់ថោកដូចផលិតផលនាំចូលរបស់គាត់ដែរ នេះជាបញ្ហា។ តាមពិត បើរដ្ឋចង់នាំចូលក៏បានដែរ តែចូលមកបំពេញតម្រូវការបានហើយ កុំឱ្យលើសតម្រូវការពេក»។
ប្រធាននាយកដ្ឋានរដ្ឋបាល ផែនការ គណនេយ្យ និងសហប្រតិបត្តិការ អគ្គនាយកដ្ឋានសុខភាពសត្វ និងផលិតកម្មសត្វ ក្រសួងកសិកម្ម រុក្ខាប្រមាញ់ និងនេសាទ លោក ហុង ប៉ុណ្ណាកា មានប្រសាសន៍ថា ចាប់ពីពាក់កណ្តាលឆ្នាំ២០១៩មក ការចិញ្ចឹមសត្វមានការកើនឡើងគួរឱ្យកត់សម្គាល់ ជាពិសេសការស្នើសុំបង្កើតកសិដ្ឋានជាលក្ខណៈពាណិជ្ជកម្ម។
លោកថា រហូតមកដល់ពេលនេះ កសិដ្ឋានស្របច្បាប់មានចំនួន១ ៣០៣កន្លែង ក្នុងនោះ កសិដ្ឋានចិញ្ចឹមគោនិងក្របីចំនួន៥៧កន្លែង កសិដ្ឋានចិញ្ចឹមជ្រូក ៥៣៩កន្លែង និងកសិដ្ឋានចិញ្ចឹមមាន់ ៧០៧កន្លែង។
លោក ហុង ប៉ុណ្ណាកា បន្តថា៖ «សម្រាប់រយៈពេល៧ខែឆ្នាំ២០២១នេះ ការនាំចូលសាច់បង្កកមានការកើនឡើង១០% បើធៀបនឹងឆ្នាំ២០២០។ ប៉ុន្តែការនាំចូលសត្វរស់ មានការថយចុះយ៉ាងខ្លាំង ដូចជា ជ្រូកសាច់រស់ ថយចុះ៥១,៦% ពីឆ្នាំ២០២០ មាន់សាច់រស់ ថយចុះ៤០,៧% ពីឆ្នាំ២០២០ និងទាសាច់រស់ ថយចុះ៣២% ពីឆ្នាំ២០២០ផងដែរ។ ការនាំចូលសត្វដើម្បីបំពេញតម្រូវការក្នុងស្រុក គឺធ្វើឱ្យមានស្ថិរភាពទីផ្សារសាច់សត្វ»។
ជាមួយគ្នានេះដែរ លោកថា ក្រសួងបាននិងកំពុងជំរុញការចិញ្ចឹមសត្វក្នុងស្រុក ហើយកាត់បន្ថយជាបណ្តើរៗនូវការនាំចូលពីក្រៅប្រទេស ខណៈក្រសួងក៏បានអនុវត្តដោយជោគជ័យនូវការធ្វើឱ្យមានស្ថិរភាពតម្លៃសាច់ជ្រូករស់លើទីផ្សារ ដែលធ្វើឱ្យអ្នកចិញ្ចឹមសត្វបានពង្រីកកសិដ្ឋានបន្ថែម ហើយអ្នកមានធនធានបានបោះទុនវិនិយោគបន្ថែមលើវិស័យចិញ្ចឹមសត្វផងដែរ។
ក្រៅពីនោះ លោកថា ក្រសួងបាននិងកំពុងជជែកពិភាក្សាជាមួយស្ថាប័នពាក់ព័ន្ធ និងសមាគមចិញ្ចឹមសត្វកម្ពុជា ដើម្បីរិះរកយុទ្ធសាស្ត្រកាត់បន្ថយថ្លៃដើមផលិតចំណីសត្វ ក្នុងការប្រកួតប្រជែងនឹងប្រទេសជិតខាងផងដែរ៕