មន្ត្រីក្រសួងកសិកម្ម បានឱ្យដឹងថា ការនាំចូលសាច់បង្កកក្នុងរយៈពេល៧ខែឆ្នាំនេះ មានការកើនឡើង១០ភាគរយ ខណៈការនាំចូលសត្វរស់ថយចុះ បើធៀបនឹងរយៈពេលដូចគ្នាកាលពីឆ្នាំមុន។
ប្រធាននាយកដ្ឋានរដ្ឋបាល ផែនការ គណនេយ្យ និងសហប្រតិបត្តិការ អគ្គនាយកដ្ឋានសុខភាពសត្វ និងផលិតកម្មសត្វ ក្រសួងកសិកម្ម រុក្ខាប្រមាញ់ និងនេសាទ លោក ហុង ប៉ុណ្ណាកា ប្រាប់ វីអូឌី តាមប្រព័ន្ធតេលេក្រាមនៅថ្ងៃចន្ទនេះថា គិតចាប់ពីខែមករា ដល់ខែកក្កដា ឆ្នាំនេះ ការនាំចូលសាច់បង្កកសរុបមានចំនួន១ ៦៦១តោន ពោលគឺមានការកើនឡើង១០% បើធៀបនឹងរយៈពេលដូចគ្នានៅឆ្នាំ២០២០ ដែលមានចំនួន១ ៥០៨តោន។
ចំណែកការនាំចូលសត្វរស់វិញ លោកថា មានការថយចុះ ដូចជា ការនាំចូលជ្រូកសាច់រស់ មានចំនួន៥៤១ ២៣០ក្បាល ថយចុះ ៥១,៦% (១ ១១៧ ៧៥០ក្បាល នៅឆ្នាំ២០២០), មាន់សាច់រស់ ចំនួន១ ៧៣១ ០០០ក្បាល ថយចុះ ៤០,៧% (២ ៩១៩ ០០០ក្បាល នៅឆ្នាំ២០២០) និងទាសាច់រស់ ចំនួន៣៤៩ ០០០ក្បាល ថយចុះ ៣២% (៥១៦ ០០០ក្បាល នៅឆ្នាំ២០២០)។
បើតាមលោក ហុង ប៉ុណ្ណាកា ការនាំចូលផលិតផលសត្វនេះ ដើម្បីបំពេញតម្រូវការក្នុងស្រុក និងធ្វើឱ្យមានស្ថិរភាពទីផ្សារសាច់សត្វ៕
