អង្គជំនុំជម្រះតុលាការកំពូលនៃអង្គជំនុំជម្រះវិសាមញ្ញក្នុងតុលាការកម្ពុជា បានបន្តបើកសវនាការនៅថ្ងៃទី១៨ ខែសីហា ឆ្នាំ២០២១ សម្រាប់ថ្ងៃទី៣ នៃសវនាការលើបណ្តឹងសាទុក្ខក្នុងសំណុំរឿង ០០២/០២ ប្រឆាំងនឹងជនជាប់ចោទ លោក ខៀវ សំផន។
ប្រធានផ្នែកកិច្ចការសាធារណៈ និងជាអ្នកនាំពាក្យសាលាក្តីខ្មែរក្រហម បានឱ្យដឹងថា សវនាការរបស់អង្គជំនុំជម្រះតុលាការកំពូល នៅថ្ងៃនេះ បានផ្ដោតជាសំខាន់ទៅលើប្រធានបទស្តីពី «ទឡ្ហីករណ៍នៃបណ្ដឹងសាទុក្ខពាក់ព័ន្ធនឹងការទទួលខុសត្រូវផ្នែកព្រហ្មទណ្ឌជាលក្ខណៈបុគ្គលរបស់ ខៀវ សំផន» និង «ទឡ្ហីករណ៍នៃបណ្ដឹងសាទុក្ខពាក់ព័ន្ធទៅនឹងការប្រកាសទោស»។
សាលាក្តីខ្មែរក្រហម គ្រោងបើកសវនាការលើបណ្តឹងសាទុក្ខរបស់លោក ខៀវ សំផន នេះ រយៈពេល៤ថ្ងៃ ចាប់ពីថ្ងៃចន្ទ ទី១៦ ខែសីហា ដល់ថ្ងៃព្រហស្បតិ៍ ទី១៩ ខែសីហា និងត្រៀមបម្រុងមួយថ្ងៃទៀត គឺនៅថ្ងៃសុក្រ។
សវនាការនេះធ្វើឡើងតាមបណ្តឹងសាទុក្ខរបស់លោក ខៀវ សំផន អតីតប្រធានគណៈប្រធានរដ្ឋនៃរបបខ្មែរក្រហម ដើម្បីប្រឆាំងនឹងសាលក្រមរបស់អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា ដែលបានកាត់ទោសលោក និងលោក នួន ជា បងធំទី២ ឱ្យជាប់ពន្ធនាគារអស់មួយជីវិត កាលពីថ្ងៃទី១៦ ខែវិច្ឆិកា ឆ្នាំ២០១៨។ ប៉ុន្តែសំណុំរឿងរបស់លោក នួន ជា បានផុតរលត់ក្រោយពីលោក នួន ជា បានទទួលមរណភាពនៅថ្ងៃទី៤ ខែសីហា ឆ្នាំ២០១៩។
លោក ខៀវ សំផន ដែលបច្ចុប្បន្នមានអាយុ៩១ឆ្នាំ គឺជាអតីតមេដឹកនាំខ្មែរក្រហមតែម្នាក់គត់ដែលនៅរស់រានមានជីវិត ក្នុងចំណោមអតីតមេដឹកនាំជាន់ខ្ពស់៤រូប រួមមាន លោក អៀង សារី លោកស្រី អៀង ធីរិទ្ធ និងលោក នួន ជា ដែលសុទ្ធតែបានទទួលមរណភាពជាបន្តបន្ទាប់ នៅក្នុងអំឡុងពេលដំណើរការកាត់ទោសពីឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ និងឧក្រិដ្ឋកម្មសង្គ្រាម នៅចន្លោះពីឆ្នាំ១៩៧៥ ដល់ថ្ងៃទី៦ ខែមករា ឆ្នាំ១៩៧៩៕