អាជ្ញាធរខេត្តស្ទឹងត្រែង សម្រេចបិទខ្ទប់ក្រុងស្ទឹងត្រែងរយៈពេល១សប្តាហ៍ ក្រោយរកឃើញករណីឆ្លងជំងឺកូវីដ-១៩បំប្លែងថ្មីប្រភេទ “ដែលតា” (Delta) ចំនួន៩ករណី។
យោងតាមសេចក្តីប្រកាសរបស់រដ្ឋបាលខេត្តស្ទឹងត្រែង កាលពីថ្ងៃទី១៧ ខែសីហា ម្សិលមិញ បានឱ្យដឹងថា ការបិទខ្ទប់នេះមានរយៈពេល៧ថ្ងៃ ដោយអនុវត្តចាប់ពីម៉ោង១១និង៥៩នាទីយប់មិញ រហូតដល់ថ្ងៃទី២៤ ខែសីហា ឆ្នាំ២០២១។ ភូមិសាស្ត្រដែលត្រូវបិទខ្ទប់អាចត្រូវបានបែងចែកជា «តំបន់ក្រហម» «តំបន់លឿងទុំ» ឬ «តំបន់លឿង» អាស្រ័យតាមកម្រិតនៃការឆ្លងរាលដាលនៃជំងឺកូវីដ-១៩នៅក្នុងមូលដ្ឋានជាក់ស្តែង។
កាលពីថ្ងៃទី១៧ ខែសីហា ម្សិលមិញ គណៈកម្មការប្រយុទ្ធនឹងជំងឺកូវីដ-១៩ខេត្តស្ទឹងត្រែង បានចេញសេចក្តីជូនដំណឹងបន្ទាន់មួយ ដោយអំពាវនាវដល់ប្រជាពលរដ្ឋនិងសាធារណជនឱ្យប្រុងប្រយ័ត្នចំពោះការឆ្លងជំងឺកូវីដ-១៩ប្រភេទថ្មី (Delta) បន្ទាប់ពីក្រុមគ្រូពេទ្យខេត្តបានទទួលលទ្ធផលវិភាគពីវិទ្យាស្ថានប៉ាស្ទ័រ ចាប់ពីថ្ងៃទី១១ ដល់ថ្ងៃទី១៣ ខែសីហា ថាមានអ្នកផ្ទុកមេរោគកូវីដ-១៩ ប្រភេទថ្មី (Delta) ចំនួន៧នាក់ និងមានករណីសង្ស័យអ្នកពាក់ព័ន្ធមួយចំនួនទៀត។
បើតាមរដ្ឋបាលខេត្ត គិតត្រឹមថ្ងៃទី១៧ ខែសីហា ខេត្តស្ទឹងត្រែងមានអ្នកឆ្លងជំងឺកូវីដ-១៩ សរុបចំនួន៧៦៥នាក់ ស្រី៣៧៤នាក់ ក្នុងនោះ មានអ្នកជំងឺកូវីដ-១៩ ប្រភេទថ្មី (Delta) សរុបចំនួន៩នាក់ ស្រី៦នាក់៕
