ក្រសួងសេដ្ឋកិច្ច និងហិរញ្ញវត្ថុ បានទម្លាក់ការព្យាករកំណើនសេដ្ឋកិច្ចឆ្នាំ២០២១ពី ៤% មកនៅត្រឹម ២,៤% វិញ បន្ទាប់ពីការឆ្លងរីករាលដាលនៃជំងឺកូវីដ-១៩នៅក្នុងសហគមន៍បាននិងកំពុងបន្ទច់បង្អាក់យ៉ាងខ្លាំងដល់សកម្មភាពសេដ្ឋកិច្ចនិងពាណិជ្ជកម្ម។
កាលពីដើមឆ្នាំ២០២១ ក្រសួងសេដ្ឋកិច្ចបានព្យាករថា កំណើនសេដ្ឋកិច្ចកម្ពុជានៅឆ្នាំ២០២១ ត្រូវបានរំពឹងថា អាចនឹងមានកំណើនក្នុងអត្រា ៤% ដោយសារការទ្រទ្រង់ដែលងើបឡើងវិញនៃសកម្មភាពពាណិជ្ជកម្ម-ធុរកិច្ចក្នុងស្រុក និងកំណើនវិជ្ជមាននៃសេដ្ឋកិច្ចសកល និងការកើនឡើងនូវតម្រូវការខាងក្រៅ ជាពិសេសការប្រើប្រាស់និងការវិនិយោគឯកជន ដែលជាលទ្ធផលនៃការដាក់ចេញគោលនយោបាយគាំទ្រនៅតាមបណ្តាប្រទេសនានា។
ប៉ុន្តែនៅក្នុងសិក្ខាសាលាស្តីពី «ការឈ្វេងយល់អំពីការកសាងក្របខណ្ឌគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈ សម្រាប់ការរៀបចំសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២២» កាលពីថ្ងៃទី១៧ ខែសីហា រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានថ្លែងថា ព្រឹត្តិការណ៍សហគមន៍២០កុម្ភៈ បានធ្វើឱ្យសេដ្ឋកិច្ចកម្ពុជាអាចនឹងសម្រេចបានអត្រាកំណើនត្រឹមតែ ២,៤% ប៉ុណ្ណោះនៅក្នុងឆ្នាំ២០២១នេះ។
លោកបន្តថា ការព្យាករកំណើនសេដ្ឋកិច្ចលើកនេះ ពោលគឺទាបជាងការព្យាករកាលពីដើមឆ្នាំ ដោយសារតែការឆ្លងរីករាលដាលនៃជំងឺកូវីដ-១៩នៅក្នុងសហគមន៍បាននិងកំពុងបន្ទច់បង្អាក់យ៉ាងខ្លាំងដល់សកម្មភាពពាណិជ្ជកម្ម ដែលធ្វើឱ្យវិស័យទេសចរណ៍ វិស័យលក់ដុំ-លក់រាយ ដែលជាសកម្មភាពប្រើប្រាស់ក្នុងស្រុក វិស័យសំណង់ និងអចលនទ្រព្យ បន្តធ្លាក់ចុះយ៉ាងគំហុក។
តែទោះជាយ៉ាងនេះក្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រំពឹងថា សម្រាប់ឆ្នាំ២០២២ សេដ្ឋកិច្ចកម្ពុជាត្រូវបានរំពឹងថា នឹងសម្រេចបានក្នុងអត្រា ៤,៨% វិញ ហើយមូលហេតុនោះ គឺដោយសារការសម្របខ្លួនបានទៅនឹងប្រក្រតីភាពថ្មី (New Normal) ព្រមទាំងភាពធូរស្រាលនៃការរីករាលដាលនៃជំងឺកូវីដ-១៩ បន្ទាប់ពីការចាក់វ៉ាក់សាំងត្រូវបានអនុវត្តនៅទូទាំងប្រទេស។
លោក សាក់ វាសនា ដែលអះអាងថាជាកម្មករសំណង់ធ្វើការនៅបុរីមួយកន្លែងក្នុងរាជធានីភ្នំពេញ លើកឡើងនៅថ្ងៃព្រហស្បតិ៍នេះថា អំឡុងពេលជួបវិបត្តិកូវីដ-១៩ ធ្វើឱ្យគ្រួសារលោកជួបបញ្ហាប្រឈមច្រើនក្នុងជីវភាព ដោយសារគ្មានការងារធ្វើ។
លោកបានស្នើទៅរដ្ឋាភិបាលជួយបណ្តុះបណ្តាលវិជ្ជាជីវៈ ឬបង្កើតការងារឱ្យប្រជាពលរដ្ឋ ជាពិសេសយុវជនដែលកំពុងពេញកម្លាំង ដើម្បីឱ្យពួកគេអាចរកប្រាក់ទ្រទ្រង់ជីវភាពគ្រួសារ បើពុំដូច្នេះទេ ពួកគេនឹងជួបបញ្ហាប្រឈមសេដ្ឋកិច្ចគ្រួសារកាន់តែខ្លាំង។
លោកថា៖ «ខ្ញុំសំណូមពរដល់រដ្ឋាភិបាលទប់ស្កាត់ជំងឺកូវីដ-១៩ឱ្យបានល្អ។ ហើយមួយទៀត ជួយបង្កើតការងារដល់យុវជន កម្មករ-កម្មការិនី។ ឧទាហរណ៍ដូចខ្ញុំ ចេះជំនាញ ”ក” ឬជំនាញ “ខ” ដើម្បីឱ្យគាត់បង្កើតឱ្យមានការងារធ្វើ។ បើអត់មានការងារធ្វើ ដូចខ្ញុំដាច់បាយហើយ ការងារក៏អត់ ផ្ទះជួលក៏បង់ប្រចាំខែ ថ្លៃទឹកថ្លៃភ្លើងទៀត»។
អ្នកស្រាវជ្រាវសេដ្ឋកិច្ចកម្ពុជា លោក ចាន់ សុផល មានប្រសាសន៍ថា ដើម្បីទប់ស្កាត់កុំឱ្យសេដ្ឋកិច្ចកម្ពុជាធ្លាប់ចុះបន្តទៀត ជំហានដំបូង រដ្ឋាភិបាលនិងប្រជាពលរដ្ឋត្រូវរួមគ្នាកាត់ផ្តាច់ការឆ្លងជំងឺកូវីដ-១៩ ហើយរដ្ឋត្រូវសម្រួលផ្នែកធុរកិច្ចដល់វិនិយោគិនថ្មីដែលមានបំណងមកបណ្តាក់ទុននៅកម្ពុជា រួមទាំងបណ្តុះបណ្តាលវិជ្ជាជីវៈពលរដ្ឋដែលគ្មានការងារធ្វើ ទើបទទួលបានផលវិជ្ជមាន។
លោកមានប្រសាសន៍ថា៖ «ធ្វើយ៉ាងម៉េចឱ្យសកម្មភាពសេដ្ឋកិច្ចនៅកម្ពុជាកុំរាំងស្ទះខ្លាំង ដូចអ្វីដែលយើងអាចសម្រួលបាន ឧទាហរណ៍ ដូចថ្លៃស្ថាប័ន រៀបចំបញ្ជីស្នាមនាំចេញ-នាំចូល ជាដើម។ ហើយអភិវឌ្ឍហេដ្ឋារចនាសម្ព័ន្ធបន្ថែម ដើម្បីសម្រួលចរន្តសេដ្ឋកិច្ច ហើយនិងបន្ថយថ្លៃដើមវិស័យអគ្គិសនីដែលប៉ះពាល់ខ្លាំងដល់ឧស្សាហកម្ម ដល់ការវិនិយោគផ្សេងៗ»។
កាលពីឆ្នាំ២០២០ កំណើនសេដ្ឋកិច្ចកម្ពុជាបានធ្លាក់ចុះដល់ -៣,១% បន្ទាប់ពីបានស្គាល់កំណើនខ្ពស់បំផុតក្នុងរង្វង់ ៧ % អស់រយៈពេលជិត១០ឆ្នាំ៕