សហភាពអឺរ៉ុប ចាត់ទុកសាលក្រមកាត់ទោសប្រឆាំងនឹងលោក រ៉ុង ឈុន និងសកម្មជនពីរនាក់ផ្សេងទៀត ថាជាក្តីកង្វល់របស់ខ្លួន និងបានអំពាវនាវឱ្យរដ្ឋាភិបាលកម្ពុជាបើកលំហសេរីភាពនៃការបញ្ចេញមតិនិងការជួបប្រជុំឡើងវិញ។
តាមរយៈតំណាងរបស់ខ្លួនប្រចាំនៅកម្ពុជា សហភាពអឺរ៉ុបបានចេញសេចក្តីថ្លែងការណ៍ខ្លីមួយនៅថ្ងៃទី១៩ ខែសីហានេះ ដោយបានចាត់ទុកថា សាលក្រមកាត់ទោសប្រឆាំងនឹងលោក រ៉ុង ឈុន និងសកម្មជនពីរនាក់ផ្សេងទៀត បានធ្វើឱ្យប៉ះពាល់ដល់ការបញ្ចេញមតិជាសាធារណៈនៃការមិនយល់ស្របឬការរិះគន់ផ្នែកនយោបាយ និងចោទជាសំណួរអំពីឯករាជ្យភាពនៃប្រព័ន្ធតុលាការកម្ពុជា។
សេចក្តីថ្លែងការណ៍បន្តថា ប្រជាពលរដ្ឋកម្ពុជា ដោយមិនគិតពីនិន្នាការស្ថាប័នរបស់ខ្លួន ត្រូវធានានូវសេរីភាពក្នុងការបញ្ចេញមតិនិងសេរីភាពនៃការជួបជុំដោយសន្តិវិធី ស្របតាមកតិកាសញ្ញាអន្តរជាតិស្តីពីសិទ្ធិពលរដ្ឋនិងសិទ្ធិនយោបាយ និងសិទ្ធិដែលមានចែងក្នុងរដ្ឋធម្មនុញ្ញកម្ពុជា។ សេចក្តីថ្លែងការណ៍ដដែលបន្តថា សេរីភាពក្នុងការបញ្ចេញមតិ គឺជាផ្នែកមួយដ៏សំខាន់នៃលទ្ធិប្រជាធិបតេយ្យដែលដំណើរការដូចតុលាការឯករាជ្យ ដោយមិនគួរត្រូវបានប្រើប្រាស់ដើម្បីបំបិទមាត់សកម្មជនតវ៉ាដោយសន្តិវិធីនោះទេ។
សហភាពអឺរ៉ុប ក៏បានរម្លឹកឡើងវិញនូវការអំពាវនាវរបស់ខ្លួនដល់ប្រទេសកម្ពុជា ដើម្បីអនុញ្ញាតឱ្យមានសេរីភាពក្នុងការបញ្ចេញមតិនិងការជួបប្រជុំស្របតាមការប្តេជ្ញាចិត្តជាអន្តរជាតិរបស់ខ្លួន។
គួរជម្រាបជូនថា តុលាការក្រុងភ្នំពេញ កាលពីថ្ងៃទី១៨ ខែសីហា បានសម្រេចកាត់ទោសលោក រ៉ុង ឈុន សកម្មជនការងារ និងជាអ្នកឃ្លាំមើលព្រំដែន ឱ្យជាប់ពន្ធនាគាររយៈពេល២ឆ្នាំ ពីបទ «ញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម»។ តុលាការក៏បានកាត់ទោសសកម្មជនពីរនាក់ទៀត រួមមាន កញ្ញា សរ កណិកា និងលោក តុន និមល ឱ្យជាប់ពន្ធនាគារម្នាក់២០ខែក្រោមបទចោទដូចគ្នា និងបានបង្គាប់ឱ្យអ្នកទាំង៣ រួមគ្នាសងជំងឺចិត្តទៅគណៈកម្មការព្រំដែនកម្ពុជាចំនួន៤០០លានរៀល ឬ១០ម៉ឺនដុល្លារអាមេរិក និងបង់ប្រាក់បង្គាប់ក្តីម្នាក់២លានរៀលទៅតុលាការផងដែរ។
ក្រៅពីសហភាពអឺរ៉ុប ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា និងស្ថានទូតប្រទេសស៊ុយអ៊ែតប្រចាំនៅកម្ពុជា ក៏បានបញ្ចេញប្រតិកម្មចំពោះការកាត់ទោសលោក រ៉ុង ឈុន និងសកម្មជនពីរនាក់ផ្សេងទៀតនេះផងដែរ៕
