មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានជំរុញក្រុមហ៊ុនដែលមានបំណងចង់ឱ្យក្រសួងដាក់ដេញថ្លៃការនាំសត្វជ្រូកចូលពីក្រៅប្រទេស ឱ្យពួកគេបង្វែរទៅជាការវិនិយោគលើការចិញ្ចឹមសត្វជ្រូកក្នុងស្រុកដើម្បីផ្គត់ផ្គង់ទីផ្សារជំនួសវិញ។
ការជំរុញនេះធ្វើឡើងក្រោយមានក្រុមហ៊ុនឯកជនក្នុងស្រុកចំនួន៤ កាលពីថ្ងៃទី១២ ខែសីហា ឆ្នាំ២០២១ បានចេញលិខិតមួយដោយចោទក្រសួងកសិកម្មថា អនុញ្ញាតឱ្យក្រុមហ៊ុននាំជ្រូកចូលពីក្រៅប្រទេសដោយប្រកាន់បក្ខពួក ដែលធ្វើឱ្យឈ្មួញនាំចូលជ្រូកផ្តាច់មុខនោះដំឡើងថ្លៃខ្ពស់ស្រេចតែចិត្ត។
ពួកគេបន្តថា ក្រុមហ៊ុនដទៃទៀតមិនមានឱកាសដើម្បីទទួលបានសិទ្ធិនាំចូលដើម្បីប្រកួតប្រជែងលក្ខណៈទីផ្សារសេរីបាននោះទេ ដែលកត្តានេះធ្វើឱ្យប៉ះពាល់ដល់ផលប្រយោជន៍និងសិទ្ធិធ្វើពាណិជ្ជកម្មដោយសេរីរបស់ក្រុមហ៊ុនស្របច្បាប់នានា ដែលបានចុះបញ្ជីពាណិជ្ជកម្មនៅកម្ពុជាយ៉ាងខ្លាំង។ លើសពីនេះទៀតនោះ ធ្វើឱ្យប៉ះពាល់ដល់ជីវភាពរស់នៅប្រចាំថ្ងៃរបស់ពលរដ្ឋយ៉ាងខ្លាំងផងដែរ។
បញ្ហានេះ ពួកគេស្នើទៅក្រសួងកសិកម្មកំណត់គោលការណ៍ដាក់ដេញថ្លៃ ដើម្បីនាំចូលសត្វជ្រូករស់យកមកផ្គត់ផ្គង់ទីផ្សារនៅកម្ពុជាតែម្តង។
ជាការឆ្លើយតបករណីនេះ អគ្គលេខាធិការក្រសួងកសិកម្ម រុក្ខាប្រមាញ់ និងនេសាទ លោក ស្រី វុឌ្ឍី មានប្រសាសន៍នៅថ្ងៃទី១៨ ខែសីហា ថាក្រុមហ៊ុនទាំងនោះគួរតែវិនិយោគលើការចិញ្ចឹម ប្រសើរជាងការនាំចូលពីក្រៅប្រទេស និងដើម្បីកាត់បន្ថយការរីករាលដាលនៃជំងឺផង។
លោកថា៖ «[ក្រសួង] គាំទ្រឱ្យមានការចិញ្ចឹមក្នុងស្រុក។ ពួកគាត់ [ក្រុមហ៊ុនឯកជន] គួរតែវិនិយោគលើការចិញ្ចឹម ប្រសើរជាងការនាំចូលពីក្រៅប្រទេស។ ការនាំចូលសត្វ សាច់ ត្រូវអនុលោមតាមវិធានអនាម័យ និងភូតគាមអនាម័យ និងច្បាប់ស្តីពីសុខភាពសត្វនិងផលិតកម្មសត្វ សំដៅជួយទប់ស្កាត់ការរីករាលដាលជំងឺឆ្លង»។
ចំណែកប្រធានសមាគមចិញ្ចឹមសត្វកម្ពុជា លោក ស្រ៊ុន ពៅ បញ្ជាក់ថា បើក្រសួងពាក់ព័ន្ធអនុញ្ញាតឱ្យក្រុមហ៊ុនទាំង៤ដេញថ្លៃនាំចូលជ្រូកវិញនោះ នឹងអាចប៉ះពាល់ដល់កសិករ មិនតែប៉ុណ្ណោះការនាំចូលសត្វរស់អាចជាកត្តានាំជំងឺមកផងដែរ។ លោកថា បើមានទុន ពួកគេគួរបង្វែរមកវិនិយោគលើការចិញ្ចឹមសត្វក្នុងស្រុកវិញប្រសើរជាង។
លោក ស្រ៊ុន ពៅ បញ្ជាក់ថា៖ «ក្រុមហ៊ុនដែលស្នើសុំនាំចូលជ្រូកពីប្រទេសជិតខាង មកសុំដេញថ្លៃនោះ ខ្ញុំថាមិនអាចទេ។ កសិករកំពុងចិញ្ចឹម បើមានការអនុញ្ញាតឱ្យមានការដេញថ្លៃនាំចូលវិញតាមអំពើចិត្ត នោះគឺបង្កផលប៉ះពាល់ដល់កសិករក្នុងស្រុក។ លើកនេះ បើមានការនាំចូលមកទៀត កសិករអាចនឹងដួលរលំ ហើយលែងជឿជាក់លើរដ្ឋាភិបាល។ អ្នកទាំងអស់ដែលមានលុយកាក់នាំជ្រូកចូល គួរបង្វែរមកជួយអ្នកចិញ្ចឹមជ្រូកក្នុងស្រុក វាល្អជាង»។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា ការរឹតបន្តឹងការនាំចូលជ្រូកពីបរទេសជាការផ្តល់ឱកាសនិងជួយលើកកម្ពស់ដល់ជីវភាពកសិករដែលចិញ្ចឹមជ្រូកក្នុងស្រុក។
លោកថា៖ «ក្រសួងគាត់ត្រូវតែគិតគូរទៅលើយន្តការនៃការគាំទ្របន្ថែម រួមជាមួយនឹងលើកទឹកចិត្តឱ្យមានការចិញ្ចឹមសម្រាប់ការផ្គត់ផ្គង់។ យើងកុំពឹងផ្អែកតែផលិតផលខាងក្រៅពេក វានាំឱ្យយើងមានបញ្ហាច្រើនទៅថ្ងៃក្រោយ ហើយយើងខាតបង់ទាំងសេដ្ឋកិច្ច។ អ៊ីចឹងបើមានការរឹតបន្តឹងការនាំចូល [ជ្រូករស់] ពីប្រទេសជិតខាង វាគឺជាចំណុចដែលនាំឱ្យមានការលើកកម្ពស់ផលិតផលសាច់ជ្រូកក្នុងស្រុក។ ប៉ុន្តែដើម្បីធានាថា ការផ្គត់ផ្គង់ត្រឹមត្រូវនិងផ្តល់ផលចំណេញដល់ប្រជាពលរដ្ឋ ក្រសួងត្រូវរៀបចំយុទ្ធសាស្ត្រជាដំណាក់កាលៗបន្ថែមទៀតក្នុងការគាំទ្រការចិញ្ចឹមជ្រូករបស់កសិករក្នុងស្រុក»។
អ្នកជំនាញផ្នែកកសិកម្ម និងជាទីប្រក្សាអង្គការសេដាក លោកបណ្ឌិត យ៉ង សាំងកុមារ បានសរសេរនៅលើទំព័រហ្វេសប៊ុកផ្ទាល់ខ្លួននៅថ្ងៃទី១៨ ខែសីហា ដោយគាំទ្រការមិនឱ្យនាំចូលជ្រូក១លានក្បាលក្នុងមួយឆ្នាំមកកម្ពុជា។ លោកបន្តថា ក្រសួងកសិកម្ម ត្រូវមានគោលនយោបាយនិងយុទ្ធសាស្រ្តគាំទ្រដល់ការចិញ្ចឹមជ្រូកក្នុងស្រុក ដោយផ្សារភ្ជាប់ជាមួយនឹងការបែងចែកធនធានមនុស្សនិងធនធានថវិកាជាក់លាក់លើការងារនេះ ជាពិសេសការផលិតកូនជ្រូក ការផលិតចំណី និងសេវាពេទ្យសត្វ។
កាលពីថ្ងៃទី១៨ ខែសីហា ឆ្នាំ២០២១ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានលើកឡើងតាមបណ្តាញសង្គមហ្វេសប៊ុកផ្លូវការរបស់លោក ដោយទាមទារឱ្យសារព័ត៌មានមួយដែលកំពុងពេញនិយមនៅកម្ពុជា ប៉ុន្តែលោកមិនចេញឈ្មោះឡើយ ថាត្រូវបញ្ឈប់សកម្មភាពជាបន្ទាន់នូវការគប់គិតបំភ្លៃការពិតជាមួយឈ្មួញមានបំណងនាំចូលសត្វពីបរទេស មកបំផ្លាញការចិញ្ចឹមសត្វនៅកម្ពុជាដែលកំពុងមានវឌ្ឍភាពល្អ។
លោកសរសេរបន្តថា៖ «អំពើគប់គិតនេះ រួមជាមួយការបំភ្លៃការពិតរបស់ក្រុមព័ត៌មាននោះ គឺបានបញ្ជាក់ឱ្យឃើញថា កំពុងធ្វើសកម្មភាពផ្ទុយទៅនឹងគោលនយោបាយរបស់រាជរដ្ឋាភិបាល»។
កាលពីថ្ងៃទី១៦ ខែកក្កដា ឆ្នាំ២០២០ ក្រសួងកសិកម្មបានចេញលិខិតមួយបញ្ជាក់ពីការកាត់បន្ថយការនាំជ្រូកចូលពីបរទេសពីចំនួន២០ ៤០០ក្បាលក្នុងមួយថ្ងៃ នៅខែមករា ឆ្នាំ២០២០ មកនៅត្រឹម៦ ៧០០ក្បាលក្នុងមួយថ្ងៃ ត្រឹមថ្ងៃទី២៤ ខែកុម្ភៈ ឆ្នាំ២០២០។ ក្រសួងបញ្ជាក់ពេលនោះថា ការអនុញ្ញាតឱ្យនាំចូលតែជាង៦ ០០០ក្បាលនោះ ក្នុងន័យបង្កើនផលិតកម្មសត្វជ្រូកក្នុងស្រុក និងរកទីផ្សារជូនកសិករ ក្រុមហ៊ុនចិញ្ចឹមជ្រូក និងសមាគមអ្នកចិញ្ចឹមសត្វកម្ពុជា ដើម្បីបំពេញនូវកង្វះខាតប្រមាណ ១៨% ទៀត៕