អតីតមេដឹកនាំខ្មែរក្រហមមួយរូបបានផ្ញើសារចុងក្រោយថា លោកស្លាប់ទៅនឹងនៅចងចាំថា មានតែលោកម្នាក់ប៉ុណ្ណោះត្រូវបានគេកាត់ទោសជានិមិត្តរូបឱ្យទទួលខុសត្រូវពីបទឧក្រិដ្ឋផ្សេងៗក្នុងរបបខ្មែរក្រហម។
ការថ្លែងរបស់លោក ខៀវ សំផន ធ្វើឡើងនៅក្នុងថ្ងៃចុងក្រោយនៃសវនាការលើបណ្តឹងសាទុក្ខ ឬបណ្តឹងតវ៉ារបស់លោក ក្នុងសំណុំរឿង ០០២/០២។ សាលាក្តីខ្មែរក្រហម បានបើកសវនាការលើបណ្តឹងសាទុក្ខរបស់លោក ខៀវ សំផន នេះ រយៈពេល៤ថ្ងៃ ចាប់ពីថ្ងៃចន្ទ ទី១៦ ខែសីហា ដល់ថ្ងៃព្រហស្បតិ៍ ទី១៩ ខែសីហានេះ។
នៅនាទីចុងក្រោយនៃសវនាការ លោក ខៀវ សំផន បានប្រកាសច្រានចោលយ៉ាងដាច់អហង្ការជាថ្មីទៀតចំពោះការចោទប្រកាន់នានាពីសំណាក់តុលាការនៃសាលាក្តីខ្មែរក្រហម ដែលកាត់ទោសលោកឱ្យជាប់ពន្ធនាគារអស់មួយជីវិត។
តែយ៉ាងណា ជនជាប់រូបនេះនិយាយថា ទោះបីតុលាការជាន់ខ្ពស់មួយនេះសម្រេចយ៉ាងណាក៏ដោយ ក៏គាត់ដឹងថា ខ្លួននឹងត្រូវស្លាប់នៅក្នុងពន្ធនាគារដដែល។
លោកបន្តថា៖ «ពេលខ្ញុំស្លាប់ទៅ ខ្ញុំចងចាំជានិច្ច ទុក្ខសោកវេទនារបស់ប្រជាជនកម្ពុជា។ ខ្ញុំស្លាប់ទៅ សង្កេតឃើញថា ខ្ញុំម្នាក់ឯងចំពោះអស់លោក ត្រូវបានគេកាត់ទោសធ្វើជានិមិត្តរូបជាជាងការប្រព្រឹត្តរបស់ខ្ញុំក្នុងឋានៈជាបុគ្គលនោះទេ»។
លោក នង ចាន់ផល អតីតជនរងគ្រោះនៅមន្ទីរសន្តិសុខ ស២១ ឬគុកទួលស្លែង ចាត់ទុកការលើកឡើងរបស់លោក ខៀវ សំផន គ្រាន់តែជាការដោះសារមួយប៉ុណ្ណោះ ប៉ុន្តែលោកនៅតែមិនអាចបំភ្លេចរាល់ការឈឺចាប់ដែលកើតក្នុងសម័យខ្មែរក្រហមនោះបានឡើយ។
លោកថា៖ «សម័យហ្នឹង ពូជាកុមារម្នាក់មានការអាម៉ាស់មែនទែន ដោយសារជាតិឯងសម្លាប់ជាតិឯង។ ដូចជាពូអ៊ីចឹង ជាកុមារអត់មានកំហុសអីសោះ បែរជាសម្លាប់ទាំងគ្រួសារ ដែលបានបាត់បង់ក្នុងសារមន្ទីរទួលស្លែង ហៅ ស២១ ក៏ដូចពលរដ្ឋខ្មែរនៅទូទាំងប្រទេស មានការឈឺចាប់មែនទែន មិនអាចបំភ្លេចបានអស់មួយជីវិត»។
សាស្ត្រាចារ្យប្រវត្តិសាស្ត្រ លោកបណ្ឌិត វង់ សុធារ៉ា ចាត់ទុកការថ្លែងសារចុងក្រោយរបស់លោក ខៀវ សំផន នេះថាគ្រាន់តែលេសមួយដើម្បីគេចចេញពីការទទួលខុសត្រូវចំពោះមុខប្រវត្តិសាស្ត្រតែប៉ុណ្ណោះ។
តែយ៉ាងណា លោកយល់ថា ការកាត់ទោសជានិមិត្តរូប វានៅតែល្អជាងរបបខ្មែរក្រហមដែលកាត់ទោសមនុស្សតាមរយៈការធ្វើទារុណកម្មយ៉ាងព្រៃផ្សៃ។
លោកថា៖ «ប្រហែលជាដូចគាត់ថាមែន បើតាមខ្ញុំមើល វាគ្រាន់តែជានិមិត្តរូប ព្រោះអត់បានធ្វើឱ្យសាហាវដូចជំនាន់គាត់»។
លោក ខៀវ សំផន បច្ចុប្បន្នមានអាយុ៩១ឆ្នាំ ជាអតីតមេដឹកនាំជាន់ខ្ពស់សម័យខ្មែរក្រហមតែម្នាក់គត់ដែលនៅរស់រានមានជីវិត ក្នុងចំណោមអតីតមេដឹកនាំជាន់ខ្ពស់៤រូប រួមមាន លោក អៀង សារី លោកស្រី អៀង ធីរិទ្ធ និងលោក នួន ជា ដែលសុទ្ធតែបានទទួលមរណភាពជាបន្តបន្ទាប់ នៅក្នុងអំឡុងពេលដំណើរការកាត់ទោសពីឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ និងឧក្រិដ្ឋកម្មសង្គ្រាម ដែលប្រព្រឹត្តនៅចន្លោះពីឆ្នាំ១៩៧៥ ដល់ថ្ងៃទី៦ ខែមករា ឆ្នាំ១៩៧៩។
លោក ខៀវ សំផន ត្រូវបានអង្គជំនុំជម្រះសាលាដំបូងនៃសាលាក្តីខ្មែរក្រហម កាត់ទោសកាលពីថ្ងៃទី១៦ ខែវិច្ឆិកា ឆ្នាំ២០១៨ ឱ្យជាប់ពន្ធនាគារអស់មួយជីវិត ប៉ុន្តែលោក ខៀវ សំផន បានប្តឹងទាស់នឹងសាលដីកានេះ។
ទោះយ៉ាងណា ប្រធានក្រុមប្រឹក្សាជំនុំជម្រះតុលាការកំពូលនៃសាលាក្តីខ្មែរក្រហម នៅមិនទាន់មានការសម្រេចយ៉ាងណានៅឡើយទេទៅលើសំណុំរឿងនេះ ដោយគ្រាន់តែបញ្ជាក់នឹងប្រកាសសាលដីកានៅពេលក្រោយ៕
