មន្ត្រីជាន់ខ្ពស់រដ្ឋាភិបាលកម្ពុជា បានស្នើសុំឱ្យភាគីថៃជួយទប់ស្កាត់កុំឱ្យសកម្មជនអតីតបក្សប្រឆាំង ប្រើប្រាស់ទឹកដីថៃធ្វើជាមូលដ្ឋានវាយប្រហារមកលើរដ្ឋាភិបាលកម្ពុជា តាមរយៈបណ្តាញសង្គម ខណៈអ្នកតាមដានសង្គមថា ការបញ្ចេញមតិគឺជាសិទ្ធិសេរីភាពរបស់ពលរដ្ឋដែលធានាដោយរដ្ឋធម្មនុញ្ញ។
ការស្នើសុំនេះ បានធ្វើឡើងនៅក្នុងជំនួបមួយរវាង លោក សុខ សុក្រឹត្យា រដ្ឋលេខាធិការក្រសួងទេសចរណ៍ និងជាទីប្រឹក្សារបស់លោកនាយករដ្ឋមន្ត្រី ហ៊ុន សែន ជាមួយលោក Chaiwut Thanakanusorn រដ្ឋមន្ត្រីក្រសួងសេដ្ឋកិច្ចឌីជីថល និងសង្គមថៃ នៅរាជធានីបាងកក ប្រទេសថៃ កាលពីថ្ងៃទី២៣ ខែសីហា ឆ្នាំ២០២១។
នៅក្នុងជំនួបនោះ លោក សុខ សុក្រឹត្យា បានលើកសំណើ៣ចំណុច ជាពិសេសស្នើឱ្យភាគីថៃជួយទប់ស្កាត់ក្រុមប្រឆាំង ឬសកម្មជនប្រឆាំង ប្រើប្រាស់បណ្តាញសង្គមចេញពីប្រទេសថៃ វាយប្រហារថ្នាក់ដឹកនាំជាន់ខ្ពស់ និងរដ្ឋាភិបាលកម្ពុជា។
ក្រៅពីនេះ លោកក៏បានស្នើឱ្យភាគីថៃជួយទប់ស្កាត់ព័ត៌មានក្លែងក្លាយ ដែលអាចធ្វើឱ្យប៉ះពាល់ដល់ទំនាក់ទំនងមិត្តភាពរវាងប្រទេស និងប្រជាជននៃប្រទេសទាំងពីរ និងការផ្លាស់ប្តូរព័ត៌មាន និងបទពិសោធន៍លើការបង្រ្កាបឧក្រិដ្ឋកម្មក្នុងប្រព័ន្ធ Cyber ដូចជា ការបង្ក្រាបល្បែងអនឡាញ ការបង្ក្រាបការឆូតកាតហិរញ្ញវត្ថុ និងកិច្ចសហការបណ្តុះបណ្តាលធនធានមនុស្សផ្នែកឌីជីថលជូនមន្ត្រីរាជការកម្ពុជាផងដែរ។
អ្នកវិភាគ និងជាអ្នកតាមដានសង្គមកម្ពុជា លោកបណ្ឌិត ប៉ា ចន្ទរឿន បានចាត់ទុកថា បើការស្នើសុំនេះដូចអ្វីដែលប្រព័ន្ធផ្សព្វផ្សាយបានចុះផ្សាយមែននោះ វាគឺជាទម្រង់បន្ថែមទៀតនៃការធ្វើទុក្ខបុកម្នេញ និងការរឹតត្បិតសិទ្ធិសេរីភាពរបស់អ្នកនយោបាយ ឬសកម្មជននយោបាយមួយចំនួនដែលកំពុងគេចខ្លួន ឬលាក់ខ្លួននៅក្នុងប្រទេសថៃ។
ទោះជាយ៉ាងនេះក្តី លោកថា ការបញ្ចេញមតិ គឺជាសិទ្ធិសេរីភាពរបស់ប្រជាពលរដ្ឋ ដែលត្រូវបានធានាការពារដោយរដ្ឋធម្មនុញ្ញកម្ពុជា។
លោកមានប្រសាសន៍ថា៖ «ខ្ញុំមិនបានដឹងថាតើមានប្រជាពលរដ្ឋខ្មែរប៉ុន្មាននាក់ទេដែលនៅស្រុកថៃសព្វថ្ងៃនេះ ដែលប្រើប្រាស់បណ្តាញផ្សព្វផ្សាយសង្គម ក្នុងការវាយប្រហាររដ្ឋាភិបាលហ្នឹង ក៏ប៉ុន្តែប្រសិនបើមន្ត្រីរដ្ឋាភិបាលហ្នឹង អាចរៀបចំជាយុទ្ធនាការដើម្បីលើកកម្ពស់ការប្រើប្រាស់ប្រព័ន្ធអ៊ីនធឺណិត ដូចជា បណ្តាញផ្សព្វផ្សាយសង្គមហ្វេសប៊ុកហ្នឹង ឱ្យប្រជាពលរដ្ឋយល់ដឹងអំពីអ្វីដែលគួរធ្វើអ្វីដែលមិនគួរធ្វើ ឱ្យបានជ្រោតជ្រៀបសិនទៅមុនហ្នឹងចាត់វិធានការរដ្ឋបាល ព្រោះប្រជាពលរដ្ឋយើងមួយចំនួនធំ តាមការសង្កេតបរស់ខ្ញុំហ្នឹង គឺគាត់មិនសូវយកចិត្តទុកដាក់និងយល់ដឹងប៉ុន្មានទេ អ្វីដែលគួរធ្វើអ្វីដែលមិនគួរធ្វើតាមបណ្តាញសង្គមដូចជាហ្វេសប៊ុកអីជាដើមហ្នឹង»។
វីអូឌី មិនអាចស្វែងរកប្រភពដើម្បីសុំការឆ្លើយតបពីអតីតសកម្មជនគណបក្សប្រឆាំងដែលកំពុងលាក់ខ្លួននៅក្នុងប្រទេសថៃ ទៅនឹងការស្នើសុំរបស់ភាគីកម្ពុជាបាននៅឡើយទេ។
ចាប់តាំងពីមានការបង្ក្រាប និងការរំលាយអតីតគណបក្សសង្គ្រោះជាតិនៅខែវិច្ឆិកា ឆ្នាំ២០១៧មក សកម្មជនអតីតគណបក្សប្រឆាំងមួយចំនួនធំ បានទៅរស់នៅក្នុងប្រទេសថៃ ដើម្បីគេចចេញពីការធ្វើទុក្ខបុកម្នេញនានា៕