អាជ្ញាធរខេត្តស្ទឹងត្រែង បានសម្រេចបន្តបិទខ្ទប់ក្រុងស្ទឹងត្រែងរយៈពេល១សប្តាហ៍ទៀត គិតចាប់ពីថ្ងៃនេះរហូតដល់ថ្ងៃទី៣១ ខែសីហា ដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩ ប្រភេទ ដែលតា។
យោងតាមសេចក្តីសម្រេចរបស់រដ្ឋបាលខេត្តស្ទឹងត្រែង ចុះថ្ងៃទី២៤ ខែសីហានេះ បានឱ្យដឹងថា ការបិទខ្ទប់ភូមិសាស្ត្រក្រុងស្ទឹងត្រែងជាបណ្តោះអាសន្ននេះ គិតចាប់ពីវេលាម៉ោង២៣និង៥៩នាទី ថ្ងៃទី២៤ ដល់ថ្ងៃទី៣១ ខែសីហា ឆ្នាំ២០២១ ដើម្បីសំដៅបន្តពង្រឹងការប្រយុទ្ធនិងទប់ស្កាត់ការឆ្លងរាលដាលក្នុងសហគមន៍ដែលបណ្តាលមកពីមេរោគកូវីដ-១៩ ប្រភេទ ដែលតា (Delta)។
អាជ្ញាធរខេត្តស្ទឹងត្រែងបានសម្រេចបិទខ្ទប់ក្រុងស្ទឹងត្រែងលើកដំបូងរយៈពេល១សប្តាហ៍ ដោយគិតចាប់ពីថ្ងៃទី១៧ ដល់ថ្ងៃទី២៤ ខែសីហា ក្រោយពីការផ្ទុះឡើងនូវជំងឺកូវីដ-១៩បំប្លែងថ្មី ប្រភេទ “ដែលតា (Delta)” ចំនួន៩ករណី។
គិតត្រឹមថ្ងៃទី២៣ ខែសីហា ឆ្នាំ២០២១ ខេត្តស្ទឹងត្រែងមានអ្នកឆ្លងជំងឺកូវីដ-១៩សរុបចំនួន៨៨៩នាក់ ក្នុងនោះមានប្រភេទ “ដែលតា (Delta)” ចំនួន២៨នាក់ (ស្រី១៦នាក់) ខណៈអ្នកជាសះស្បើយចំនួន៥២៧នាក់ ស្លាប់៧នាក់ និងកំពុងសម្រាកព្យាបាលចំនួន៣៥៥នាក់៕
